ආණ්ඩුව විවිධ වංචා දූෂණ චෝදනාවලට ලක්වූ දේශපාලන අධිකාරියට අයත් පුද්ගලයන් පිලිබඳ පරීක්ෂණ නැවත ආරම්භ කර තිබේ. එසේම වත්මන් ආණ්ඩුව යහපාලන සමයේ ආරම්භ වූ මූල්‍ය අපරාධ විමර්ශන ඒකකය (FCID ) නැවත පන ගන්වා ශක්තිමත් ව්‍යුහයක් ලෙස පවත්වාගෙන යාමටද කටයුතු කරන බව පවසා තිබේ.
යෝෂිත රාජපක්ෂව CID කැඳවීම, මහින්ද රාජපක්ෂගේ ප්‍රධාන ආරක්ෂක නිලධාරි මේජර් නෙවිල් වන්නිආරච්චි කැඳවා ප්‍රශ්න කිරීම, මනුෂගේ සහෝදරයෙක් අත්අඩංගුවට ගැනීම, සලෝචන ගමගේ අත්අඩංගුවට ගැනීම, අර්ජුන් මහේන්ද්‍රන් අත්අඩංගුවට ගැනීමට නියෝග කිරීම වැනි සිදුවීම් මාධ්‍ය වාර්තා කර තිබේ.
මෙවැනි උත්සාහයන් රැසක් යහපාලන ආණ්ඩුව පත්වූ වහාම අපිට දැකගන්නට ලැබුණි. ජනතාවගෙන් බොහෝ පිරිසකගේ බලපොර්ත්තුව වන්නේ යහපාලන සමයේ මෙම චෝදනා සම්බන්ධයෙන් අවසානයේ සිදුවූ දේ නැවත සිදුනොවෙනු ඇති බවයි. වත්මන් ආණ්ඩුවට මෙවැනි පුද්ගලයන්ට එරෙහිව නිතිය ක්‍රියාත්මක කිරීමට මෙන්ම අවශ්‍යනම් නීති සැකසීමට පවා අවශ්‍ය වූ බලයක් ජනතාව ලබාදී තිබේ.
අනෙක් අතින් ජාතික ජන බලවේගය ආණ්ඩුවේ ප්‍රධාන සටන් පාඨයක් වූවේ වංචා දූෂණ තුරන් කරන බව සහ වංචා දුෂන කළ පුද්ගලයන්ට එරෙහිව නීතිය ක්‍රියාත්මක කරන බවයි.
ඒ අනුව මෙමෙ දේශපාලන අධිකාරියට සම්බන්ධ හොරුන් මෙන්ම වෙළඳ අධිකාරියට සම්බන්ධ හොරුන්ද අල්ලා දඬුවම් ලබාදීමට ආණ්ඩුවට හැකිවිය යුතුය.
උදාහරණයට ඩොලර් බිලියන 56ක් පමණ වන මේ රටේ ධනය පිටරට නීතිවිරෝධී ලෙස තැන්පත් කර ඇති සමාගම් හොරුන්, රුපියල් බිලියන 1090ක පමණ ආදායම් බදු නොගෙවා පැහැර හැර ඇති හොරුන්, ජනතාවගෙන් වැට් බදු අයකරගෙන ඒවා රජයට නොගෙවා ඇති සමාගම් හොරුන්, බදු අඩුකිරීම හරහා විශාල ලෙස අනිසි ලාභ ලැබූ සමාගම් හොරුන්
මෙවැනි හොරුන් රැසක් වෙළඳ අධිකාරියට සම්බන්ධව සිටියි. ආණ්ඩුවට මේ සම්බන්ධයෙන් ක්‍රියා කිරීමට අවශ්‍ය නීති ප්‍රමාණවත් නොවේනම් ඒ සඳහා නීති ප්‍රතිපාදන හඳුන්වා දීමේ අවස්ථාවද පවතියි. මන්ද එය අනාගතයේ රටේ මෙවැනි වංචාවන් සිදුවීම වැලක්වීමට ද වැදගත් වෙනු ඇති.
