ජාත්‍යන්තර කම්කරු දිනය ඊයේ (01) දිවයිනේ සහ ලොව පුරා සැමරූ නමුත් ලංකාවේ බහුතර දේශපාලන පක්ෂ එය වැඩකරන ජනතාවගේ අයිතීන් ගැන කතා කිරීමට ප්‍රමුඛත්වය ලබාදීම වෙනුවට ජනාධිපතිවරණය සඳහා බලය පෙන්වන රැස්වීමක් බවට පත්කරගෙන ඇති බවට සාකච්ඡාවක් ඇතිව තිබේ.
එක්සත් ජනපදයේ චිකාගෝ හි හේ මාර්කට් හි දිනකට පැය අටක් වැඩ කිරීම සහ වැඩ කරන ජනතාවගේ අයිතිවාසිකම් තහවුරු කිරීම සඳහා කම්කරුවන් කළ උත්තරීතර පරිත්‍යාගයන් සිහිපත් කරමින් 1886 සිට ලොව පුරා මෙම දිනය සමරනු ලැබේ.
මේ වසරේ ජනාධිපතිවරණය පැවැත්වීමට නියමිතව ඇති හෙයින්, මැතිවරණ ක්‍රියාවලියේ නිල කටයුතු ජූලි 17 න් පසුව පමණක් ආරම්භ කිරීමට නියමිතව තිබුණද දැනටම රට තුළ මැතිවරණ උණුසුමක් ඇතිව තිබේ.
ඒ අනුව මැතිවරණ ව්‍යාපාර දියත් කිරීම ජනාධිපති අපේක්ෂකයන් ප්‍රකාශයට පත් කිරීමේ සහ මැතිවරණ ප්‍රතිඥා දීමේ වේදිකාවක් බවට ජාත්‍යන්තර කම්කරු දිනය පත්ව ඇත.
විශේෂයෙන් මෙවර පැවැත්වූ ජාතික ජන බලවේගයේ ජාත්‍යන්තර කම්කරු දින වේදිකාවේ මාක්ස්, ලෙනින් සහ එංගල්ස්ගේ ඡායාරූප නොතිබීම ගැනද සංවාදයක් ඇතිව තිබේ.
මේ මොහොතේ නිදහස් වෙළඳපොල ආර්ථිකයේ අවශ්‍යතාවලට අනුකූලව වත්මන් කම්කරු නීති වෙනස් කිරීමට ආණ්ඩුව සූදානමින් සිටියි. ඒ හරහා සේවකයෙකුගේ සේවය අවසන් කිරීමෙන් පසු වන්දි ලබා නොදීම, පැය 08ක වැඩ දිනය වෙනස් කිරීම වැනි කරුණු පවා ඇතුළත් වේ.
ආර්ථික අර්බුදයෙන් පසු දරිද්රතා අනුපාතය සියයට 22 දක්වා ඉහළ ගොස් තිබේ. මෙරට වැඩකරන ජනතාව රට හැර යමින් අහිතකර කොන්දේසි යටතේ හෝ විදේශ රැකියා සඳහා යමින් සිටියි. පසුගිය වසරේ ලක්ෂ 14ක් රට හැර ගොස් ඇත.
ප්‍රධාන මැතිවරණ වේදිකාවලින් ඇසෙන කතා අතර එක්සත් ජාතික පක්ෂ වේදිකාවෙන් ඇසුණු කතා අතර තිබුනේ ආණ්ඩුක්‍රම ව්‍යවස්ථාවේ 13 වැනි සංශෝධනය සම්පූර්ණයෙන් ක්‍රියාත්මක කිරීම, පාස්කු ඉරිදා ප්‍රහාරය පිළිබඳ අලුත් විමර්ශන ආරම්භ කිරීම, ස්මාර්ට් ගොවීන් සහ ධීවරයින් බිහි කිරීම, ආයෝජකයින්ට හිතකර පරිසරයක් නිර්මාණය කිරීම, රැකියා අවස්ථා ඇති කිරීම සහ සෑම දිස්ත්‍රික්කයකම සිලිකන් වැලි වර්ගයේ තොරතුරු තාක්ෂණ කලාප ඇති කිරීම යනාදියයි. ජ්‍යෙෂ්ඨ පුරවැසියන්ගේ තැන්පතු සඳහා ඉහළ පොලී අනුපාතයක් ගෙවීම සහ ස්මාර්ට් පාසල් නිර්මාණය කිරීම ද මීට ඇතුළත් විය.
