ප්‍රමිතියෙන් තොර ආනයනික ඖෂධවලට පසුගිය වසරේ රට පුරා විවිධ රෝහල්වල රෝගීන් 124ක් පමණ ගොදුරු වී තිබියදීත්, මෙතෙක් කිසිදු නිෂ්පාදකයකු අසාදු ලේඛනගත කර නොමැති බව ජාතික ඖෂධ නියාමන අධිකාරියේ සභාපති වෛද්‍ය ආනන්ද විජේවික්‍රම හෙළිකරයි.
රජයේ වෛද්‍ය නිලධාරීන්ගේ සංගමය විසින් අනාවරණ කරන ලද සංඛ්‍යාලේඛනවලට අනුව, එවැනි තත්ත්ව පරීක්ෂාවන් අසාර්ථක වීමේ වාර්ෂික සාමාන්‍යය වසරකට 70ක් පමණ වූ නමුත් පසුගිය වසරේ පමණක් එය දෙගුණ වී තිබේ.
වෛද්‍ය විජේවික්‍රම සඳහන් කරන ආකාරයට සෑම පියවරකදීම ඖෂධ පරීක්ෂා කිරීම සිදුකළ නොහැකිව තිබුණ ද, මේ වසරේ අහඹු පරීක්‍ෂාව තුළින් ගුණාත්මක අසාර්ථකත්වය අවම කර ගැනීමට බලාපොරොත්තු වන බවයි.
කෙසේවෙතත්, මේ වන විට කිසිදු නිෂ්පාදකයකු අසාදු ලේඛනගත කිරීමකට මුහුණ දී නොමැති බව ඔහු පැහැදිලි කළේය.
ඒ සඳහා ශ්‍රී ලංකාවේ වෛද්‍ය තත්ත්ව ප්‍රමිතීන් අධීක්‍ෂණය සහ ශක්තිමත් කිරීම සඳහා පුළුල් උපාය මාර්ගික ක්‍රියාපටිපාටියක අවශ්‍යතාව ඔහු අවධාරණය කළේය.
“2023 වසරේ සිදු වූ තත්ත්ව පරීක්ෂා අසාර්ථක වීම් 124න් බොහෝමයක් හඳුනාගනු ලැබුවේ ඖෂධය රෝගීන් වෙත ගිය පසුවයි. සෑම පියවරකදීම අපට ඖෂධ පරීක්ෂා කළ නොහැකියි. කිසිම රටක් එහෙම කරන්නේ නැහැ, එක්සත් ජනපදය වැනි රටකට පවා එය දුෂ්කරයි. කෙසේවෙතත් මේ වසරේ අහඹු පරීක්‍ෂාව තුළින් තත්ත්ව අසාර්ථක ප්‍රමාණය අවම කිරීමට අපි බලාපොරොත්තු වෙනවා,” ඔහු පැවසීය.
ලියාපදිංචි කිරීමේ ක්‍රියාවලිය විධිමත් කිරීමේ අඛණ්ඩ උත්සාහයන් පිළිබඳව ද ජාතික ඖෂධ නියාමන අධිකාරියේ සභාපතිවරයා පෙන්වාදෙයි.
“පසුගිය වසර පුරා අනුගමනය නොකළ සම්මත යාන්ත්‍රණයන් අනුගමනය කරමින් සෑම ඖෂධයක්ම ලියාපදිංචි කිරීමේ ක්‍රියාවලිය විධිමත් කිරීමට අපි මේ වන විට පියවර ගනිමින් සිටිනවා,” යැයි ඔහු පැවසීය.
තවද, දැනටමත් සංසරණයේ පවතින ඖෂධවල ඇතිවිය හැකි ගැටලු හඳුනාගැනීම සඳහා ක්‍රියාකාරී පියවරක් ලෙස අහඹු පශ්චාත් නිරීක්ෂණවල වැදගත්කම ඔහු අවධාරණය කළේය.
කෙසේවෙතත්, ජාතික ඖෂධ නියාමන අධිකාරිය තුළ විශාල කාර්ය මණ්ඩල ගැටලුවක් ඇති බවත්, මෙම නිරීක්ෂණ උත්සාහයන්ට එය බාධාවක් විය හැකි බවත් ඔහු පිළිගත්තේය.
අර්බුදයට ප්‍රතිචාර වශයෙන්, සෞඛ්‍ය වෘත්තිකයන්ගේ සංගමයේ සභාපති රවී කුමුදේශ් ශ්‍රී ලංකාවේ වත්මන් ඖෂධ පරීක්ෂණ ක්‍රමවේදය විවේචනය කරමින්, ආනයනික ඖෂධ සඳහා අහඹු පරීක්ෂණ හෝ නිරීක්ෂණ ක්‍රියාවලියක් නොමැති බව පෙන්වා දුන්නේය.
කුමුදේශ් විසින් විස්තීර්ණ ඖෂධ පරීක්‍ෂණය, ලියාපදිංචි කිරීමේ ක්‍රියාවලියේදී පරීක්ෂා කිරීම, වෙළෙඳපොළට නිකුත් කිරීමට පෙර කාණ්ඩ පරීක්‍ෂණය සහ රෝහල් තුළ බෙදාහැරීමෙන් පසු අහඹු නියැදි පරීක්‍ෂණය සඳහා තුන් පියවර ප්‍රවේශයක් ගෙනහැර දැක්වීය.
කුමුදේශ්ගේ විවේචනය, ඖෂධ ආනයනය පාලනය කරන විශේෂඥ කමිටුවක් සමඟින් මූලික වශයෙන් අවසාන අදියරේදී පරීක්ෂණ කිරීමේ වත්මන් ක්‍රමවේදයක අවශ්‍යතාව පෙන්වාදෙයි.
