27
Fri, Apr

සියල් අපල වර්ගවාද නෂ්ටකාම දුරු කරන්ඩ 
කබල් කපටි දෘෂ්ටිවාද වන්දනාව හෙළි කරන්ඩ 
කචල් කරන කර්ණ කටුක සිංහනාද කිච කරන්ඩ 
විකල් බිමට විමුක්තියේ 'අවතාරය' නැගිට එන්ඩ

අතේ චණ්ඩ චක්‍රායුධ තෝමරයි උරේ 
හිසේ සර්පයින් දෙනෙතින් විදෙයි හී සරේ 
විණේ කටින උන් පසුපස හඹයි ගිනි සැරේ 
හෙණේ අරන් 'අවතාරය' වරෙන් කළුවරේ

-සුමිත් චාමින්ද

අග්‍රාමාත්‍ය රනිල් වික්‍රමසිංහ මහතාට එරෙහි විශ්වවාසභංගය යෝජනාව සඳහා අද(16) ඒකාබද්ධයේ පාර්ලිමේන්තු මන්ත්‍රීවරුන් විසින් අත්සන් තබා තිබේ.

එහිදී මුලික කරුණු 14 ක් පදනම් කර ගෙන අග්‍රාමාත්‍යවරයාට එරෙහිව මෙම විශ්වාසභංගය ගෙනවිත් ඇත.

ඒ තුළින් තව දුරටත් රනිල් වික්‍රමසිංහ මහතාට තව දුරටත් අග්‍රාමාත්‍යවරයා ලෙස ද කැබිනට් අමාත්‍යවරයෙකු ලෙස ද කටයුතු කිරීමේ හැකියාව පිළිබඳ මෙන්ම එතුමා අගමැතිධූරය දරණ ආණ්ඩුවට කටයුතු කිරීමේ හැකියාව පිළිබඳව ද විශ්වාසයක් නොපවතින බවට ද මෙම විශ්වාසභංගයෙන් ඉදිරිපත් සනාථ වෙනු ඇත.

මෙහි මුලික කරුණු 12 ක් බැඳුම්කර සිදුවීමට අදාළව ගොණු කර ඇති අතර එහි අවසන් කරුණු 2 ක ලෙස ශ්‍රී ලංකාව තුළ දැවැන්ත ආර්ථික අර්බුදයක් නිර්මාණය කිරීම හා නීතිය හා සාමය පිළිබඳ අමාත්‍යධූරය දරමින් මහනුවර දිස්ත්‍රික්කය තුළ ඇති වුණ නොසනසුන්කාරී තත්ත්වය හමුවේ සිංහල, දෙමළ හා මුස්ලිම් ජනතාවට ආරක්ෂාව සැලසීමට ක්ෂීණක පියවර ගැනීමට අසමත් වීමෙන් ජීවිත සහ දේපල හානි සිදු වීමෙන් ජාතික සමඟියට බරපතළ ලෙස හානි කර, ජාත්‍යන්තර ප්‍රජාව තුළ ශ්‍රී ලංකාවේ ප්‍රතිරූපය කැලැල් කිරීම යන කරුණු මත පදනම් ව අගමැතිවරයාගේ විශ්වාසය පළුදු වු බව ඒකාබද්ධ විපක්ෂය පෙන්වා දෙයි.

මෙම විශ්වාසභංගය සඳහා දිනේෂ් ගුණවර්ධන, වාසුදේව නානායක්කාර, චමල් රාජපක්ෂ, විමල් වීරවංශ, උදය ගම්මන්පිල, ඩලස් අලහප්පෙරුම, මහින්ද යාපා අබේවර්ධන, සාලින්ද දිසානායක, රංජිත් සොයිසා, මහින්දානන්ද අලුත්ගමගේ, ජානක වක්කුඹුර, තාරක බාලසූරිය, ඉන්දික අනුරුද්ධ, විමලවීර දිසානායක, බන්දුල ගුණවර්ධන, නිරෝෂන් ප්‍රේමරත්න, ඩී.වී.චානක, නාමල් රාජපක්ෂ, ප්‍රසන්න රණතුංග, රෝහිත අබේගුණවර්ධන, සිසිර ජයකොඩි, පියල් නිශාන්ත ද සිල්වා හා ප්‍රේමලාල් ජයසේකර යන පාර්ලිමේන්තු මන්ත්‍රී විසින් අත්සන් යොදා තිබේ.

පසුගියදා රට තුළ ඇති වූ නොසන්සුන්කාරී තත්ත්වයත් සමඟ සමාජ ජාල වෙබ් අඩවි අවහිර කිරීම සම්බන්ධයෙන් සහ ඉදිරියේදී රටේ සමාජ ඡාලා මාධ්‍යයන්හි ක්‍රියාකාත්රීත්වය පිළිබඳව සාකච්ඡා කිරීම සඳහා හෙට(15) ෆේස්බුක් බලධාරීන් දිවයිනට පැමිණෙන බව අග්‍රාමාත්‍ය රනිල් වික්‍රමසිංහ මහතා පවසයි.

අද(14) පෙරවරුවේ කොළඹ පැවති උත්සවයකට එක්වෙමින් අග්‍රාමාත්‍යවරයා මේ බව සඳහන් කළේය.

මෙහිදී වැඩිදුරටත් අදහස් දැක්වු අග්‍රාමාත්‍යවරයා මෙසේ කියා සිටියේය.

“එක් අතකින් සමාජ මාධ්‍ය ජාලා අවහිර කිරීම තුළින් ඒ හරහා කෙරෙන ධනාත්මක ක්‍රියා නතර වූ විට එයින් සමාජයට හානියක් සිදු වෙනවා. අධ්‍යාපන ක්ෂේත්‍රයට, පණිවුඩ හුවමාරුවට මෙන්ම ආර්ථිකයට හානියක් වෙනවා.

අප මෙහි ධනාත්මක භාවයෙන් ප්‍රයෝජනයක් ලබා ගන්නේ කෙසේදැයි කල්පනා කළ යුතුයි. එම ධනාත්මක භාවයෙන් සැබෑ ප්‍රයෝජනය ලබා ගන්නට නොහැකි නම් සමාජයට විශාල හානියක් සිදු වෙනවා.

එම ධනාත්මක කටයුතු කඩාකප්පල් කිරීමට අපට අවශ්‍ය නැහැ. අනෙක් අතට සමාජ මාධ්‍ය ජාලා තුළින් සමාජයේ එදිනෙදා ජීවිතය කඩාකප්පල් කෙරෙන ප්‍රචණ්ඩ ක්‍රියා ඇති කිරීමටත් අවශ්‍ය වන්නේ නැහැ. මහනුවර ඇති වූ සිද්ධිය මීට හොඳම උදාහරණයක් වශයෙන් දැක්විය හැකියි.

මහනුවර සංචාරක ව්‍යාපාරය දෙස බලන්න. මහනුවර තිබෙන හෝටල් සංඛ්‍යාව ඉතා සීමිතයි. නිවෙස්වල කාමර පවා සංචාරකයන්ට ලබාදෙන ව්‍යාපාරයක් මහනුවර ක්‍රියාත්මක වෙනවා. එම ව්‍යාපාරය දියුණුවට පත්වූයේ ෆේස්බුක්, වට්ස්ඇප්, වයිබර් වැනි සමාජ මාධ්‍ය ජාලා සහ සන්නිවේදන ක්‍රම නිසයි.

විශාල සංචාරක පිරිසක් වර්තමානයේ දී මහනුවරට එනවා. මෙම ක්‍රමවේද නිසා මහනුවර සංචාරක ව්‍යාපාරය විශාල ලෙස දියුණුවට පත් වුණා.

අනෙක් අතට මෙම ක්‍රමවේදයෙන්ම ලබාදුන් වෛරී සහගත පණිවුඩ නිසා ඇති වූ කෝලාහලයෙන් මහනුවර සංචාරක ව්‍යාපාරය සම්පූර්ණයෙන්ම බිඳ වැටී තිබෙනවා.

සමාජ මාධ්‍ය ජාලාවල ඇති ධනාත්මක භාවය සහ විනාශකාරී භාවය මහනුවර සිද්ධියෙන් පෙනෙන්නට තිබෙනවා.

