යෝජිත යාපනය ජාත්‍යන්තර ක්‍රිකට් ක්‍රීඩාංගනයේ ඉදිකිරීම් කටයුතු සඳහා පාරිසරික අනුමැතිය ලබා ගෙන නොමැතිව ආරම්භ කිරීම පිළිබඳ පරිසරවේදීන්ගේ විරෝධය එල්ල වෙමින් පවතියි. ජාතික පාරිසරික පනත යටතේ අවශ්‍ය වන පරිදි, පාරිසරික බලපෑම් තක්සේරුව (EIA) සම්පූර්ණ කර අනුමත කිරීමට පෙර මූලික ඉඩම් එළිපෙහෙළි කිරීම සහ ප්‍රවේශ මාර්ග සංවර්ධනය ඉදිරියට ගෙන යාමට අවසර දුන්නේ කෙසේදැයි පරිසර කණ්ඩායම් සහ සිවිල් සංවිධාන ප්‍රශ්න කරමින් සිටියි.

උතුරු පළාතේ ප්‍රධාන “ක්‍රීඩා නගරයක්” ඉදිකිරීමේ සැලසුම් අවශ්‍ය පාරිසරික අනුමැතිය නොමැති වීම හේතුවෙන් යෝජිත ක්‍රීඩාංගනයේ ඉදිකිරීම් අත්හිටුවා ඇත.

2025 සැප්තැම්බර් මාසයේදී ජනාධිපති අනුර කුමාර දිසානායක විසින් මුල්ගල තබන ලද රුපියල් බිලියන ගණනක ව්‍යාපෘතිය, යාපනයේ මණ්ඩතිව් දූපතේ ආසන 40,000 කින් යුත් ජාත්‍යන්තර ක්‍රිකට් ක්‍රීඩාංගනයක් ස්ථාපිත කිරීම අරමුණු කරයි. කෙසේ වෙතත්, මධ්‍යම පරිසර අධිකාරිය (CEA) ප්‍රකාශ කළේ මූලික ඉදිකිරීම් කටයුතු ආරම්භ කරන අවස්ථාවේ අවසාන පාරිසරික අවසරයක් ලබා දී නොමැති බවයි.

මණ්ඩතිව් දූපතේ ජාත්‍යන්තර ක්‍රිකට් ක්‍රීඩාංගනය ඉදිකිරීම සඳහා තෝරාගත් ඉඩම සංවේදී තෙත්බිම් පරිසර පද්ධතියක් බව පරිසර ක්‍රියාකාරික සජීව චාමිකර පෙන්වා දුන් අතර, මෙම ව්‍යාපෘතිය හරහා වටිනා පරිසර පද්ධතිය විනාශ වෙනු ඇති බව ඔහු අනතුරු අඟවා තිබුණි.

ජනාධිපතිවරයා විසින් එම ඉදිකිරීම් ආරම්භ කිරීම සඳහා මුල්ගල තැබීමෙන් පසු , ශ්‍රී ලංකා ක්‍රිකට් ආයතනය දැනටමත් නීති විරෝධී ලෙස තෙත්බිම් පද්ධතිය පිරවීම සහ පාරිසරික අනුමැතිය ලබා නොගෙන ප්‍රදේශයට වැට බැඳීම ආරම්භ කර ඇති බවත් ඔහු පැවසීය.

මෙම ව්‍යාපෘතිය යටතේ සැලසුම් අතරට ජාත්‍යන්තර ක්‍රිකට් ක්‍රීඩාංගනයක් පමණක් නොව ගොල්ෆ් පිටියක්, නේවාසික ඒකක සහ හෝටල් සංකීර්ණයක් ද ඇතුළත් වන අතර එමඟින් විශාල ක්‍රීඩා නගරයක් නිර්මාණය වන බව ඔහු පැවසීය. මෙය තෙත්බිම් පද්ධතිය සම්පූර්ණයෙන්ම විනාශ වීමට සහ යාපනය කලපුවේ කුඩා පරිමාණ ධීවර කර්මාන්තය බිඳ වැටීමට හේතු වන බවට ඔහු අනතුරු ඇඟවීය.

මෙම ප්‍රදේශය පසුගිය වැසි සමයේ ජලයෙන් පිරීගොස් ඇති ආකාරය මාධ්‍ය වාර්තා කර තිබුණි.

මේ අතර ඊයේ පැවැතී කැබිනට් තීරණ දැනුම් දීමේ මාධ්‍ය සාකච්ඡාවේදී ඇමති නලින්ද ජයතිස්ස පැවසුවේ මෙහි ඉදිකිරීම් නවතා දැමීමේ කිසිදු අදහසක් නැති බවත් පාරිසරික තත්ත්ව වාර්තාව ලබාගන්නා තෙක් ඉදිකිරීම් කල් දමා ඇති බවයි.

කෙසේවෙතත් මෙම ක්‍රීඩාංගනය සඳහා මුල්ගල තබන මොහොතේ සිට විවිධ පරිසර සංවිධාන මෙම භූමිය පාරිසරික වශයෙන් සංවේදී කලාපයක් වන බැවින් මෙය ඉදිනොකරන ලෙසට ඉල්ලා තිබුණි. නමුත් මෙතෙක් ඒ සඳහා ආණ්ඩුවේ අවධානය යොමු වී නැති බව පෙනේ. වෙනත් ආණ්ඩු සිදුකළ ආකාරයටම මේ ආණ්ඩුවද සිදුකරන්නේ ඉදිකිරීම් ගැන තීරණය කර පරිසර තත්ත්ව වාර්තා ගැන සිතීමයි.