මම රැකියා සොයමින් සිටියෙමි. කුමක් හෝ පාට් ටයිම් රස්සාවක් සොයා ගත යුතුය. ලංකාවෙන් ගෙනා මුදල් ක්‍රමයෙන් නිම වෙමින් පවතී. විශ්වවිද්‍යාලයට යන අතර එක්තරා දොරක ස්ටාෆ් අවශ්‍ය බව දන්වන පුවරුවක් විය. එය පිහිටියේ ස්ප්‍රිං බෑන්ක් ලෙස හැඳින්වූ ප්‍රදේශයේය. මම ස්ප්‍රිං බෑන්ක් සිංහලට පරිවර්තනය කර තේරුම් ගතිමි. එනම් එය වසන්ත ඉවුරය. වසන්ත ඉවුර ලස්සනය. ඒ නිසා ස්ප්‍රිං බෑන්ක්වලට මම වඩා කැමතිය.
මම නිවසට ආ සැනින් අදාල අංකයට පණිවිඩයක් තැබුවෙමි. පසුව මට අයදුම්පතක් ලැබුණු අතර මම එය පුරවා යැව්වෙමි. පසුවදා සම්මුඛ පරීක්ෂණයට පැමිණෙන ලෙස දන්වනු ලැබිණි.
රැකියාව පිරිසිදු කිරීමේ රැකියාවකි. රැකියවේ උසස් පහත්කම් වැඩක් නැත. ජීවත් වන්නට කුමක් හෝ රැකියාවක් අවශ්‍යය. මීට පෙර පළපුරුද්ද ඇද්දැයි ඔහු මගෙන් විමසූ විට ඇතැයි මම බොරුවක් කීවෙමි. අදාල උපකරණ පෙන්වා ඔහු පිරිසිදු කරන ලෙස පැවසුවද එම උපකරණ ක්‍රියා කරවන්නට මම නොදැන සිටියෙමි. එක් ස්විචයක් එබූ විට එය උඩපනින්නට විය. මම වහා එය ක්‍රියා විරහිත කළෙමි. වටපිට බැලූ විට කිසිවෙකු නැත. යන්තම් හුස්මක් ගත්තෙමි. මේ මළදාන මැෂින්වලින් වැඩ කරන්නට මා දන්නේ නැත. දන්නා විදිහට පිරිසිදු කර පුලු පුලුවන් ලෙස වැඩේ නිමා කළෙමි. එහෙත් මාගේ පලපුරුද්දේ තරම අතේ මාට්ටුය. එම ස්ථානයට සීසීටීවී කැමරා තිබී ඇති අතර ඔහු බලා සිට ඇත. මා නැවත ඔහුගේ කාර්යාලයට යන විට එහි තිබූ තිරයෙන් මා කලින් සිටි තැන පේන බව මම දුටුවෙමි. දැන් බොරු කියා ඵලක් නැති බව මම ක්ෂණයෙන් අවබෝධ කර ගතිමි.
දැන් මේ මිනිසා මගෙන් ප්‍රශ්න දහසක් අසයි. යළි යළිත් බොරු කීමෙන් හොඳක් වන්නේ නැත. මම ඇත්ත කිව්වෙමි. මම ඉගෙන ගන්නා ශිෂ්‍යාවක බවත් මට මුදල් අවශ්‍ය බැවින් රැකියාවක් අවශ්‍ය බවත් කීවෙමි.
“මේ රස්සාව ඔයාට ගැලපෙන්නේ නැහැ” ඔහු කීවේය.
රස්සාව අහිමි විය. එහෙත් පසුව ඔවුන්ගේ ඉවෙන්ට් මැනේජ්මන්ට් වැඩවලට මට කතා කළේය. එය සංවිධානය කිරීම මට පහසුය. එය පැය කිහිපයක වැඩකි. අදාල කේටරින් සර්විස් එකට කතා කොට වේලාවට කෑම ගෙන්වා ගැනීම, මේස සැරසීම, වෙලාවට පළතුරු, ඇට ආදිය මේසවල තැබීම, අඩුපාඩු පිරවීම, කෑම බෙදීම මෙන්ම කෑම පිඟන් අස් කිරීමත් අවසානයේ මේස පුටු හකුලා ශාලාව පිරිසිදු කිරීමත් කළ යුතුය. ඒ පැය කිහිපයට පවුම් සීයක් පමණ ලැබේ. එය මගේ සතියක වියදමයි.
කෙමෙන් ඔවුන්ගේ උත්සවවලට පැමිණෙන පිරිස් මා හා මිතුරු විය. ඔවුන්ගේ ආහාර පිළිබඳව වඩාත් සැලකිලිමත් වූ මා කෙරෙහි ඔවුහු යම් ප්‍රසාදයක් උපදවාගෙන සිටියහ. යද්දීද බොහෝ අය පැමිණ විශේෂයෙන් මට ස්තුති කර පිටව ගියහ. මේ මිනිසුන් සියල්ල ඉරාන මිනිසුන්ය. සංස්කෘත පොත පතේ ආ ආර්යයන්ය. ලස්සන හමේ වර්ණයකින් යුතුය. ඝන කලු ඇහිබමය. හරිම ලස්සන ගැහැණුය. ලොව සිටින ලස්සනම ගැහැණු ඉරාන ගැහැණුන් විය යුතුය.