මේ සඳහා අප ගත යුතු පියවර කුමක්ද? රජය ලෙස අප සිතා බැලිය යුත්තේ මේ කාරණයයි. සමාජ මාධ්‍ය ජාල තහනම් කිරීමට කිසිවෙකුටත් වුවමනා නැහැ. නමුත් මේ අංශ පිළිබඳව අධීක්ෂවණය කරන, ක්‍රියා කරන මාර්ගයක් තිබිය යුතුයි. අප මීට පෙරත් ෆේස්බුක් සමාගමට මේ පිළිබඳව දැන්වූ විට සීඝ්‍රයෙන් ක්‍රියා කළේ නැහැ.

සමහර රටවල එලෙස ක්‍රියාත්මක වී තිබෙනවා. මේ පිළිබඳව සාකච්ඡා කිරීම සඳහා ෆේස්බුක් ආයතනයේ නියෝජිතයන් හෙට (15) ශ්‍රී ලංකාවට පැමිණෙනවා.

ඊට අමතරව අනෙක් ක්‍රමවේදයන් පිළිබඳව ද අප සාකච්ඡා කරනවා. මෙම ක්‍රමවේද ක්‍රියාත්මක කරන අතරතුර වෛරය, ජාතිවාදය, වර්ගවාදය පතුරවන, ගැටුම් ඇති කරන අයගේ ක්රි‍යා වළක්වන ආකාරය පිළිබඳව සාකච්ඡා කරනවා. ඒ සඳහා යම් ක්‍රමවේදයක් අවශ්‍යයි.“

සියලුම විශ්වවිද්‍යාලවල අනධ්‍යයන ෙස්වකයන් අද දින සිට පූර්ණ වැඩ වර්ජනයකට ඒළඹී ඇති තත්වය නිසා ඔවුන් සමග සාකච්ඡාවකට යාමට මුදල් අමාත්‍යංශය අද (16) තීන්දු කර ඇත.

වැටුප් වැඩිකිරීමක් අැතුලුව ඉදිරිපත්කරන ඉල්ලීම් ඉටුකරන්නට ඔවුන් පසුගිය පෙබරවාරි 28 වැනිදා සිට වෘත්තිය ක්‍රියාමාර්ග ගත් නමුත් කිසිදු රාජ්‍ය බලධාරියකු එය ගණකට නොගත් නමුත් ඊයේ සිට පූර්ණ වැඩ නැවැත්වීමකට යාමට ඔවුහු තීන්දු කළහ. එම තත්වය තුළ විශ්වවිද්‍යාල පද්ධතියම අකර්මණ්‍ය වනවා මෙන්ම නැවත විශ්වවිද්‍යාල කටයුතු ආරම්භ කිරීමදෙී විශාල අමතර කාලයක් හා වැයක් දරමින් විශ්වවිද්‍යාල පරිශ්‍ර යථාවත්කරන්නට සිදුවනු ඇත. මේ තත්වය නිසාම මෙතෙක් කිසිදු අවධානයක් නොදුන් අනධ්‍යන සේවක අරගලය සම්බන්ධ අවධානයක් දී සාකච්ඡා කරන්නට බලධාරිහු තීරණය කර ඇත.

මේ වනවිට ටෙන්ඩර් කැඳවමින් කටුනායක ගුවන් තොටුපළේ එක් එක් ආයතන පුද්ගලික අංශය වෙත පවරමිත් තිබෙන බව වාර්තා වේ.

මීට පෙර ගුවන්තොටුපළට අයත්ව තිබූ ඉන්ධන පිරවුම්හල අබාන්ස් සමාගමට පැවරූ අතර මේ වනවිට ගුවන්තොටුපළට අයත් රථගාල් තුනද පුද්ගලික අංශයට පැවරීම සඳහා ටෙන්ඩර් කැඳවා ඇති බව වාර්තා වේ.

ඒ අනුව ඉදිරියේදී ගුවන් තොටුපළ රථගාල් තුනද පුද්ගලික අංශය විසින් පාලනය කරනු ලැබේ.

දැනට එම රථගාල් තුන පාලනය කරන සේවකයන් ඉදිරියේදී කාර්යාල කටයුතු සඳහා අනියුක්ත කිරීමට නියමිත අතර එහි කටයුතු සඳහා පුද්ගලික අංශය මගින් සේවකයන් යොදවනු ඇත.

රථගාලේ පාලන කටයුතු භාරව සිටි සේවකයන් කාර්යාල කටයුතු සඳහා අනියුක්ත කිරීමෙන් පසු ඇතිවන අතිරික්තය මගහරවා ගැනීම සඳහා සේවා කාලය අවසන් වී සේවකයන් විශ්‍රාමයන පිළිවෙල අනුව ඒ ඒ ස්ථාන වෙත අනියුක්ත කිරීමට සැලසුම් කර ඇති අතර මේ හේතුවෙන් කලක් යනතුරු ගුවන්තොටුපළ නව බඳවා ගැනීම්ද නතර වේ.

ගුවන්තොටුපළ සේවකයන් සඳහන් කරන්නේ ඉදිරියේදී ගුවන්තොටුපළට අයති තවත් අංශ කිහිපයක්ම පුද්ගලික අංශට විකුනාදැමීම සඳහා මේ වනවිටත් අදාළ පිඹුරුපත් සැකසෙමින් තිබෙන බවයි.

පුංචි ඡන්දයෙන් පසුව ආණ්ඩුවේ උද්ගත වූ අර්බුදය ඉදිරියට ගමන් කරමින් ඇත්තේ ඔඩු දුවමිනි. අගමැති වෙනස් කිරීම, කැබිනට් සංශෝධනය වැනි පැළැස්තර යෝජනා වුවද ඉන් තවමත් ප්‍රතිඵලයක් ලැබි නැත්තේය.
පළාත් පාලන මැතිවරණය අවසන් වූ වහාම ආරම්භ වූ කැබිනට් මණ්ඩල සංශෝධනය පිළිබඳ කතා බහට පසුගිය සති දෙකේම අත්වී තිබුණේද බාලගිරි දෝශයයි. කැබිනට් මණ්ඩලය දිවුරුම් දීම දිනෙන් දින කල් ගියේ අගමැති ධුරය වෙනස් කිරීමට ජනාධිපති මෛත්‍රීපාල සිරිසේනට තිබූ වුවමනාව නිසාය. එයට කරු ජයසූරිය කථානායකවරයා මුලින් එකඟත්වය පළ කර තිබුණත් පසුව අගමැති ධුරය ඔහු ගැනීම ප්‍රතික්ෂේප කිරීම නිසා පසුගිය සතිය ආරම්භ වන විටත් තිබුණේ කැබිනට් මණ්ඩල සංශෝධනය ගැන එකඟත්වයකින් තොරවය.

මේ අතරේ පසුගිය බ්‍රහස්පතින්දා සවස වන විට එක්සත් ජාතික පක්ෂයේ නියෝජිතයෝ ජනපති මෛත්‍රී හමුවී එක්සත් ජාතික පක්ෂයට අදාළ ඇමැති ධුර සංශෝධනයන්ට අදාළ අවසන් ‍ලේඛනය ඔහුට භාර දුන්හ. මේ ‍ලේඛනය සකස් කරන විට ඇතැම් ඇමැතිවරුන්ගේ බලතල ඉවත්වීමට නියමිතව තිබුණි. තවත් සමහරුන්ගේ ඇමැති ධුර සංශෝධනය වීමට නියමිතව තිබුණි. එක්සත් ජාතික පක්ෂය තුළද මේ සම්බන්ධයෙන් තිබුණේ යම් යම් අර්බුදකාරී තත්ත්වයකි.
අධිකරණ හා විදේශ රැකියා අමාත්‍ය ධුරය තලතා අතුකෝරළගෙන් විදේශ රැකියා ඇමැති ධුරය ඉවත් කර හරීන් ප්‍රනාන්දුට දීමටත්, රවීන්ද්‍ර සමරවීරට කැබිනට් ඇමැති ධුරයක් දීමත්, අජිත් පී. පෙරේරාට හා හර්ෂ ද සිල්වාට රාජ්‍ය ඇමැති ධුර දීමටත් රනිල්ගේ පාර්ශ්වයෙන් යෝජනා වී තිබුණේය. තලතාගෙන් සහ ගාමිණී ජයවික්‍රම පෙරේරාගෙන් ඇමැති ධුර ඉවත් කිරීම ගැන ඔවුන් වැඩි සතුටකින් සිටියේ නැත. විශේෂයෙන් තලතා අතුකෝරළ ඉකුත් කාලයේ පෙනී සිටියේ පක්ෂ නායකත්වයේ වෙනසක් වෙනුවෙනි. ඇය මෙන්ම ඇගේ සොයුරා වූ ගාමිණී අතුකෝරළද එකල සිටියේ එම මතයේය. මේ නිසා අගමැතිවරයා අතුකෝරළලාට
කැබිනට් සංශෝධනයේදී අඩු සැලකිල්ලක් දැක් වූ බව කතා බහට ලක් විය. තලතා ඒ ගැන ප්‍රසිද්ධියේ කතා නොකළත් ගාමිණී ජයවික්‍රම ප්‍රසිද්ධියේ විරෝධය පළ කළේය. කෙසේ වෙතත් පසුගිය සිකුරාදා සවස් වන විටත් කැබිනට් මණ්ඩල සංශෝධනය වන දිනයක් ගැන පැහැදිලි අදහසක් තිබුණේ නැත. ඒ නමුත් සිකුරාදා රාත්‍රියේදී ඇතැම් ඇමැතිවරුන්ට ජනාධිපති ‍ලේකම් කාර්යාලයෙන් දුරකථන ඇමතුම් ලැබුණ අතර එම ඇමතුම්වලින් කියවුණේ ඉරිදා දිනයේදී කැබිනට් මණ්ඩලය සංශෝධනය වන බවත් එයට පැමිණෙන ලෙසත්ය.

