කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති ඊයේ පැවසුවේ අස්වේසුම ප්‍රතිලාභීන් ලැජ්ජා විය යුතු බවත් එය “නීත්‍යානුකූල හිඟමනක්” බවත්ය.
අමාත්‍යවරයා අවධාරණය කළේ දරිද්‍රතාවය තුරන් කිරීම දිගුකාලීන සුභසාධන යෝජනා ක්‍රම මත නොව තිරසාර විසඳුම් සෙවීම මත රඳා පැවතිය යුතු බවයි.
“අස්වේසුම ප්‍රතිලාභීන් ලැජ්ජා විය යුතුයි. එය නීත්‍යානුකූලව හිඟමනට වැටීමක් වගේ. අපට ජාතියක් ලෙස දියුණු වීමට අවශ්‍ය නම්, අපි මෙම යැපුම් මානසිකත්වයෙන් ඉවත් විය යුතුයි,” හඳුන්නෙත්ති පැවසීය.
අස්වේසුම වැඩසටහන දිගටම කරගෙන යාමට හෝ එය දේශපාලන සටන් පාඨයක් ලෙස භාවිතා කිරීමට රජයට කිසිදු අදහසක් නොමැති බව ඔහු තවදුරටත් පැවසීය.
අස්වැසුම ව්‍යාපෘතිය යනු ආර්ථික අර්බුදය විසින් දුප්පත්කමේ පතුලටම ඇද දමා ඇති පිරිසක් ඉල්ලක්ක කරගෙන ක්‍රියාත්මක සහනාධාර ව්‍යාපෘතියකි. එය ක්‍රියාත්මක වෙන්නේ මූල්‍ය අරමුදල සමඟ ඇතිකරගත් එකඟතා අනුවයි. මූල්‍ය අරමුදලේ අදහස වන්නේ ආර්ථික අර්බුදයෙන් බැටකන බහුතර ජනතාවකට සහන සලසන බදු අඩුකිරීම වැනි වැඩපිළිවෙලක් වෙනුවට දුප්පතුන් කොටසක් තෝරාගෙන ඔවුන්ට නොමැරී සිටිය හැකි පරිදි සොච්චමක් ලබාදීමයි. ආණ්ඩුව එය හිඟමනක් ලෙස සලකන්නේ මූල්‍ය අරමුදලට විරුද්ධව යමින් තමන් මැතිවරණයේ පොරොන්දු වූ පරිදි විදුලි බිල් අඩුකර, සමහර භාණ්ඩ සඳහා බදු බිංදුවේ අගයකට ගෙන එමින් කටයුතු කිරීමට තිබුණි. නමුත් ආණ්ඩුව තෝරාගත්තේ ජනතාවට බර පටවන සුළු පිරිසකට සහන සැලසෙන ක්‍රමයයි. දැන් නැවතත් ජනතාවගේ තෝරාගැනීමක් නොවන අස්වැසුම ලබාගැනීම සම්බන්ධයෙන් ජනතාවට දොස් ඇසීමට සිදුව ඇත.
එපමණක් නොව ජාත්‍යන්තර මූල්‍ය අරමුදලේ වැඩසටහන අනුව යනවිට දේශීයව ආර්ථිකය ගොඩනැංවීමට නොහැකි බව සහ තව තවත් දුප්පතුන් වැඩිවීම සිදුවන බව හඳුන්නෙත්ති නොදන්නවා විය නොහැක. එසේනම් ලැජ්ජාවිය යුත්තේ දුප්පත්කම පවත්වාගෙන යන වැඩපිළිවෙලක් අනුගමනය කරමින් බොරු පම්පෝරි ගසන හඳුන්නේත්තිලා නොවේද?
