“ඉරේසරීය ඉරාවකින් ඉක්බිතිව ඉතිරිව” ගගන ලක්ෂර වර්ණකුල සූරියගේ නවතම කාව්‍ය සංග්‍රහය. මේ පොත හා බැඳුණු අත්දැකීමක් පෙරටු කරගෙන මේ ගැන අදහසක් ලියන්නට හිතුනා.

පෙර දැනුවත්භාවයක් නැතිව මේ පොත අතට ගෙන කියවන කෙනෙකුට පහළ විය හැකි සිතුවිලි දෙකක් තිබේ.

i. පළවෙනි එක මේ කාව්‍ය ශානරය පිළිබඳව අදහසක් නැති කෙනෙක්ට මේ මොනවා දැයි කියා හිතෙන්න පුළුවන් වගේම මේවා කියවන්නේ කොහොමද කියලා ගැටළුවත් මතු වෙන්න පුළුවන්.

ii. මේ කාව්‍ය ශානරය පිළිබඳවත්, පෙරවදනත් ලියන්නට ගගන භාවිතා කර තියෙන (අක්ෂර – fm තිලක) පිළිබඳ යම් වැටහීමක් නොවේ නම් දෙවෙනි හැඟීම හැටියට මතුවෙන්නට ඉඩ තියෙන්නේ මේ පොත මුද්‍රණ දෝෂ බහුල පොතක් බවයි.

මේ පොත කියවූ කෙනෙක් ඉහත ගැටලු දෙක පිළිබඳව මගෙන් කරුණු විමසූ අතර ඔහුට පිළිතුරු ලබාදුනි . ඉන් ඔබ්බට මේ සම්බන්ධයෙන් එවැනි පැනයක් ඇත්නම් ඊට පිළිතුරු ලබාදිය හැකි වන්නේ ශේෂ කවිය පිළිබඳව බහුලත්වයක් ඇතිකර සමාජ කතිකාවතක් නිර්මාණය කිරීම හරහායි. ගගන විසින් අඩවල් කර ඇති දොර එලෙසම පවතිද්දී එබී බලන්නේ නැතිව, කවිය පිළිබඳව උනන්දුවක් ඇති අයට මේ අලුත් දොර විවර කර ඇතුලට යන්නට සහ ගිහින් ශේෂ කවිය පිළිබඳව දේ සොයා ඉදිරිපත් කරන්නට පුළුවන්.

ගගනගේ පොත හරහා අපේ පාඨක සමාජය ඇතුල් වන්නේ ආගන්තුක භාවය සහ නුහුරු ගතිය වැඩි අලුත්ම අලුත් කාව්‍ය ශානරයක් වෙතයි. ඒ වෙනුවෙන් වූ මහන්සියට ගඟනට ස්තුතිවන්ත විය යුතුයි. ඔහු මේ සම්බන්ධයෙන් කර ඇති අධ්‍යයනය ඔහුගේ ශේෂ කවිය සම්බන්ධයෙන් තබන සටහනෙන් පිළිබිඹු වෙනවා.

ශේෂ කවි සම්ප්‍රදාය ලංකාවට අලුත් වැඩක් වුණාට බටහිර ලෝකයට මේක අලුත් දෙයක් නෙවෙයි. ඒ පිළිබඳව යම් අදහසක් ගගන ප්‍රකාශ කර තිබේ. මම නොයෙක් අවස්ථාවන්වලදී ශේෂ කවිය දැක තිබුණත් ඒ පිළිබඳව උනන්දුවක් සහ ඒ ගැන සොයා බලන්නට වුවමනාවක් තිබුණේ නැහැ. එනිසා එය මගහැරී ගියා. ඇත්තටම ඒ මඟ හැරී ගියේ එය කාව්‍ය සම්පදායක් බව නොදැන සිටීමයි. ගගනගෙ මේ ප්‍රවේශයත් සමඟ ඒ පිළිබඳව උනන්දුවක් ඇතිවුණා. ශේෂ කවිය පිළිබඳව ඔහු කරන හැඳින්වීමෙන් පසුව මීට පෙර මේවා මා දැක්කේ කොහෙද කියා සොයා බලන්නට පෙළඹුනා. එවිට තමයි මතක් උනේ දරුවන්ගේ අභ්‍යාස පොත් වල මේවා මීට පෙර දැක තිබුණු බව.

ඉතාලියේ පාසල් පද්ධතිය තුළ දරුවන්ට ලබා දෙන ක්‍රියාකාරකමක් ලෙස දරුවන්ගේ අභ්‍යාස පොත් වලදී මේ ශේෂ කවිය මුණගැහි තියෙනවා . ඒය මනස වර්ධනය කිරීමේ අභ්‍යාසයක් ලෙසත් කණ්ඩායම් එක්ව කරන ක්‍රියාකාරකමක් ලෙසත් පාසලේදී පත්තර පිටුවලින් ශේෂ කවි හොයන්නට කියාදුන් බව ඒ ගැන විමසීමේදී දරුවන් මා සමග ප්‍රකාශ කළා . ගගනගේ ශේෂ කවි ප්‍රවේශයත් සමඟ ශේෂ කවියක් සම්බන්ධයෙන් උත්සාහයක් දරන්නට වුවමනාවක් පැන නැඟී තිබේ .