එහෙත් ඇතැම් ඇමැතිවරුන්ට කැබිනට් මණ්ඩල සංශෝධනය සිදුවන අවස්ථාවට පැමිණෙන ලෙස දැනුම්දී තිබුණේ නැත. ඒ අතර පාලිත රංගෙ බණ්ඩාර රාජ්‍ය ඇමැතිවරයාද විය. අනෙක් ඇමැතිවරු කැබිනට් සංශෝධනයට සහභාගී වීමට ජනාධිපති ‍ලේකම් කාර්යාලයට යන විට පාලිත රංගෙ බණ්ඩාර සිටියේ පුත්තලමේය. ඒ වන විට ඔහුගේ මෑණියන් අසනීපව පුත්තලම රෝහලට ඇතුළත් කර තිබුණි. ඔහු සිය මෑණියන්ගේ සුව දුක් විමසීමට රෝහලට ගිය විට එතැන මාධ්‍යවේදීහු කණ්ඩායමක් සිටියෝය.
“මොකද ඇමැතිතුමා අද කැබිනට් සංශෝධනයට යන්නේ නැද්ද?” මාධ්‍යවේදීහු විමසූහ.
“පුත්තලමේ ඉන්නේ පුත්තලම් බූරුවෝ කියලා කියනවානේ. එහෙම හිතාගෙනද කොහෙද අපිට කැබිනට් මණ්ඩල සංශෝධනයට එන්න කියලා නැහැ” පාලිත රංගෙ බණ්ඩාර කීවේ එක්සත් ජාතික පක්ෂ නායකත්වය ගැන කලකිරීමෙන් යුතුවය.

නීතිය හා සාමය රනිල් ගත් හැටි

මේ අතර ජනාධිපති ‍ලේකම් කාර්යාලයේ කැබිනට් මණ්ඩල සංශෝධනයට අදාළ අවසන් ‍ලේඛන සකස් කෙරෙමින් තිබුණි. ඒ අතර නීතිය හා සාමය අමාත්‍යාංශය වෙනස් කිරීමට අදාළ සාකච්ඡා නැවත නැවතත් සිදුවෙමින් තිබුණේය.
“අපි මේ අමාත්‍යාංශය සරත් ෆොන්සේකාට දෙමු” මෛත්‍රී යෝජනා කර තිබුණේ රනිල්ටමය. එහෙත් ඒ වන විට සරත් ෆොන්සේකා සිටියේ ඉන්දුනීසියාවේ නිල සංචාරයක නිරත වෙමිනි.
“සරත් ෆොන්සේකා ලංකාවේ නැහැ. එක්සත් ජාතික පක්ෂයේ වෙන කෙනෙක් නීතිය හා සාමය අමාත්‍යාංශය ගන්න කැමැති නැහැ. ඒ නිසා මම තාවකාලිකව ඇමැති ධුරය අරගන්නම්. ෆොන්සේකා ආවම අමාත්‍යාංශය දෙමු” රනිල් යෝජනා කළේය. මෛත්‍රීත් එම යෝජනාවට කැමැත්ත දැක්වූවේය.

රනිල් ජනපති ඉදිරියේ නීතිය හා සාමය පිළිබඳ ඇමැතිවරයා ලෙස දිවුරුම් දීමෙන් පසුව හැරුණේ රාජිත සේනාරත්න ඇමැතිවරයා දෙසටය. රාජිත දෙසට හැරුණ ඔහු මහපට ඇඟිල්ල දිගුකර පෙන්වූවේය. රාජිතත් මහපට ඇඟිල්ල දිගුකරමින් රනිල්ට සිය සතුට පළ කළේය.

“සරත් ෆොන්සේකාට නීතිය හා සාමය අමාත්‍යාංශය දෙන්න බැරිවුණොත් ඒක දිගටම ඔබතුමා ළඟ තියාගන්න. අපි දූෂණ වංචා පිළිබඳ තියෙන විමර්ශන දිගටම කරගෙන යමු” රාජිත රනිල්ට සුබ පතමින් පැවැසුවේය.
අජිත් පී. පෙරේරාට රාජ්‍ය ඇමැති ධුරයක් ලැබිමෙන් පසුව ඔහුගේ සහෝදර ඇමැතිවරු ඔහු
ළගට පැමිණ සුබ පතන්න විය.

“ඒ ගොනා දැන් විකුණලා තියෙන්නේ. මට මේ අමාත්‍යාංශයේ කරන්න පුළුවන් දෙයක් නෑ. නියෝජ්‍ය ඇමැතිවෙලා හරි විදුලි බල අමාත්‍යාංශයේ හිටියා නම් මට වැඩ කරන්න තිබුණා. මම ඒකේදී රස්සා කීයක් නම් දුන්නාද” අජිත් පී. පෙරේරා කීවේ තමන්ට ලැබුණ අමාත්‍යාංශය ගැන සතුටකින් නොවේ.

එක්සත් ජාතික පක්ෂයේ ඇතැම් ඇමැතිවරු ජනාධිපති ‍ලේකම් කාර්යාලයෙන් එළියට ආවේ කැබිනට් මණ්ඩල සංශෝධනය ගැන එතරම් සතුටකින් නොවේ.
“ආණ්ඩුවේ කොමඩියේ පළමු

කොටස අද ඉවර වුණා. මේ කොමඩිය දැකලා ජනතාව හිනාවේවිද අඬාවිද, නැතිනම් ගල් ගහවිද කියලා කියන්න මම දන්නේ නෑ” ඩී. ඇස්. සේනානායකගේ මී මුනුපුරා වූ රනිල්ගේ ඥාති සොහොයුරු වසන්ත සේනානායක රාජ්‍ය ඇමැතිවරයා ජනාධිපති ‍ලේකම් කාර්යාලයෙන් එළියට පැමිණියේ එසේ කියමිනි.
“ඒ කියන්නේ අගමැති ධුරයේ වෙනසක් වෙන්න ඕන කියන එකද ඔබතුමා කියන්නේ” එතැන සිටි මාධ්‍යවේදීහු විමසූහ.
“මගේ කටට වචනය දීලා අහන්න එපා. හොඳින්් හරි නරකින් හරි අගමැති ධුරයේ වෙනසක් කරනවා” වසන්ත සේනානායක එතැනින් පිටත්ව ගියේ තදින් කතා කරමිනි. කැබිනට් සංශෝධනයෙන් පසු නීතිය හා සාමය ඇමැතිකම නැති වුණත් සාගල රත්නායක අගමැති සමග ‍පොලිස් විශේෂ කාර්ය බළකායේ උත්සවයකට සහභාගි වීමට ගිය සතියේ කළුතරට ගියේය. ඔහු එසේ ගොස් තිබුණේ උත්සවයට සහභාගි වීමට ආරාධනාව ලැබුණේ ඇමැතිකම නැතිවීමට පෙර නිසාය.

