විරෝධතාවලට දෙමාපියන් විසින් ළමුන් රැගෙන යාම සහ විරෝධතාවලදී ළමුන්ට හිංසා කිරීම යන කරුණ සම්බන්ධයෙන් මේවනවිට සංවාදයක් මතුව තිබේ. මෙම තත්ත්වය උද්ගත වූයේ පසුගිය දිනවලදී දරුවන් සමඟ විරෝධතාවලට සහභාගි වී සිටි දෙමාපියන් පිරිසක් විසුරුවා හැරීමට උත්සහ දරන ආකාරය දැක්වෙන වීඩියෝ දර්ශන කිහිපයක් සමාජ මාධ්‍ය හරහා සංසරණය වීමත් සමඟ ය. එයට අලුතින්ම එකතුවූවේ රනිල් වික්‍රමසිංහ විසින් කරන ලද ප්‍රකාශයයි. ඔහු එම ප්‍රකාශය කරන ලද්දේ දරුවන් අපයෝජනය කළ සාරුවා සුනිල් නැමති කුප්‍රකට දේශපාලනඥයෙකු චෝදනාවලින් නිදොස් කොට නිදහස් කිරීමෙන් දිනකට පසුව වීමද විශේෂත්වයකි.
රනිල් පවසන්නේ දරුවන් පලිහක් ලෙස යොදා ගනිමින් පෙළපාළිවලට ගෙනයාම රටේ නීතිය අනුව බරපතල වරදක් බවයි.
කුඩා දරුවන් පෙළපාළිවලට රැගෙන යාම වැළැක්වීම සඳහා කඩිනම් පියවර ගන්නැයි ද ජනාධිපතිවරයා පොලිසියට උපදෙස් දී ඇත.
රනිල්ට ඇති ජාත්‍යන්තර සබඳතාවයක් නැති බව පසුගිය කාලයේ ඔප්පු විය. දැන් පෙනෙන පරිදි රනිල් රටේ ලෝකේ වෙන්නේ කුමක්ද කියාවත් නොදනී. ලෝකයේ ප්‍රධාන නගරවල දරුවන් ද සහභාගි කර ගනිමින් සිදුවූ විරෝධතා ඕනෑතරම් තිබේ.
1989 වසරේදී එක්සත් ජාතීන්ගේ මහා මණ්ඩලය විසින් අනුමත කර ගන්නා ලදුව 1991 වසරේදී ශ්‍රී ලංකාව ද අත්සන් තැබූ එක්සත් ජාතීන්ගේ ළමා අයිතිවාසිකම් පිළිබද සම්මුතියට අනුව වයස අවුරුදු 18ට අඩු සෑම මනුෂ්‍යයෙකුම ළමයෙකු යනුවෙන් අදහස් කෙරේ.
අදාළ ප්‍රඥප්තියට අනුව, ‘ළමයා ආරක්ෂා වන බවට වග බලා ගැනීම පිණිස සියලු සුදුසු පියවර රාජ්‍යය විසින් ගනු ලැබිය යුතු ය.’
එසේම එක්සත් ජාතීන්ගේ ළමා ප්‍රඥප්තියේ සදහන් වන පරිදි ‘ප්‍රකාශන නිදහස සදහා අයිතිය ළමයෙකුට තිබිය යුතු ය.’
ඊට අමතරව, විවිධ අයිතිවාසිකම් වෙනුවෙන් ඍජුව ළමුන් විරෝධතාවල නිරත වූ අවස්ථා ලෝකයේ දැකිය හැකි ය.
ඒ අතරින්, අධ්‍යාපන අයිතීන් වෙනුවෙන් පෙනී සිටි පකිස්ථාන ළමා ක්‍රියාකාරිණියක වන මලාලා යූසෆ්සායි කැපී පෙනන චරිතයකි.
ඇය අධ්‍යාපන අයිතීන් වෙනුවෙන් දියත් කළ අරගල හේතුවෙන් නොබෙල් සාම ත්‍යාගයට පවා නිර්දේශ විය.
ස්වීඩන් ජාතික ළමා ක්‍රියාකාරිණියක වන ග්‍රේටා තන්බර්ග් ද එවැන්නියකි.
ඇය දේශගුණ විපර්යාස සම්බන්ධයෙන් ලෝක නායකයින්ගේ අවධානය යොමු කිරීම සදහා කළ මෙහෙය වෙනුවෙන් ජාත්‍යන්තර සම්මානවලට පවා පාත්‍ර විය.
එක්සත් ජාතීන්ගේ සිවිල් හා දේශපාලන අයිතිවාසිකම් පිළිබද ප්‍රඥප්තියේ 21 වන වගන්තිය අනුව සහ ශ්‍රී ලංකා ආණ්ඩුක්‍රම ව්‍යවස්ථාවේ 14 වන වගන්තිය අනුව සාමකාමීව රැස්වීමේ අයිතිය රටේ පුරවැසියන්ට තිබේ .
මේ අතර, පසුගිය දා ළමුන් සහ විරෝධතාකරුවන්ට එරෙහිව සිදුවූ බව කියන හිංසන ක්‍රියා සම්බන්ධයෙන් වහා විමර්ශනයක් කර කරුණු දක්වන්නැයි ශ්‍රී ලංකා මානව හිමිකම් කොමිසම පොලිස්පතිවරයාට ලිඛිතව දැනුම් දී තිබේ.
ඒ අනුව ‘කොළඹ ගාලු මුවදොරදී පැවති සාමකාමී විරෝධතාව විසුරුවා හරින ලද්දේ කුමන පදනමක් යටතේ ද?’ යන්න පිළිබදව ද කරුණු දක්වන්නැයි පොලිස්පතිවරයාට දන්වා ඇත.
මෙහි රනිල්ලා තක්කඩි ලෙස සැඟවීමට හදන කාරණය වන්නේ සාමකාමීව රැස්වීමේ අයිතිය ඕනෑම පුද්ගලයෙකුට ඇතැයි යන ව්‍යවස්ථාව තුළ පවා පිළිගත් අයිතිය පොලීසිය විසින් උල්ලංඝණය කිරීමයි. දරුවන් සහ වැඩිහිටියන් සාමකාමීව රැස්වී සිටි ස්ථානයකට පොලීසිය මැදට පැන යකා නැටීම වරදක් බව රනිල්ට සැඟවීමට අවැසිය.නමුත් රනිල්ලාට සහ රනිල්ගේ පොලීසියට එවැනි දේ සිදුකළ හැකි වන්නේ ඉතා කෙටි කාලයක් වනු ඇත.