කිරි බොන කුඩා ළමුන් මලුවල දමා මේස යට තබා තරුණ ගැහැණු විස්කි බී ඇති පදම් නැටූහ. ඇඳ සිටි පුංචි ඇඳුම් කෑලි පවා විසිකරමින් විනෝද වූහ. එකිනෙකා නොපරදවන සුලු ලස්සන ගැහැණුය. ඔවුහු ලස්සනට මේක් අප් කරගෙන සිටියහ. විිවිධ වර්ණයෙන් හිස කෙස් වර්ණ ගන්වා ඇත. අයිවර්යයා රායිලා සමූහයක් මෙනි. ඒ අතර සිටි ජමීලා මට විශේෂ වූයේ අපි කුඩා කළ කියවූ ජමීලා පොත නිසාය. මොවුන් එංගලන්තයට පැමිණ විශාල ධනවතුන් වූ අයය. මගේ සැමියා සහ දරුවන් පැමිණි පසු ඔවුන් මා වෙනුවෙන් නිවෙස් සොයන්නටත් නිවසක් ලැබුණු පසු ගෙදරට අවශ්‍ය බඩු සොයන්නටත් පටන් ගත්හ.
ඉරාන වට්ස්ඇප් සමූහ තුළ ඉවත් කරන බඩු මා හට ලබා දෙන්නැයි ඔවුන් පණිවිඩ තබා තිබිණි. මුලින්ම හැදි ගෑරුප්පු සහ සෝස්පන් සෙට් එකක් ලැබිණි. අප ජීවිතය පටන් ගෙන තිබුණේ බිංදුවෙනි. ලංකාවෙන් ගෙනා ඇඳුම් දෙක තුනක් හැර අන් කිසිවක් තිබුණේ නැත. ඉන්පසුව රයිස් කුකර්, මයික්‍රෝ වේව් උදුන්, ටෝස්ටර් ආදී කුස්සියට අවශ්‍ය සියලු බඩු ඉරාන ගෙවල්වලින් ලැබිණි. ඉවත් කරනු ලැබු සෝෆා එකක්, ෆිජ් එකක් සහ සෝදන යන්ත්‍රයක් ද සීතලට අඳින ඇඳුම් ද ලැබිණි. මෙසේ ගෙදරට අවශ්‍ය බොහෝ දේ ලැබුණේ ඉරාන පවුල්වලිනි. ඉන්පසුව ඔවුන්ගේ ළමයින්ගේ පැවරුම්වලට උදව් කිරීම, විශ්වවිද්‍යාල අයදුම්පත් පිරවීම, විශ්වවිද්‍යාල සඳහා ප්‍රකාශ ලියවා ගැනීම ආදී එකී නොකී වැඩ මා ලවා කරවා ගත් අතර බොහෝ විට ඒවාට සාමාන්‍යයෙන් ගෙවන මිළටත් වඩා වැඩි මුදලක් ඔවුහ් මා අත තැබූහ. මගේ එංගලන්ත ජීවිතයේ ආරම්භයේදී ඔවුන් මට දුන් ශක්තිය කිසිදා අමතක කළ නොහැකි වනු ඇත.
තට්ටු තුනක් උඩට මගේ නිවසට බඩු ඇද්දේ මොහම්මද්ය. ඒ කිසිවක් බලාගෙන නොවේ.
“ඔයා කිසි දේකට බය වෙන්න එපා. අපි ඉන්නවා.”
“සල්ලි නැති වුනොත් කියන්න”
“රෙන්ට් එක ගෙවා ගන්න බැරි වුනොත් කියන්න”
මේ ආදී කතා මහ ගොඩාක් නිසා මම අලුත් ජීවිතයේ අභියෝගවලට මුහුණදීමට තිබූ බිය අඩු කර ගතිමි. ඇතැම් විට සුපර් මාකට්වලින් ඔවුන්ට ලැබෙන විශේෂ වරප්‍රසාද සහිත වව්චර් මට එවනු ලැබිණි. ඇතැම් විට ඔවුන්ට යම් බඩු ප්‍රමාණයක් ගෙන එන ලෙස දන්වන අතර මා ඒවා ඔවුන්ගේ ගෙදරට ගෙන ගිය පසු ඒවායින් බාගයක් ඔවුන් ගෙන ඉතිරි බාගය මට යැයි මා අත තැබීය. ඒවා අතර පළතුරු එළවළු ආදිය විය. මෙසේ බලෙන් මෙන් දුන් දේ හැර අන් හැම දේම මා තනියම කර ගත්තා මිස ඔවුන්ගෙන් උදව් ඉල්ලන්නට මැලි වුණෙමි. එහෙයින් තවදුරටත් ඔවුන්ගේ මා පිළිබඳ ආදරය වැඩි වූවා මිස අඩුවීමක් නොවිණි.