එක්සත් ජාතික පක්ෂයේ ඇමැතිවරු කැබිනට් මණ්ඩල සංශෝධනයෙන් පසුව ජනාධිපති ‍ලේකම් කාර්යාලයෙන් එළියට පැමිණියත් ශ්‍රී ලංකා නිදහස් පක්ෂයේ ඇමැතිවරු තවදුරටත් ජනාධිපති ‍ලේකම් කාර්යාලයේ රැඳී සිටියහ. ඒ මෛත්‍රී හමුවී සාකච්ඡා කිරීමටය.

“ජනාධිපතිතුමනි, නීතිය හා සාමය ඇමැති ධුරය අගමැතිතුමාට දුන්නේ ඇයි” ඇමැතිවරු විමසූහ.
“නීතිය හා සාමය අමාත්‍යාංශයේ ෆොන්සේකාට දිවුරුම් දෙන්න එන්න කියන්න බැලුවා. ඒත් එයා ලංකාවේ නෑ. එක්සත් ජාතික පක්ෂයේ වෙන කවුරුවත් ඒක ගන්න කැමැති නෑ. ඒ නිසා තාවකාලිකව තමයි අගමැතිතුමාට නීතිය හා සාමය දුන්නේ. සති දෙකකින් ඒක වෙනස් කරනවා. ඒක සරත් ෆොන්සේකාට දෙනවා” මෛත්‍රී කීවේය.
පළාත් පාලන ආයතනවල බලය පිහිටුවීම ගැනත් මෙහිදී මෛත්‍රීගේ අවධානය යොමුවිය.

“සමහර පළාත් පාලන ආයතනවල බලය කිසිම පක්ෂයකට තනිව පිහිටුවන්න බෑ. මේ ආයතනවල බලය පිහිටුවන්න අපි එකතුවෙන්න ඕන. එහෙම එකතුවෙන්නේ කාත් එක්කද කියන එක ගැන ප්‍රශ්නයක් නැහැ. ශ්‍රී ලංකා නිදහස් පක්ෂයට සභාපති ධුරය ලබාදීමට කැමැතිවෙන අය එක්ක එකතුවෙලා සභාව පිහිටුවන්න” මෛත්‍රී උපදෙස් දුන්නේය. ඒ අනුව ශ්‍රී ලංකා නිදහස් පක්ෂයේ පළාත් පාලන ආයතනවල මන්ත්‍රීවරුන්ගේ නම් ගැසට් පත්‍රයේ පළ කිරීමට අවශ්‍ය පියවර ගන්නා ලෙසද මෛත්‍රී උපදෙස් දුන්නේය.

රනිල් වැඩ අල්ලයි

අලුත් අමාත්‍යාංශයේ වැඩ භාරගත් රනිල් නීතිය හා සාමය අමාත්‍යාංශයේ නිලධාරීන් සඳුදා උදෑසනම කැඳවා තිබුණි.
“දූෂණ, වංචා සම්බන්ධයෙන් සිදුවන පරීක්ෂණ වේගවත් කරන්න ඕන. ඒකට අපි කමිටුවක් පත් කරමු” රනිල් යෝජනා කළේය. රාජිත, අජිත් පෙරේරා සහ ඩී.එම්. ස්වාමිනාදන්ගෙන් සමන්විත කමිටුවක් පත් කිරීමට තීරණය කෙරුණේ ඉන් පසුවය.
ඒ අතර දූෂණ වංචාවන්ට අදාළ ලිපි ගොනු අසූවක් එම සාකච්ඡාවට ඉදිරිපත්වී තිබුණේය.
“මේවයින් බොහෝ ඒවා සම්බන්ධ පරීක්ෂණ අවසන්. ඉදිරි කටයුතු සඳහා ඒවා නීතිපති දෙපාර්තමේන්තුවට යවලා තියෙන්නේ” ‍පොලීසියේ නිලධාරීහු පැවැසූහ.
“කෝ නීතිපති දෙපාර්තමේන්තුවෙන් ඇවිත් ඉන්නේ කවුද” රනිල් ඇසූ විට නීතිපති දෙපාර්තමේන්තුවේ නිලධාරීන් එහි සිටියේ නැත. ඒ නිසා රනිල් කීවේ ලබන සතියේ අඟහරුවාදා දිනයේදී නීතිපති දෙපාර්තමේන්තුවේ නිලධාරීන්ද කැඳවා මේ ගැන සාකච්ඡා කළ යුතු බවය.
“මට රාජිත ඇමැතිතුමා එක්ක කතා කරන්න ඕන” කියමින් එම සාකච්ඡාවෙන් පසුව රනිල් රාජිත කැඳවාගෙන ගියේය. ඔවුන් දෙදෙනා සාකච්ඡා කළේ දූෂණ
වංචා සම්බන්ධ ලිපි ‍ලේඛන ගැනය. රනිල් එයට අදාළ ලිපි ගොනු කිහිපයක් රාජිත අතට දුන්නේ තවත් උපදෙස් කිහිපයක්ද දෙමිනි.

මංගල කැබිනට් රැස්වීම

අමාත්‍ය මණ්ඩල සංශෝධනයෙන් පසුව පළමු කැබිනට් රැස්වීම අඟහරුවාදා උදෑසන සුපුරුදු පරිදි ජනාධිපති ‍ලේකම් කාර්යාලයේදී ආරම්භ විය. කැබිනට් පත්‍රිකා සාකච්ඡාවට ගැනීමෙන් පසුව දයා ගමගේ ඇමැතිවරයා කතා කරන්න ගත්තේ අම්පාරේ සිදුවීම ගැනය.
“හරි හරි.. . මම ඒ සේරම දැනගත්තා. මේවා ගැන දීර්ඝව සාකච්ඡා කරන්න ඕන. මේ වගේ දේවල් කරලා ජාතිවාදය අවුස්සන්නනේ හදන්නේ. මේකේ පිටිපස්සේ ඉන්නේ කවුද කියලා මම දන්නවා. ඔය ඒකාබද්ධ විපක්ෂයේ සමහර අය මේවා පස්සේ ඉඳගෙන කරන වැඩ ගැනත් මම දන්නවා” මෛත්‍රී කීවේ තරමක් තදින්ය.
“සර් මේක රජය අපහසුතාවට පත් කරන්න කරපු දෙයක්. අම්පාරේ සිද්ධියෙන් පීඩාවට පත්වූ අයට වන්දි දෙන ක්‍රමයක් හදන්න” රවුෆ් හකීම් ඇමැතිවරයා ඉල්ලා සිටියේය.
“මේ සිද්ධියට සම්බන්ධ සැකකරුවන් හඳුනාගෙන තියෙන්නේ. ඒ නිසා අපිට නීතිය තදින් ක්‍රියාත්මක කරන්න පුළුවන්” මෛත්‍රී කීවේය.
“මේක වෙන වෙලාවේ ‍පොලීසියේ අයත් එතැන ඉඳලා තියෙනවා. ඒත් සේරම වුණාට පස්සේ තමයි ඒ අය මේකට මැදිහත් වෙලා තියෙන්නේ” හකීම් නැවත අදහස් දක්වන්න විය.
“හරි. එහෙනම් ඒ ගැන සොයා බලලා මට වාර්තාවක් දෙන්න” මෛත්‍රී උපදෙස් දුන්නේය.

හැට පැන්න දිසාපතිවරු

“වජිර මොකක්ද මේ දිසාපතිවරුන්ගේ ප්‍රශ්නය” මෛත්‍රී වජිර අබේවර්ධන ඇමැතිවරයාගෙන් ඇසුවේය.
“දිසාපතිවරු කිහිපදෙනෙකුගේ සේවා කාලය දීර්ඝ කරලා තියෙනවා සර්” වජිර කීය.
“අවුරුදු හැට පැනපු දිසාපතිවරු තුන් දෙනෙකුගේ සේවය දීර්ඝ කරපු නිසා පරිපාලන සේවයේ නිලධාරීන්ගෙන් අප්‍රසාදයක් මතුවෙලා තියෙනවා. තරුණ නිලධාරීන්ට දිස්ත්‍රික් ‍ලේකම්වරුන් බවට පත්වීමට තිබෙන අවස්ථාව මේ නිසා නැතිවෙලා තියෙනවා” මෛත්‍රී කීවේ පරිපාලන නිලධාරීන්ගෙන් ඔහුට ලැබුණ පැමිණිල්ලක් සිහිපත් කරමින්ය.
“මේ දිසාපතිවරුන්ට සේවා දිගුවක් දුන්නේ පළාත් පාලන මැතිවරණය නිසා. නැවත මේ අයට සේවා දිගුවක් දෙන්නේ නෑ” වජිර සහතික විය.
“නියමිත කාලයට විශ්‍රාම යන අයට විශ්‍රාම යන්න දෙන්න. අනිවාර්යයෙන් ඒ අය යවන්න. ග්‍රාම නිලධාරීන් ඇතුළු රජයේ නිලධාරීන්ට මේ නීතිය අකුරටම ක්‍රියාත්මක කරන්න. එතකොට තමයි තරුණ අයට අවස්ථාවක් ලැබෙන්නේ. මේක ප්‍රතිපත්තියක් විදියට ක්‍රියාත්මක කරන්න” මෛත්‍රී අවධාරණය කළේය.

