සහල් හිඟයට හේතුව දත්ත විකෘතියක් යැයි ජනාධිපතිවරයා පසුගිය දිනක කල ප්‍රකාශයට පිළිතුරු දීමටත් ගොවි ජනතාව මුහුණ දී ඇති ප්‍රශ්න ප්‍රමාණයක් දැනුවත් කිරීමටත් ගොවි අරගල ව්‍යාපාරය අද ( 2025 – 01 – 23 ) දින විශේෂ මාධ්‍ය හමුවක් කැඳවන ලදී.
එහිදී අදහස් දැක්වූ ගොවි අරගල ව්‍යාපාරයේ ජාතික සංවිධායක විමල් වත්තුහේවා.
” අද වෙද්දි ගොවියන්ට විශාල ප්‍රශ්න ප්‍රමාණයක් මතු වෙලා තියනවා. එක පැත්තකින් සහල් අර්බුදය එක්ක මතුවුණු ගැටලුව. තව පැත්තකින් වර්ෂාව නිසා ඇති වෙච්ච වගා හානි. මේ වෙද්දී අම්පාර, මඩකළපුව, මොනරාගල, ත්‍රිකුණාමලය, හම්බන්තොට ඇතුළු දිස්ත්‍රික්ක ගණනාවක ගොයම් කැපෙන්න පටන් අරගෙන තියෙන්නේ. නමුත් තවමත් වී අස්වැන්න සඳහා රජයෙන් සහතික මිළක් නියම කරල නෑ. රතු කැකුළු වී මේ වෙද්දී හම්බන්තොට වගේ ප්‍රදේශ වල විකිණෙන්නෙ රුපියල් 140ට 150ට. නමුත් ත්‍රිකුණාමලේ දි මේ මිළ රුපියල් 110යි 120යි. අනිත් වී වර්ගත් රුපියල් 110 සහ 115 අතර ඉතාම පහළ මිලකට තමයි විකිණෙන්නෙ. එක පැත්තකින් ආණ්ඩුව කඩිනමින් වී සඳහා සහතික මිලක් නියම කරන්න ඕන. ඊලඟ කාරණය තමයි වී මිලදී ගැනීමේ ක්‍රියාවලියට ආණ්ඩුව මැදිහත් වීම. තවමත් ආණ්ඩුවේ වී ගබඩා විවෘත කරල නෑ. වී මිලදී ගැනීමට ප්‍රමාණවත් මුදලක් වෙන් වෙන්න ඕන. මේ කිසිවක් තවම වෙලා නෑ.
හැබැයි පහුගිය දවසක රූපවාහිණී වැඩසටහනකදි අනුර දිසානායක ජනාධිපතිවරයා කිව්වා වී මිලදී ගැනීම සඳහා රුපියල් කෝටි 500ක් වෙන් කරල තියෙන්නෙ කියලා. ආණ්ඩුව රුපියල් කෝටි 500ක වී ගත්තත් රටේ ජනතාවගේ පරිභෝජන අවශ්‍යතාවය සම්පූර්ණ කරන්න පුළුවන් වෙන්නෙ දවස් හතරයි. ඒ නිසා ආණ්ඩුව වෙන් කරන්න සැලසුම් කරන ප්‍රමාණය කිසිසේත්ම ප්‍රමාණවත් නෑ. ඊලඟ කාරණය තමයි ආණ්ඩුව වී මිලදී ගැනීම සඳහා මිලක් නියම කිරීමේදී ගොවියාට වාසිදායක වන විදිහට කටයුතු කරන්න ඕන. නමුත් දැන් ආණ්ඩුව මහා පරිමාණ මෝල් හිමියන්ට වාසි දායක විදිහට කටයුතු කරනවද කියම සැකය අපිට මතු වෙනවා. අක්කරයක කුඹුරක් කරන ගොවියෙක් ගෙදර පරිභෝජනයට වී කිලෝ 600ක් 700ක් තියාගෙන ඉතුරු සොයලු වී අස්වැන්න විකුණුවත් දවසක ආදායම විදිහට ලැබෙන්නෙ රුපියල් 350 – 300 අතර මුදලක්. නමුත් දවසකට වී කිලෝ 5000ක් කොටන මෝලක් ගත්තොත් එක හාල් කිලෝවකින් රුපියලක ලාභයක් තිබ්බත් ඔහුට රුපියල් 3000ක ලාභයක් ලැබෙනවා දවසකට. අපි දන්නවා මීට අමතරව වී කිලෝ 500ක් කොටද්දි කුඩු වලින් විතරක් රුපියල් 10,000ක පමණ අමතර ලාභයක් ලැබෙනවා. සාමාන්‍යයෙන් වී කිලෝ 100කට නිෂ්පාදනය වෙන කුඩු කිලෝ 2 – 6ත් අතර වෙනවා. ඒ නිසා තමයි අපි ආණ්ඩුවට කියන්නෙ වී මීල තීරණය කරද්දී ගොවියට සාධාරණයක් කරන්න කියලා.