උත්සවයක් නිම වූ විට පළතුරු ද බීම වර්ග ද කෑම වර්ග ද මහ ගොඩක් ඉතිරි වේ. ඒ සියල්ල මට ගෙන යන්නැයි ඔවුහු කියති. මගේ දරුවන්ට සති කිහිපයක් කන්නට නොව නාන්නට ඇපල් මිදි දොඩම් ලැබෙන්නේ එසේය. ෆිජ් එක පුරවා දමන්නට කෑමය. දින ගණනකට උයන්නට ඕනෑ නැත.
පිස්ටාචියෝ නම් ඇට වර්ගය මා මුලින්ම කෑවේ එංගලන්තයේදීය. එයට මා බෙහෙවින් පෙරේත වූයෙමි. එහි ඝන පොත්ත ගලවා කෑ යුතු කුඩා කජු ඇටයක් මෙන් ඇට වර්ගයකි. මා එයට ප්‍රිය බව කෙසේ හෝ ඔවුන් දැන ගත් අතර මට එන්නට කියා පිස්ටාචියෝ පෙට්ටියක් තෑගි කරන්නට පසු කලෙක ඒ සමහර ඉරාන මිතුරන් පුරුදු විය.
නත්තලටද අලුත් අවුරුද්දට ද විශේෂ තෑගි දෙමින් ඔවුහු මට මෙන්ම මගේ දරුවන්ට ද ආදරය දුන්හ. ඇතැම් ඇඳුම් පරණ ඒවා නොවේ. චූටි පුතාගේ උපන් දිනය වෙනුවෙන් කේක් එක රැගෙන ආවේ ඔවුන්ය. පුතාට වටිනා ජංගම දුරකථනයක් තෑගි ලැබුණි. එය අපි ලංකාවෙන් ගෙනා පවුලේ අයගේ සියලුම ෆෝන්වලට වඩා අලුත් එකක් විය. අපට ලබා දුන් ඇතැම් සුවඳ විලවුන් මිළ අධික ඒවාය.ඇතැම් ක්‍රීම් වර්ග ගාන්නේ කෙසේදැයි මම නොදැන සිටියෙමි.
මහමඟ දුටුවත් මුහුණට මුහුණ තියා තෙවරක් වැළඳ ගැනීම ඔවුන්ගේ පුරුද්දය. පපුවේ දකුණු පස අත තබා ආචාර කිරීම ද ඔහුන්ගේ පුරුද්දකි.
“දැන් ඉතිං පර්ෂියන් බාසාව ඉගෙන ගන්න” ඔවුන් රැස්වූ තැන ඔවුන්ගේ භාෂාවෙන් කතා කරමින් සිටින අතර එකෙක් විහිලුවට මට කියයි.
ජැක්සන්, මහින්ද බුදුන්ගේ නෑයෙක් යැයි කීවාක් මෙන් මට දැනෙන්නේ ඈතම කාලයක ආර්යයන්ගෙන් මා ද කැඩී වෙන්ව යන්නට ඇති බවයි. ආර්යයන්ගෙන් වෙන්ව ඉන්දියාවට ආ ගොඩේ ඉන්නට ඇති බවයි. දැන් ඔවුන්ට යළි මා හමුවී ඇත. ඔවුන් මට සලකන්නේ එසේ කලෙකදී වෙන්ව ගිය නෑයෙකු යළි හමු වූ ආකාරයෙනි. එය සිදු වූයේ කෙසේදැයි මම නොදනිමි. තමන්ගේම පවුලේ කෙනෙකු ලෙස ඔවුහු මා හට සලකති. චූටි පුතාගේ කොන්ඩය වැවී තිබෙනු වරක් දුටු ඉරාන මිතුරෙකු පුතාව රැගෙන ගොස් කොන්ඩය කපා තිබුණේ ඒ පලාතේ මිළ අධිකම සැලුනයෙනි. හෙයා මී අවුට් නම් එම සැලුනයේ කොණ්ඩය කපන්නට පවුම් විසි පහක් ගනී. එනම් රුපියල් දස දහසක වැනි මුදලකි.
කෙසේ හෝ ධනවත් ඉරාන ජාතික මිනිස් සමූහයක් මැදට සත්තිකුම්භ ජාතකේ ගිරවා මෙන් දුප්පත් මම වැටුණෙමි. ඔවුහු මගේ පවුලම ආදරයෙන් රැක බලා ගත්හ. කිසිවක් අහම්බ නොවේ යැයි මට සිතෙයි.