චීන කඩ කැබිනෙට්ටුවට

මේ සතියේ කැබිනට් මණ්ඩලයේදී රනිල්ගේ ප්‍රධානත්වයෙන් යුත් ආර්ථික කළමනාකරණ කමිටුව ගැන වැඩි අවධානයක් යොමුවිය. එම කමිටුවේ සාමාජිකයන් බහුතරය වූයේ අගමැතිවරයාගේ සමීපතමයේ මිතුරන් වන චරිත රත්වත්තේ, මලික් සමරවික්‍රම, ආර්. පාස්කරලිංගම්ය. මුදල් අමාත්‍යාංශයේ ‍ලේකම්ද ඇමැති සරත් අමුණුගම සෙසු සාමාජිකයන්ද වූහ.
“ටයර් කර්මාන්තශාලාවක් හොරණ පැත්තේ ආරම්භ කළා. ඒත් ඒ කර්මාන්තශාලාව තියෙන්නේ කර්මාන්තපුරය ඇතුළේ නමෛයි. එකෙන් පිට. කිසිම අවසරයක් නැතිව එතැන ඉදිකිරීම් කරනවා. කුරුණෑගල පැත්තේ වොක්ස් වැගන් කර්මාන්තශාලාවක් ආරම්භ කිරීමට අගමැතිතුමා එක්ක මමත් ගිහින් මුල් ගල් තිව්වා. මේ කර්මාන්තශාලාවට අපේ කිසිම සම්බන්ධයක් නැහැ කියලා වොක්ස් වැගන් සමාගම පස්සේ කිව්වා” මෛත්‍රී කීවේ පසුගිය කාලයේදී රනිල්ගේ ආර්ථික කමිටුව හරහා ආරම්භ කළ කර්මාන්ත ශාලා ගැන අප්‍රසාදයකින් යුතුවය.
“වොක්ස් වැගන් කර්මාන්තශාලාව ආරම්භ කිරීමේ ගිවිසුමේ ප්‍රශ්න තිබුණා. ඒත් ඒ සමාගමේ කොටස් හිමියන් තමයි මේ කර්මාන්තශාලාව ආරම්භ කරන්නේ. මේ කර්මාන්තශාලාව කුලියාපිටියේ හැදෙනවා” රනිල් මෛත්‍රීට උත්තර දුන්නේය.

“මේ වගේ සංවර්ධන ව්‍යාපෘති ආර්ථික කළමනාකරණ කමිටුවට දැම්මම එතැන ලොකු ප්‍රමාදයක් ඇතිවෙනවා. සියලුම ව්‍යාපෘති වෙන අයට දෙන්න එපා. කැබිනට් ඇමැතිවරුන්ට මේ සියලුම ව්‍යාපෘති දෙන්න. වෙන අය ගැන විශ්වාසය තියනවාට වඩා කැබිනට් ඇමැතිවරු ගැන විශ්වාසය තියන්න. මාත් ජනාධිපතිවරු කීප දෙනෙක් එක්ක වැඩ කරලා තියෙනවා. ඒත් මේ වගේ කමිටුවක් එක්ක වැඩ කළේ පළමු වතාවටයි” මෛත්‍රී රනිල්ගේ හිතවතුන්ගෙන් යුත් ආර්ථික කළමනාකරණ කමිටුවට දැඩි පහරක් එල්ල කළේය.

“ප්‍රේමදාස ජනාධිපතිතුමාගේ කාලයේ, චන්ද්‍රිකා ජනාධිපතිනියගේ කාලයේදීත් මේ වගේ කමිටු පත් කරලා තිබුණා” රනිල් පැවැසුවේය.
“මම ඉදිරිපත් කරපු සංවර්ධන ව්‍යාපෘති අසූවක් විතර මේ කමිටුවේ හිරවෙලා තියෙනවා. ඒවා 2015 අවුරුද්දේ ඉඳලා ඉදිරිපත් කරපු ඒවා” රාජිත මෛත්‍රී වෙනුවෙන් පෙනී සිටියේය.
“මේ වගේ කමිටුවක් තියෙන එක ඉතාම හොඳයි” මංගල රනිල් වෙනුවෙන් පෙනී සිටියේය.
“දැන් රටේ හැමතැනම චීන කඩ හැදෙනවා. ලබන සතියේදී සුගතදාස එකට මේ කඩ හිමියෝ කැඳවලා රැස්වීමකුත් තියන්න යනවා” මෛත්‍රී තමන්ට ලැබුණ තොරතුරක් පැවැසුවේය.
“චීන කඩ 2001 අවුරුද්දේ ඉඳලා ආරම්භ වුණේ පනතක් අනුවයි. ඒවායේ තියෙන මිල ගණනුත් මම ඉදිරිපත් කරන්නම්. ඒත් තැන් තැන්වල තියෙන චීන කඩ ගැන නම් සොයා බලන්න ඕන” රනිල් කීවේය.
“කොළඹ නුවර තමයි මේවා වැඩියෙන්ම තියෙන්නෙ. මේවා පෙන්නලා රාජපක්ෂවරු වාසි ගන්න හදනවා.” මෛත්‍රී කීය.
“අපිට මහ මැතිවරණයකට තියෙන්නේ තවත් අවුරුදු එකහමාරක් විතරයි. ඒ නිසා ඒ කාලය ඇතුළත කරන්න පුළුවන් වැඩ කොටස් තීරණය කරලා ඒවා කරමු” පාඨලී චම්පික රණවක ඇමැතිවරයා කතාව වෙනතකට යොමු කළේය.
“අපි පහුගිය කාලයේදී වැරදි තීරණ ගත්තා. එක්සත් ජාතික පක්ෂයට උදව් කරන කුකුළු ගොවියෝ පවා ආණ්ඩුවට විරුද්ධව වැඩ කළේ. ඒ කුකුළු ගොවියන් සම්බන්ධයෙන් ගනිපු වැරදි තීරණ නිසයි” ඇමැතිවරු පැවැසූහ.
“ඒකත් ඉතිං ආර්ථික කමිටුව ගනිපු තීරණයක් නේ” මෛත්‍රී කීවේ උපහාසාත්මක සිනහවක් මුවට නංවාගනිමිනි.
“එහෙම කියන එක වැරදියි ජනාධිපතිතුමා. මේ තීන්දුව ගත්තේ කැබිනට් මණ්ඩලයෙන්” රනිල් ආර්ථික කමිටුව නිදහස් කිරීමට උත්සාහ ගත්තේය.
“මේක තාවකාලික තීරණයක් ජනාධිපතිතුමා” පී. හැරිසන් ඇමැතිවරයාද කතාවට එක්විය.
“කොහොම නමුත් චීන කඩකාරයෝ කොළඹට ගේන එක අපිට අවාසියි. කොහොම වුණත් හිටපු මුදල් ඇමැතිතුමාට පින් සිද්ධවෙන්න සුළු ව්‍යාපාරිකයෝත් අපිත් එක්ක තරහා වුණානේ” මෛත්‍රී කීවේ ආර්ථික කමිටුව හා හිටපු මුදල් ඇමැතිවරයා ගැන ඔහුගේ ඇති අප්‍රසාදය යළිත් පෙන්වමිනි.