අපි දන්නවා පාරිභෝගිකය ගැනත් මෙතනදි හිතන්න ඕන. සහල් මිල පාරිභෝගිකයට දරාගත හැකි මට්ටමක පවත්වාගෙන යාම අත්‍යාවශ්‍යයි. ඒ සඳහා නිශ්පාදන වියදම අඩු වෙන විදිහෙ දීර්ඝ කාලීන වැඩපිළිවෙළක් ආණ්ඩුව පැත්තෙන් ක්‍රියාත්මක වෙන්න ඕන. අස්වැන්න ප්‍රමාණය වැඩි කිරීම සඳහා ඉලක්කයක් තියෙන්න ඕන. ආණ්ඩුව ඒ සඳහා කරන ඕනම කටයුත්තකදි අපි ගොවියෝ විදිහට සහයෝගය දක්වන්න සූදානම්. නමුත් ඒ ආණ්ඩුව ගොවි ජනතාව පැත්තෙ හිටගන්නව නම් විතරයි.
අපි දැක්කා ජනාධිපතිවරයා රූපවාහිනී වැඩසටහනකට ඇවිත් කියනවා සහල් හිඟය ඇති වුනේ දත්තවල වැරද්දක් නිසා කියලා. නමුත් මහා මෝල් හිමියෝ කිහිපදෙනෙක් සහල් හංගගෙන ඉන්න නිසා තමයි සහල් හිඟයක් ඇති වෙලා තියෙන්නෙ කියලා වෙළෙඳ ඇමතිවරයාම පසුගිය දවසක පාර්ලිමේන්තුවේ දි පිළිගත්තා. අපි පිළිගන්නවා දත්ත සම්බන්ධයෙන් සුළු සුළු අඩුපාඩු වෙන්න පුළුවන්. හැබැයි අනුර දිසානායක ජනාධිපතිවරයා කියන්න උත්සහ කරන විදිහට සමස්ත හිඟයට බලපෑවේ දත්ත විකුර්තියක් කියන එක පිළිගන්න අමාරුයි.
මහා කන්නයේදි සාමාන්‍යයෙන් හෙක්ටයාර් ලක්ෂ 8ක් වගා වෙනවා. මෙවර හෙක්ටයාර් අටලක්ෂ විසිහත්දාහක් වගා කරන්න නියමිතයි. යල කන්නයේදී හෙක්ටයාර් ලක්ෂ 5ක් විතර වගා කරනවා. එතකොට අවුරුද්දකට වගා කරන ප්‍රමාණය හෙක්ටයාර් ලක්ෂ 13ක්. සාමාන්‍යයෙන් මේ අතරින් හෙක්ටයාර් 40,000ක් පමණ වගා හානි නිසා විනාශ වෙනවා. ඒ ප්‍රමාණය හෙක්ටයාර් ලක්ෂයක් කියල ගත්තත් හෙක්ටයාර් ලක්ෂ 12ක වාර්ෂික අස්වැන්නක් රටට එන්න ඕන. සාමාන්‍යයෙන් ගොවියෙක් හෙක්ටයාරයකට වී කිලෝ 4000ක් විතර නිශ්පාදනය කරනවා. එතකොට අවුරුද්දකට අනිවාර්යයෙන්ම මෙට්‍රික්ටොන් ලක්ෂ 48කට ආසන්න වී අස්වැන්නක් ලැබෙන්න ඕන. ඒක තමයි ඇත්ත. එහෙම තියෙද්දී තමයි ආණ්ඩුව දත්ත වැරදී කියල මතයක් සමාජගත කරන්න උත්සහ කරන්නෙ.
