උතුරේ පාසලක නිවාසාන්තර මලල ක්‍රීඩා උත්සවයක් සඳහා කරන ලද නිර්මාණයක් සම්බන්ධයෙන් පොලිසිය විසින් විදුහල්පතිවරයා, ගුරුවරුන් ඇතුළු සිසුන් පොලීසියට කැඳවා ප්‍රශ්න කර ඇති බව වාර්තා වේ.

පොලිසිය විසින් මෙසේ ප්‍රශ්න කර ඇත්තේ තරග වදින නිවාසයක කුටිය දෙමළ ජාතික පුෂ්පය සේ ගැනෙන නියඟලා මලක ආකෘතියට නිර්මාණය කර තිබීම සම්බන්ධයෙනි.

පොලීසියේ ක්‍රියා කලාපය හරහා පාසල් සිසුන්ගේ මුලික අයිතිවාසිකම් කඩ වී ඇති බව සඳහන් කරමින් ලංකා ගුරු සංගමය අප්‍රේල් 2 වැනිදා ශ්‍රී ලංකා මානව හිමිකම් කොමිෂන් සභාවේ යාපනය කාර්යාලයට මේ සම්බන්ධයෙන් පැමිණිල්ලක් කර ඇත.

ලංකා ගුරු සංගමය පවසන්නේ පාසල් පෙළ පොත් තුළද පවතින මලක ආකෘතියක්, සිය කුසලතා පෙන්නුම් කරමින් නිර්මාණය කිරීමට සිසුන්ට නොහැකි වීම බරපතල තත්ත්වයක් බව ලංකා ගුරු සංගමය පවසයි.

පළාත් බද වාර්තාකරුවන් පවසන පරිදි මාර්තු 30 වැනිදා පැවති යාපනය තෙල්ලිපලෙයි යුනියන් විද්‍යාලයේ නිවාසාන්තර ක්‍රීඩා උත්සවය සඳහා සිසුන් සිය නිවාස නිර්මාණය කිරීමේදී යුද ටැංකියක ආකෘතියක් සහිත කුටියක් සහ තවත් නිවාසයක් ඉදිරියේ නියඟලා මලක ආකෘතියක් නිර්මාණය කර තිබීම සම්බන්ධයෙන් එතනට පැමිණි යුද හමුදාව සහ පොලීසිය විසින් ප්‍රශ්න කර තිබේ.

අනතුරුව පොලීසිය එම නිවාස දෙකේ පාසල් සිසුන්ට සහ ඊට අයත් ගුරුවරුන්ට දැනුම් දී ඇත්තේ ඒ සම්බන්ධයෙන් කරුණු විමසීම සදහා මාර්තු 31 වැනිදා තෙල්ලිපලෙයි පොලිස්ථානය වෙත පැමිණෙන ලෙසයි.

එම ආකෘති සහිත නිවාස ඉදි කරන ලෙස සිසුන්ට උපදෙස් ලබා දෙනු ලැබුවේ ගුරුවරුන් විසින්දැයි පොලිසිය මාර්තු 31 වැනිදා තෙල්ලිපලෙයි පොලිස්ථානය තුලදී සිසුන්ගෙන් පොදුවේ ප්‍රශ්න කර ඇති අතර සිය අදහස් අනුව මෙන්ම තම පොත් තුළ දක්නට ඇති සහ තමන් දෛනිකව දකින දේ අනුව එම ආකෘති නිර්මාණය කළ බව එහිදී සිසුන් පොලීසියට පැවසු බව පළාත් බද වාර්තාකරුවන් පවසයි.

තමන් නිවාස නිර්මාණය කරන ආකෘති සම්බන්ධයෙන් ගුරුවරුන් පුර්ව ලෙස දැනුවත් නොකළ අතර නියඟලා මල පිපෙන්නේ වසරකට එක් වරක් පමණක් බැවින් එය දැක ගැනීමේ අවස්ථාව ලබා දීම වෙනුවෙන් සිය නිවාසය ඉදිරියේ එම මළ නිර්මාණය කළ බව පාසල් සිසුන් එහිදී වැඩි දුරටත් පවසා තිබේ.