මේ අතරේ හිටපු මුදල් ඇමැති රවි කරුණානායකද සටන අතහරින පාටක් නැත. ඔහු ගිය සතියේ ප්‍රසිද්ධියේම චෝදනා කළේ එජාප ජාතික ලැයිස්තුවෙන් පත් ඇමැතිවරු දෙදෙනෙක් පක්ෂය
විනාශ කරන බවය. ඔහු මේ චෝදනාව කර තිබුණේ රනිල්ගේ හිතවතුන් දෙදෙනකු වන මලික් සමරවික්‍රම හා තිලක් මාරපන ඉලක්ක කර ගෙන බව සඳහන්ය.

පාලිත ‍පොලීසියට?

කැබිනට් මණ්ඩල සංශෝධනයෙන් පසුව සාගල රත්නායකට ලැබුණේ රනිල් යටතේ මතෛක් පැවැති යෞවන කටයුතු ඇමැතිකමය. නීතිය හා සාමය ඔහුට දැන් නැති වුණත් සාගල ඇමැතිවරයා කටුකුරුන්දේ ‍පොලිස් අභ්‍යාස විද්‍යාලයට ගියේය. ඒ රනිල් සමගය. ‍පොලිස් අභ්‍යාස විද්‍යාලයේ පුහුණුව ලැබූ ‍පොලිස් විශේෂ කාර්ය බළකායේ නිලධාරීන් විසිරයාම වෙනුවෙන් පැවැති උත්සවයේ ප්‍රධාන ආරාධිතයා වී තිබුණේ රනිල්ය. සාගල එහි ගොස් තිබුණේ නීතිය හා සාමය ඇමැති ධුරය දැරූ කාලයේ ඔහුට ලද ආරාධනාවට අනුවය.
“සාගල ඇමැතිතුමා ‍පොලීසිය භාරව කටයුතු කරන කාලයේදී ‍පොලිස් සේවයේ ගුණාත්මකභාවය වැඩි කිරීමට වැඩ කළා” රනිල් සාගල ‍පොලීසිය භාරව කටයුතු කළ කාලයේදී කළ දේ අගය කළේය.
රනිල් උත්සවය අවසන් වන තෙක් රැඳී නොසිටියත් සාගල උත්සවය අවසන් වන තෙක් එහි සිටියේය. රනිල් සභාවෙන් පිටත්ව ගිය පසු අංගම්‍පොර සංදර්ශනයක්ද සංවිධානය කර තිබුණේය. සාගල එය නැරඹුවේ ‍පොලිස්පතිවරයා එක් පැත්තකින් සහ පාලිත තෙවරප්පෙරුම නියෝජ්‍ය ඇමැතිවරයා තවත් පැත්තකින් තබාගෙනය.
“ඔයා මේ කිට්ටුවනේ. ඉඩ තියෙන වෙලාවට මේ පැත්තට ඇවිත් යන්න” සාගල කීවේ පාලිත තෙවරප්පෙරුම දෙස බලාගෙනය.
“ඒ මොකටද සර්” පාලිත තෙවරප්පෙරුමත් පුදුමයෙන් මෙන් සාගල දෙස බැලුවේය.
“නෑ. ඔයා මෙහේ ඇවිත් කැරලි මර්දනය කරන හැටි ගැන කියලා දෙන්න. දවස් පහක් තිස්සේ ඔයා කරපු කැරැල්ල මර්දනය කරන්න ‍පොලිස් දෙපාර්තමේන්තුවටම බැරි වුණානේ” සාගල කීවේ පාලිත තේවරප්පෙරුම කළ උපවාසය සිහිපත් කරමිනි.
“ඒක නමෛයි ඔයාට අංගම්‍පොර පුළුවන්ද” සාගල ඇසුවේය.
“ඔව්. මට අංගම්‍පොර පුළුවන්. කරාටේ පුළුවන්. ජූඩෝ පුළුවන්. වෙඩි තියන්න පුළුවන්. ඕන තැනක වාහනයක් ඩ්‍රයිවිං කරන් යන්න පුළුවන්” පාලිත කීවේය.

පාලිතගේ කැරැල්ල

කැබිනට් මණ්ඩලය තුළ රනිල්ගේ ආර්ථික කමිටුවට විරෝධය පළ වන විට එක්සත් ජාතික පක්ෂය තුළින් රනිල්ට විරෝධය යළිත් මතුවන්නට පටන් ගෙන තිබුණි. පළාත් පාලන මැතිවරණයෙන් පසුව විටින් විට මතුවී ආ විරෝධයන් යළිත් වර්ධනය වන්නට ගත්තේ කැබිනට් මණ්ඩල සංශෝධනයෙන් පසුවය. පාලිත රංගෙ බණ්ඩාර රාජ්‍ය ඇමැතිවරයා මේ විරෝධයන් සමග එක්ව සිටියේය.
පාලිත රංගෙ බණ්ඩාර ඇතුළු කණ්ඩායමක් රනිල්ට විරුද්ධව විශ්වාසභංග යෝජනාවක් සකස් කිරීමට කටයුතු කළේ ඒ අනුවය. නාරාහේන්පිට පිහිටි උලපනේ සුමංගල හිමියන්ගේ විහාරස්ථානයේදී විශ්වාසභංගය සකස් කළ අතර එයට අත්සන් ලබාගැනීමට තවත් මෙහෙයුමක් ආරම්භ කළේය.
පාලිත රංගෙ බණ්ඩාර ඇතුළු කණ්ඩායමේ සැලසුම වී තිබුණේ එක්සත් ජාතික පක්ෂ මන්ත්‍රීවරුන්ගේ පමණක් අත්සන් ලබාගෙන එය කථානායකවරයා වෙත භාරදීමටය. පසුව ශ්‍රී ලංකා නිදහස් පක්ෂ ඇමැතිවරුන්ගේ සහාය ලබාගැනීම ඔවුන්ගේ බලා‍පොරොත්තුව විය.
පසුගිය සති අන්තය වන විට රනිල් සිංගප්පුරුව බලා පිටත්ව ගොස් සිටි තිබුණු විශ්වාසභංග යෝජනාව යළිත් වරක් යට ගියේය. විශ්වාසභංගයට පෙරමුණ ගත් පාලිත රංගෙ බණ්ඩාර ගැනද ගිය සතිය පුරාම ආරංචියක් නොවීය.

