වෛද්‍ය පර්යේෂණ ආයතනයේ සිදු කළ යුතු පරීක්ෂණ වර්ග වලින් සියයට පනහක් පමණ කාලාන්තරයක් තිස්සේ සිදු නොකරන බව සෞඛ්‍ය වෘත්තියවේදීන්ගේ විද්වත් සංගමය පවසයි.
මාධ්‍ය වෙත අදහස් දක්වමින් එම සංගමයේ සභාපති රවි කුමුදේශ් පවසා ඇත්තේ රෝගීන්ගේ අවශ්‍යතාවයෙන් සියයට පනහක් ඉටු නොකරන ආයතනයක අධ්‍යක්ෂකවරුන්ගේ කාර්යභාරය කුමක්ද යන්න සෞඛ්‍ය අමාත්‍යාංශය විමර්ශනය කළ යුතු බවටයි.
“සෞඛ්‍ය අමාත්‍යාංශය සහ අධ්‍යක්ෂකවරුන්ගේ පරිපාලනමය නොහැකියාව නිසා වෛද්‍ය පර්යේෂණ ආයතනයේ ප්‍රයෝජනයට ගැනෙන කොටස සියයට පනහකට වඩා අකාර්යක්ෂම වී ඇත. නිවැරදි පාලනයක් සිදු කරන්නේ නම් ප්‍රථමයෙන්ම එහි අධ්‍යක්ෂකවරයාගේ වැටුපෙන්ද සියයට පනහක් කපා දැමිය යුතුය.”
මෙම පරීක්ෂණ සිදු නොකිරීම මගින් ඉතා සංකීර්ණ රෝග හඳුනා ගැනීමට ප්‍රමාද වන අතර ඇතැම් ඒවා සදාකාලිකව හඳුනා නොගනිමින් රෝගීන් ජීවිත කාලය තුළම පීඩා විඳින හෝ ජීවිතක්ෂයට පත්වෙන තත්ත්වයක් ඇතිවිය බවටයි සභාපතිවරයා අනතුරු අඟවන්නේ.
එසේම ඇතැම් පරීක්ෂණ සිදු නොකිරීම හේතුවෙන් විශේෂඥ වෛද්‍යවරුන්ගේ ප්‍රතිකාර අයාලේ යන හෝ, නිවැරදිව කළමනාකරණය නොවන තත්ත්වයකට පත්වීම මගින් සමස්ත සෞඛ්‍ය සේවාවේ වෑයම ව්‍යාර්ථ වීමට හැකියාව ඇත.
රෝග පූර්ව වශයෙන් හඳුනා ගැනීමට නොහැකි වීම හේතුවෙන් රෝගයකින් ගැලවී සිටීමට මහජනතාවට ඇති අයිතිය වෛද්‍ය පර්යේෂණ ආයතනයේ අධ්‍යක්ෂකවරයා ඇතුළු සෞඛ්‍ය අමාත්‍යාංශය උල්ලංඝනය කර ඇති බවට ද රවි කුමුදේශ් චෝදනා කරයි.