පළාත් බද වාර්තාකරුවන් පවසන්නේ පාසලේ විදුහල්පතිවරයාද අප්‍රේල් 3 වැනිදා පොලිස්ථානයට කැදවා තෙල්ලිපලෙයි පොලිසීය ඔහුගෙන්ද සිසුන් නිර්මාණය කළ ආකෘතීන් සම්බන්ධයෙන් ප්‍රශ්න කර ඇති බවයි.

ශ්‍රී ලංකා මානව හිමිකම් කොමිෂන් සභාවේ යාපනය සම්බන්ධීකාරක ටී. කනගරාජ් පවසන්නේ ගුරු සංගමය කළ පැමිණිල්ල සම්බන්ධයෙන් කරුණු විමසීම සදහා තෙල්ලිපලෙයි පොලිස්ථානයේ ස්ථානාධිපතිවරයාට අප්‍රේල් 5 වැනිදා ශ්‍රී ලංකා මානව හිමිකම් කොමිෂන් සභාවේ හමුවේ පෙනී සිටින ලෙස දැන්වු බවයි.

එදිනට ස්ථානාධිපතිවරයා නොපැමිණිය අතර ඔහු වෙනුවෙන් එම පොලිස්ථානයේ නිලධාරියකු පැමිනි බව සදහන් කරන මානව හිමිකම් සම්බන්ධීකාරක ප්‍රදේශයේ මාධ්‍යවේදීන් සමග පවසා ඇත්තේ ස්ථානාධිපතිවරයා නිවාඩු ගොස් සිටින බැවින් තමන් එහි පැමිණියේ යයි එම නිලධාරියා පැවසු බවයි.

තෙල්ලිපලෙයි පොලිස් ස්ථානයට ඉහල නිලධාරීන්ගෙන් ලැබුනු උපදෙස් අනුව පාසල් සිසුන්ගෙන්, ගුරුවරුන්ගෙන් සහ විදුහල්පතිවරයාගෙන් එලෙස ප්‍රශ්න කළ බව එම පොලිස් නිලධාරියා පැවසුවේ යයි ශ්‍රී ලංකා මානව හිමිකම් කොමිෂන් සභාවේ යාපනය සම්බන්ධීකාරක ටී.කනගරාජ් මාධ්‍යවේදීන් සමග වැඩි දුරටත් පවසා තිබේ.

ලංකා ගුරු සංගමයේ උප සභාපති දීපන් තිලීෂන් අප්‍රේල් 2 වැනිදා මාධ්‍ය වෙත අවධාරණය කර තිබුනේ උතුරේ පවතින ජාතිවාදී මර්දනය මෙම සිදුවීමෙන් පෙන්නුම් කෙරෙන බවයි.

“ව්‍යවස්ථාවට පටහැනි දේවල් එහි ප්‍රදර්ශනය කළහොත් හෝ තහනම් දේවල් එහි ප්‍රදර්ශනය කළහොත් එය යම් නීතිමය රාමුවක් තුළට ගෙනැවිත් පරීක්ෂණ පැවැත්වීම වෙනම කාරණයක්. මෙතන කිසිම ආකාරයක ව්‍යවස්ථාවේ තහනම් නොකරපු එකක්, ඒ වගේම අපේ පෙළපොත්වල තිබෙන කාන්තල් මල පිළිබඳ ළමයි තමන්ගේ කුසලතාවයෙන් ප්‍රකාශ කිරීමට නොහැකි තරම් අර්බුදකාරී සහ මර්දනය මෙහේ සිදුවෙනවා කියන්නේ මේක සම්පූර්ණයෙන්ම ජාතිවාදී කෝණයකින් සිදු වෙමින් පවතිනවා. අපිට මේක අනුමත කරන්න බෑ.”