මහින්දගෙන් ජය පැන් සාද

පළාත් පාලන මැතිවරණයේ ජයග්‍රහණය සැමරීමට ඒකාබද්ධ විපක්ෂයේ සියලුම මන්ත්‍රීවරුන්ට හා ඔවුන්ගේ පවුල්වල සාමාජිකයන්ට විශේෂ සාදයක් පසුගිය සතියේදී පැවැත්වුණේ මහින්දගේ විජේරාම නිවසේදීය. පාර්ලිමේන්තු මන්ත්‍රීවරුන්ට රාත්‍රී භෝජන සංග්‍රහයක් පැවැත්වීමට පෙර වට දෙකකින් පළාත් පාලන නියෝජිතයන්ට හා පළාත් සභා මන්ත්‍රීවරුන්ට රාත්‍රී භෝජන සංග්‍රහයක් සංවිධානය කර තිබුණි.
ඒකාබද්ධ විපක්ෂයේ සියලු දෙනාම පැමිණ සිටි එම සාදය ආරම්භ වූයේ සවස හයයි තිහට පමණය. සාදයේදී මේසයෙන් මේසයට ගිය මහින්ද ඔවුන් සමග සුහදව කතා කිරීමට අමතක කළේ නැත.
“අපේ ජයග්‍රහණයට සෘජුවම සම්බන්ධ වුණ මන්ත්‍රීවරුන්ට වගේම ඔවුන්ගේ පවුල්වල අයටත් ස්තුති කරන්න ඕන. මොකද මන්ත්‍රීවරු ඡන්දෙ කරනකොට ඔයාල තමයි ගෙදර ඉඳගෙන ඒකට ශක්තියක් දුන්නේ. අපිට මේ මැතිවරණයේදී වගේම ඉදිරියේදී එන මැතිවරණවලදීත් ඔයාලගේ සහාය ඕන වෙනවා. එහෙම වුණොත් තමයි අපි ලොකු ජයග්‍රහණයකට යන්න පුළුවන් වෙන්නේ” මහින්ද කීවේය.
ආණ්ඩුවේ සිට ඒකාබද්ධ විපක්ෂයට එක්වූ නිමල් ලන්සා, අරුන්දික ප්‍රනාන්දු, පියංකර ජයරත්න, ඩුලිප් විජේසේකර වාඩිවී සිටියේ එකම මේසයකය.
“මොකද මේ අය එකට වාඩිවෙලා. කොහොම වුණත් ඔයාල හොඳ වෙලාවට තමයි ඡන්දයට කලින් ආවේ” මහින්ද ඔවුන් සිටි තැනට පැමිණියේ විහිළුවක්ද කරමිනි.
“අපිත් කොහොම හරි ‍පොහොට්ටුවේ කොටස්කාරයෝ වුණානේ” ලන්සා කීවේය.
“ඔයාලට නම් මොළේ පෑදුණා. ඒත් කවදද ආණ්ඩුවේ ඉන්න අනික් අයට මොළේ පෑදෙන්නේ”මහින්ද ඇසුවේය.
“සමහරුන්ට නම් කවදාවත් මොළේ පෑදෙන එකක් නෑ සර්” පියංකර කීවේත් විහිළුවෙන්මය.
“මිනිස්සු මේ පාර රතු එළියක් දැල්ලුවා. ඊළඟ මැතිවරණයේදී එයාලට ගෙදර යන්න ටිකට් එක ලැබේවි. ඊට පස්සේ ඉතිං මේ රටේ දේශපාලනය කරන්න ලැබෙන එකක් නෑ. කුඹුරක් කොටාගෙන ඉන්න තමයි වෙන්නේ” පවිත්‍රා කීවාය.
සාදය ආරම්භවී පැය තුනක් පමණ යන තෙක් මහින්ද මන්ත්‍රීවරු සමග ගත කළේය. රාත්‍රී නමයට පමණ වාදක මඩුල්ලක් විසින් සංගීත ප්‍රසංගයක් ද පැවැත්වුවේය. එහිදී මුලින්ම ගීත ගායනා කිරීමට පැමිණියේ විමල් වීරවංශ මන්ත්‍රීවරයාය. ගුණදාස කපුගේගේ දවසක් පැල නැති හේනේ ගීතයෙන් ආරම්භ කළ විමල් එක දිගට ගීත දහයක් පමණ ගැයුවේය. විමල් ගීත ගායනා කිරීම අවසන් කළේ ඔහුගේ දියණිය සමග දම්පාටින් ලා සඳ බැසයනවා ගීතය ගායනා කරමිනි.
මේ වන විට පියල් නිශාන්ත මන්ත්‍රීවරයාත් සංගීත කණ්ඩායම අසලට ගොස් සිටියේ ගීතයක් ගායනා කිරීමටය. එහෙත් විමල් මයික්‍ර‍පෝනය අතහරින පාටක් පෙනෙන්න තිබුණේ නැත. ගීත ගායනා කිරීමට ගිය පියල්ට සිදුවූයේ බොංගෝවක් වාදනය කරමින් විමල්ට සහාය දීමටය. විමල් මයික්‍ර‍පෝනය අතහැරීමෙන් පසුව පියල් සුපුරුදු පරිදි කුණ්ඩුමනී ගීතය ගැයුවේය. ඔහු කුණ්ඩුමනී ගීතය ගායනා කරන විට පවිත්‍රාත් කාංචනත් වේදිකාව අසලට වී නර්තනයක යෙදුනේය. එහෙත් සැමගේ සිත් ගත්තේ සාදය ආරම්භයේ සිට ප්‍රසන්න රණවීර මන්ත්‍රීවරයා නැටු නන්ස්ටොප් නැටුමය.
වෙනදාට මෙවැනි සාදවල ඉදිරියෙන්ම සිටින ප්‍රසන්න රණතුංග මන්ත්‍රීවරයා සාදයට පැමිණ සිටියේ නැත.
“මොකද ප්‍රසන්න ආවේ නැත්තේ” මහින්ද ප්‍රසන්නට දුරකථන ඇමතුමක් ගෙන ඇසුවේය.
“නෑ සර් මට මේ දේශපාලන සංවාදයකට යන්න වෙලානේ” පෞද්ගලික රූපවාහිනි නාලිකාවක පැවැති සංවාදයකට යාමට සිදුවූ බව ප්‍රසන්න කීවේය.
“‍පොඩි වෙලාවකට හරි මෙතැනට ඇවිත් ගියා නම් හරිනේ” මහින්ද කීවේය.
“ඒක ඇත්ත සර්. ඒ වුණාට මේවාට නිකම්ම ගිහිල්ලත් බෑනේ” ප්‍රසන්න කීවේය.

මහින්ද තිරුපති යයි

මහින්ද හදිසියේම පසුගිය සතියේදී තිරුපති බලා පිටත්ව ගියේය. ඒ ලොහාන් රත්වත්තේ ඇතුළු මහින්දගේ හිතවතුන් කණ්ඩායමක් සමගය. තිරුපති කෝවි‍ලේ පැවැත්වෙන විශේෂ පූජාවකට සහභාගීවීමට ඔහු මෙසේ තිරුපති බලා පිටත්ව ගියේය.
තිරුපති ගොස් පැමිණෙන මහින්ද නුගේගොඩ පැවැත්වෙන රැස්වීමට එක්වීමට සූදානමින් සිටි. මහ මැතිවරණයක් ඉල්ලා ඒකාබද්ධ විපක්ෂය සංවිධානය කරන ජනරැලි මාලාවේ පළමු ජන රැලිය මෙසේ පැවැත්වීමට නියමිතව ඇත. බැසිල්ගේ ප්‍රධානත්වයෙන් මේ ගැන සාකච්ඡාවක් නෙළුම් මාවතේ පිහිටි කාර්යාලයේදී පැවැත්වුණේය.
“පළාත් පාලන මැතිවරණයෙන් පස්සේ ඒකාබද්ධ විපක්ෂය සංවිධානය කරන පළමු ජාතික රැලිය මේක. ඒක නිසා ජනවරම ප්‍රදර්ශනය වෙන විදියට මේ රැලිය තියන්න ඕන” බැසිල් කීවේය.

රනිල්ට විරුද්ධ විශ්වාස භංග යෝජනාව සකස් කර තිබුණත් එයට අත්සන් තැබූ අයගේ ‍ලේඛනය තවම එළියට පැමිණියේ නැත. තමන්ට විරුද්ධව විශ්වාසභංග යෝජනාවක් ඉදිරිපත් වෙමින් තිබියදීත් රනිල් සුපුරුදු පරිදි සැහැල්ලුවෙන් අරලියගහ මන්දිරයට පැමිණියේ සිය රාජකාරී කටයුතු සඳහාය. සුපුරුදු පරිදි බ්‍රහස්පතින්දා දිනයේදී අරලියගහ මන්දිරයට පැමිණියේ තමන්ට හිතවත් ඇමැතිවරු කිහිපදෙනෙක් හමුවීමටය.
“එක්සත් ජාතික පක්ෂයේ ඇමැති සංශෝධනය කළත් ශ්‍රී ලංකා නිදහස් පක්ෂයේ එක කල් ගියා. හරිනම් දෙකම එකටයි කරන්න තිබුණේ. අපේ සංශෝධනය විතරක් කරන්න ඉඩ දීම ගැන නම් මම පෞද්ගලිකව කැමැති නැහැ” කිරිඇල්ල කතාවට මුලපිරුවේය.

“උසස් අධ්‍යාපන හා මහාමාර්ග අමාත්‍යාංශය අයින් කළේ මගේ වරදක් නිසා නමෛයි. වෙන කෙනෙකුගේ ප්‍රශ්නයක් නිසා කියලා දැන් පේනවානේ”
“දැන් ඔබතුමාගේ අමාත්‍යාංශයෙන් බැංකු අයින් කරනවාද” ඇමැතිවරයෙක් ඇසුවේ කිරිඇල්ලගෙනි.
“බැංකු ටික මගෙන් ගලවලා කියලා කතාවක් තිබුණානේ. එහෙම වුණොත් මට බෝඩ් ලෑල්ල විතරයි ඉතිරි වෙන්නේ. ජනාධිපතිතුමයි, අගමැතිතුමයි එකට ඉන්න වෙලාවක මම මේ ගැන ඇහුවා. බැංකු මගෙන් ගලවන්නේ නෑ කියලා සහතිකයක් ලැබුණා” කිරිඇල්ල උත්තර දුන්නේය.