ආණ්ඩුවේ දත්ත අනුව සාමාන්‍යයෙන් පුද්ගලයෙක්ගේ වාර්ෂික සහල් පරිභෝජනය 112.3 KG අතර ප්‍රමාණයක්. එතකොට ලංකාවේ සමස්ත සහල් අවශ්‍යතාවය වෙන්නෙ අවුරුද්දකට මෙට්‍රික්ටොන් ලක්ෂ 24යි. වාර්ෂික වී අස්වැන්න මෙට්‍රික්ටොන් ලක්ෂ 48ක් නම් ඒකෙන් මෙට්‍රික්ටොන් ලක්ෂ 30ක පමණ සහල් නිෂ්පාදනය කරන්න පුළුවන්. එතකොට බියර් සහ සත්ව ආහාර සඳහා සහල් මෙට්‍රික්ටොන් ලක්ෂ 5ක් යෙදෙව්වත් පරිභෝජනය සඳහා ප්‍රමාණවත් සහල් ප්‍රමාණයක් තියෙන්න ඕන. ඒ නිසා අපි ආණ්ඩුවට කියනවා දත්ත විජ්ජා පෙන්නලා මේ ප්‍රශ්නෙන් ගැලවෙන්න උත්සහ කරන්න් එපා. ඇත්ත අර්බුදය මතු වෙලා තියෙන්නෙ කොතනින් ද කියලා හොයන්න.
අපේ රටේ විශාලම සහල් මෝල් හිමියන් පස්දෙනා දවසකට සහල් කිලෝ ලක්ෂ 12ක් විතර වෙළෙඳපොළට නිකුත් කරනවා. රටේ සමාන්‍යෙන් දෛනික සහල් අවශ්‍යතාව කිලෝ ලක්ෂ 65ක් පමණ. මේ මෝල් හිමියෝ පස් දෙනා දවස් හතරක් පහක් වෙළඳපොළට සහල් නිකුත් නොකර හිටියොත් රටේ ජනතාවට දවසක් කන්න හාල් නැති වෙනවා. එහෙම ගණං හදල බලල තමයි මේ ව්‍යාපාරිකයෝ වෙළඳපොල එක්ක සහල් මිල කේවල් කරන්නෙ. ජනාධිපතිවරයා ඒක නොදන්නව කියල අපි හිතන්නෑ. ඒ නිසා අපි ජනාධිපතිවරයාට කියනවා බොරුවට දත්ත මත වැරද්ද පටවන්නැතුව ඇත්ත ප්‍රශ්නය ජනතාවට කියන්න. මොකද මේ ආණ්ඩුව පත් කරගත්තෙ මේ රටේ ජනතාව. මහමෝල් හිමියන් වෙනුවෙන් නෙවෙයි ආණ්ඩුව පෙනී ඉන්න ඕන ජනතාව වෙනුවෙන්.
කෘෂිකර්ම ඇමතිවරයා කිව්වා පසුගිය වගාහානි සඳහා වන්දි මුදල් පෙබරවාරි මාසෙ දෙනවා කියලා. නමුත් ආණ්ඩුව මේ වන්දි දීම කෘෂි රක්ෂණ මණ්ඩලය හරහා කරන්න සැලසුම් කරනවනං ඒක ලොකු ප්‍රශ්ණයක්. මොකද කෘෂි රක්ෂණ මණ්ඩලය එකම වගාවට දෙවතාවක් වන්දි ලියන්නෑ. පහුගිය අවුරුද්දේ දෙහිඅත්තකණ්ඩියේ කුඹුරු මුලින් යට වුණා නොවැම්බර් මාසෙදි. දෙවෙනි වතාවට යට වුණා දෙසැම්බර් මාසෙදි. නමුත් වන්දි ගන්න ගියාම මුල් වතාවෙ අයව දෙවැනි ලේඛනයට ඇතුල් කලේ නෑ. අනිත් එක කෘෂි රක්ෂණ මණ්ඩලය දෙන අක්කරයකට රුපියල් 40,000ක වන්දියත් කිසි සේත්ම ප්‍රමාණවත් නෑ. මේ මුදල වැඩි වෙන්න ඕන කියලා ඉස්සර සටන් කරපු ඇමතිලා දැන් නිස්ශබ්දයි.
ඒ නිසා අද වෙද්දී වගා හානි නිසා ඇති වුණු ගැටලු සඳහා සහ සහල් අර්බුදය එක්ක ගොවියන්ට මතුවෙලා තියෙන ගැටලු සඳහා රජයෙන් ඉක්මන් මැදිහත් වීමක් කරල මේ ප්‍රශ්න විසඳන්න කියන යෝජනාව අපි ආණ්ඩුවට කරනවා. “