දැන් ගගනගේ ශේෂ කවියට පිවිසෙමු 

බොහෝ දේ ශේෂ කොට ඉතිරි කොට තිබෙන සුළු වචන ප්‍රමාණය සමහර තැන් වල පැටලුම් සහගත වී නිවැරදිව ගැලපුනේ නැතත් ජීවිතයේ කුමන හෝ අත්දැකීමක් සමඟ ඒ ඉතිරි කර තිබෙන වචන ප්‍රමාණය අර්ථයක් නිරූපණය කරන්නට පෙළඹෙනවා . එය අර්ථයට මගපෙන්වීමක් ඒ ශේෂ පිටුව මත ඇදෙන චිත්‍රය සිදු කරනවා .

දිවි
උපාධිය
අතරමං
වැටුප් කොළඹ
කැම්පස්
ව්‍යාපාර
තීන්දු

පැටලිලි සහගත චිත්‍ර නිරූපණය ඇතුළේ ඉතිරිවී තිබෙන මේ වචන ටික උපාධිය ගත් තරුණ තරුණියන්, රැකියාවක් වෙනුවෙන් කරන අරගලයත්, ජීවන සටන්, පඩි වැඩිකිරීම් ඉල්ලීම් , කොළඹ වීදි පුරා පැන නැගුණු වීදි සටන්වලදී පොලිසිය එළව එලව ගහන මතකයේ රැඳුනු දර්ශනත් යළි සිහිපත් කරනවා . වර්තමාන රාජ්‍ය පරිපාලන ක්‍රමය ඇතුළේ උපාධිය නැමැති අධ්‍යාපන සුදුසුකම මොනතරම් පැටලිලි සහගත තැනකට මිනිහෙක්ව ඇද දමනවාද කියලා හිතන්න පෙලඹවීමක් මේ හරහා ඉතිරි වෙනවා .

“ඉක්බිති ඔවුහු බුදියගත්හ” – තක්ශිලා ස්වර්ණමාලිගේ පොතේ පිටු අංක 41න් ගගන අපට කවියක් මතුකරලා දෙනවා.

චෛත්‍යය ඉස්සරහ
දඩ මස්

ටීවී එකේ
ඡන්ද ප්‍රතිඵල

ඔහු මේ වචන කීපය ආඳන්න නිර්මාණය කර තිබෙන සිතුවම ගිනි අවියක හැඩය ගන්නවා . මේ වචන කීපය එකට කල්පනාවට ගත්තොත් දේශපාලනික සවිඤ්ඤාණිකත්වයක් තියෙන කෙනෙක්ට විවිධ පැතිකඩයන් ඔස්සේ ගමන් කිරීමට පුළුවන්කම තියෙනවා . එවගේම “චෛත්‍යය ඉස්සරහ දඩමස් “ , කියන වචන කිහිපය ගැන වෙනම කල්පනා කළොත් “හක්කේ බුදු රැස් බොක්කේ දඩ මස් “ ක්ෂණිකව සිහියට එනවා .

ගගනගේ ශේෂ කවි විමසා බලද්දී පෙනී යන කරුණක් තමයි ඒ ශේෂ කර තිබෙන කවි වලින් වැඩිම ප්‍රමාණයක් වඩාත් සමීප දේශපාලනික අරුත් ගැන්වීම්වලට කියන එක .

70 දශකයේ සිංහල කවිය
පැරිස් වලාකුළු
ඉක්බිති ඔවුහු බුදියගත්හ
අතිශය අභ්‍යන්තර පරීක්ෂණය
ධරණී
අයිතියක් හොයාගන්න බැරි ෆේස්බුක් පිටුවක කෙටි පණිවිඩයක්

ගගන ශේෂකවි සෙවීමට පිටු තෝරාගන්නා පොත් එකිනෙකට වෙනස් ඒවාය. මේ පොත්වල අන්තර්ගත කතා සමානතා නොදක්වති. එහෙත් ගගනගේ ශේෂ කවි පිටු අතරින් මතුවන්නේ දේශපාලන සමීපතා සහිත කවි වීම ඔහු සොයන කවියේ හැඩය සහ ඔහුගේ සවිඥානික භාවය රැඳී පවතින තැන පාඨකයාට අනාවරණය වෙනවා.

ගගන විසින් අප වෙත හඳුන්වා දෙන මේ අලුත් කාව්‍ය ශානරය පිළිබඳව පුළුල් කතාබහක් සමාජය තුළ නිර්මාණය වීම වැදගත් වේවි . කවිය පිළිබඳව උනන්දුවක් දක්වන නව පරපුරට අලුත් පාරවල් සොයාගන්නට මේ පොත ඉතා වැදගත් එකකි .