සයිටම් අර්බුදය සදහා ශිෂ්‍ය-මව්පිය එකගත්වයෙන් යෝජනා කළ විසදුම් වෙනුවට ආණ්ඩුවේ අරමුණු අනුව විසදුමක් යැයි කියමින් එම ආයතනයේ අධ්‍යාපනය ලැබූ සිසු සිසුවියන් කොතලාවල ආරක්ෂක පීඨයට යොමුකළද ඔවුන්ට හිමිවන උපාධි සහතිකයේ සයිටම් ආයතනයේ සිසුන් බව සදහන් කිරීමට තීරණය කර ඇත.

තම දරුවන් වසා දැමූ අධ්‍යාපන ආයතනයක සහතිකලාභින් ලෙස සදහන් කිරීම ඔවුන් බරපතළ ලෙස අසාධාරණයකට ලක්කිරීමක් බව සයිටම් ශිෂ්‍යෙයා් සහ මව්ව්පියෝ චෝදනා කරති. වෛද්‍ය උපාධිය ලබාදීම අරමුණු කරගෙන රජයේ පිළිගත් උපාධි ප්‍රදානය කරන ආයතනයක් ලෙස වංචනිකව මව්පියන් නොමග යවමින් ලක්ෂ 92 සිට 120ක් දක්වා මුදල් අයකරගෙන නෙවිල් ප්‍රනාන්දු සිදුකළ අපරාධයට කිසිදු දඩුවමක් නොකර සිසු සිසුවියන් මෙසේ වරින්වර එක් එක් ආයතනවලට අනියුක්ත කරන්නට ආණ්ඩුව විසදුම් ලෙස අවස්ථා තුනකදී ඔවුන් රවටන ලදී. ජනාධිපතිවරයා විසින් හදිසියේ කැදවන ලද කමිටුවකින් ඔවුන් කොතලාවල පීඨයට යොමුකරන බව කීවද ඉන් පෙරාතුව ජනාධිපතිවරයා සහ ඇමති මණ්ඩලය දැනුවත්ව මාලබේ තොරතුරු තාක්ෂණ ආයතනයට ඔවුන් යොමුකරන බවද ප්‍රකාශයට පත් විය.

මේ ආකාරයට වසර 10ක් තිස්සේ සයිටම් ශිෂ්‍ය ශිෂයාවන් විවිධ ආකාරයෙන් නොමග යවන ලද අතර ශිෂ්‍ය ව්‍යාපාරය අරගල කළේ දිගින් දිගටම වංචනික ලෙස මුදල් අයකරමින් හොර උපාධි ආයතනයක් පවත්වාගෙන යාමට එරෙහිවය. අ ාරම්භයේදී සයිටම් ශිෂ්‍ය ප්‍රජාව මෙන්ම ඔවුන්ගේ මව්පියන්ද ශිෂ්‍ය ව්‍යාපාරය දෙස ද්වේශසහත ලෙස ප්‍රතිචාර දැක්වූයේ තම දරුවන්ගේ අධයාපනයට ඔවුන් ඊර්ෂ්‍යා කරන බවක් පවසමිනි. එහෙත් දැන් ඔවුන් සයිටම් ව්‍යාපාරික නෙවිල් ප්‍රනානන්දුගේ වංචාවට හුසවී ඉන් පසුව ආණ්ඩුවේ එදා වේල විසදුම්වල වංචනිකභාවයටද ගොදුරු වී ඇත. ශිෂ්‍ය ව්‍යාපාරය ඇතුළු සයිටම් විරෝධී ව්‍යපාරය දිගින් දිගටම සිටි ස්ථාවරය වූයේ අධයාපනය වෙලෙද භාණ්ඩකරණය නවතා දමා සුදුසුකම් සහිත සයිටම් ශිෂ්‍ය ශිෂ්‍යාවන්ට සිදුවූ අසාධාරණය විසදන්නට රජයේ වෛද්‍ය පීටයක වෛද්‍ය අධ්‍යාපනයට අවස්ථා ලබා දිය යුතු බවය.

ලොව කීර්තිමත් භෞතික විද්‍යාඥයෙකු වූ ස්ටීවන් හෝකින් මෙලොවින් සමුගෙන තිබේ.

76 වෙනි වියේ පසු වූ ස්ටීවන් හෝකින් කේම්බ්‍රිජ්හි පිහිටි තම නිවසේදී බදාදා (මාර්තු 14) උදෑසන අවසන් හුස්ම හෙලූ බව ඔහුගේ පවුලේ සාමාජිකයෝ පැවසූහ.

කළු කුහර සහ සාපේක්ෂතාවාදය පිළිබඳ සොයා ගැනීම් සිදුකළ විද්‍යාඥයෙකු ලෙස ප්‍රසිද්ධියට පත් ස්ටීවන් හෝකින් විසින් 'A Brief History of Time' ඇතුළු ජනප්‍රිය විද්‍යා ග්‍රන්ථ රාශියක් ලියා පළකරනු ලැබ ඇත.

විද්‍යාඥ හෝකින් ඉතා දුර්ලභ ස්නායු ආබාධයකින් පෙලෙන බව සොයා ගන්නා විට ඔහු 22 වෙනි වියේ පසුවිය.

ඉහත කී ස්නායු ආබාධය හේතුවෙන් ඔහුට ජීවත්වීමට හැකියාව ඇත්තේ තවත් වසර කීපයක් පමණක් බව වෛද්‍යවරුන්ගේ මතය විය.

රෝගී තත්ත්වය ඔහු රෝද පුටුවකට සීමා කළ අතර කතා කිරීමේ අපහසුතා මතු වූ බැවින් බොහෝ විට සන්නිවේදනය කිරීම සඳහා තාක්ෂණික මෙවලමක් (හඬ සංශ්ලේෂණ උපකරණයක්) භාවිත කිරීමට සිදු විය.

යම් සංවිධානගත පිටස්තර කොටස් විසින් සිදු කරනු ලබන උසි ගැන්වීම් හා සාපරාධි ක්‍රියා නිසා මහනුවර ප්‍රදේශයේ ජන කොටස් අතර භීතිය, අසමගිය හා වෛරය පැතිරෙමින් හා ‍පෝෂණය වෙමින් තිබෙන බව නිරීක්ෂණය වන්නේ යයි ශ්‍රී ලංකා මානව හිමිකම් කොමිෂන් සභාව ජනාධිපතිවරයාට යොමු කළ ලිපියක සඳහන්වේ.

එම ප්‍රදේශයේ ජනතාව ආගමික පදනම මත භේදභින්න කිරීමට සැලසුම් සහගතව කටයුතු කර ඇති බව නිරීක්ෂණය වන්නේ යයිද, පෙබරවාරි මස 22 වෙනි දින සිදුවූ පහරදීමකින් අවාසනාවන්ත ලෙස මියගිය පුද්ගලයා පදිංචි අවට ගම්මානවල සිංහල මුස්ලිම් ජන කොටස් අතර තවමත් සුහද සම්බන්ධතාවයක් පවතින්නේ යයිද එම ලිපිය සඳහන් කරයි.

පසුගිය මාස කීපය තුළදී ගිංතොට හා අම්පාර ප්‍රදේශවල සිදුවුණු ආගමික පදනම ඇතිවුණු හෝ ඇතිකළ ජන කොටස් අතර ආගමික වෛරය පතුරවන ප්‍රචණ්ඩකාරී සිදුවීම් රටාව අනුව මහනුවර ප්‍රදේශයේ සිද්ධිය හුදෙකලා සිද්ධියක් ලෙස සැලකිය නොහැකි බව පෙන්වා දෙන ශ්‍රී ලංකා මානව හිමිකම් කොමිෂන් සභාව ආගමික වෛරය මත පදනම්ව ප්‍රචණ්ඩකාරී සිද්ධිදාමය හා වෛරී කථනයන් ඇතුළු ක්‍රියාවලට සෘජුව සම්බන්ධ වූ පුද්ගලයින්ට හා ඔවුන්ට අනුබල දෙන හා ‍පෝෂණය කරන පුද්ගලයින්ට එරෙහිව සමාජ තරාතිරම නොබලා වහාම නීතිය බලාත්මක කරන ලෙසද ජනාධිපතිවරයාගෙන් ඉල්ලා ඇත.

Ads Banners

Sign up via our free email subscription service to receive notifications when new information is available.