මෛත්‍රීපාල සිරිසේනගේ නායකත්වයෙන් යුත් ශ්‍රී ලංකා නිදහස් පක්ෂයේ (ශ්‍රීලනිප) කන්ඩායම වැඩකරන ජනතාවට සිදුවෙන විනාශය පසෙක තබා, ජනාධිපතිවරණ අපේක්ෂකයා ලෙස අධිකරණ ඇමති විජයදාස රාජපක්ෂ ප්‍රකාශයට පත් කිරීමට එම පක්ෂයේ මැයි දින වේදිකාව යොදාගෙන තිබුණි.
NPP මාතර දිස්ත්‍රික් මැයි රැලියට එක්වෙමින් පක්ෂ නායක අනුර කුමාර දිසානායක කියා සිටියේ රනිල් වික්‍රමසිංහට හෝ සජිත් ප්‍රේමදාසට විනයගරුක සහ නීතිගරුක සමාජයක් නිර්මාණය කළ නොහැකි බවයි.
“අපි හොඳින් විනයගරුක ජනතා බලවේගයක් බව අපේ මැයි රැලි හතරෙන්ම ඔප්පු කර තිබෙනවා.අනෙක් දේශපාලන බලවේගවලට විනයක් නැහැ.අපේ මැයි රැලිය තමයි ඉතාම හොඳින් සංවිධානය වූ මැයි රැලිය සහ පෙළපාලිය.මේ ආකාරයේ සංවිධාන බලය සහ මේ රටට විනයක් අවශ්‍යයි. මෙරට විනයක් නැති නිසයි විශාල අපරාධ සිදුවන්නේ. මේ ආණ්ඩුවටවත් සංවිධාන බලය නැහැ. ආණ්ඩුවට සහ අනෙකුත් පක්ෂවලට පුළුවන් රට විනාශ කිරීමට පමණයි. රනිල්ට පුලුවන්ද විනය හදන්න? සජිත්ට පුලුවන්ද විනය හදන්න? ඔහු පැවසීය.
ශ්‍රී ලංකා පොදුජන පෙරමුණ (SLPP) ද එය ජනාධිපතිවරණය ඉලක්ක කරගත් මැයි දිනයක් බවට පත්කරගෙන තිබුණි.
එහි නායක මහින්ද රාජපක්ෂ දේශපාලන ප්‍රතිවාදීන් විවේචනය කරමින් දේශපාලන කතාවක් කරමින් ශ්‍රී ලංකා පොදුජන පෙරමුණේ සහාය ලබන අපේක්ෂකයා පමණක් ජනාධිපතිවරණයෙන් දිනන්නේ යැයි පවසමින් පක්ෂයේ ධෛර්යය ඉහළ නැංවීමට උත්සාහ කරනු දක්නට ලැබුණි.
“මැතිවරණයෙන් ජයග්‍රහණය කරන්නේ ශ්‍රී ලංකා පොදුජන පෙරමුණේ සහාය ලබන අපේක්ෂකයා පමණයි. අපි එය නියම වේලාවට ප්‍රකාශ කරනවා. එතෙක් ඕනෑම කෙනෙකුට ජනාධිපති වෙන්න හීන දකින්න පුළුවන්” යැයිද ඔහු පැවසීය.
රටේ සමස්තයක් ලෙස බඩු මිල ඉහළ ගොස් තිබේ. විදුලි බිල්, ජල ගාස්තු ඉහළ ගොස් තිබේ. ඊට අමතරව දේශීය ණය ප්‍රතිව්‍යුහගතකරණයේදී විශ්‍රාමික අරමුදල්වලට විශාල පාඩුවක් සිදුවීමට නියමිතය. දැන් ආණ්ඩුව බොරුවට විශ්‍රාමික අරමුදල්වලට ලබාදෙන පොළිය 2023ට අදාළව පමණක් සියයට 13 දක්වා වැඩිකරන බව පවසයි. එය ඡන්ද ගුන්ඩුවක් බව පැහැදිලිය. ඉන්පසු එම පොළිය සියයට 9ට වඩා පහළ බසිනු ඇත. එසේම විදේශ ණය ප්‍රතිවියුහගතකරණයද මේවනවිට අසාර්ථක වී තිබේ. මේ අසාර්ථක වීමේ වන්දිය ගෙවීමට සිදුවන්නේ වැඩකරන ජනතාවටයි. එසේම රාජ්‍ය දේපොළ 400ට වැඩි ප්‍රමාණයක් විකිනීමට නියමිතව තිබේ. මේ සියල්ල පිටුපස ජාත්‍යන්තර මූල්‍ය අරමුදලේ බලපෑම තිබේ. ඊට අමතරව ඉන්දියාව කලාපීය බලවත ලෙස මේ අවස්ථාවෙන් ප්‍රයෝජන ගනිමින් සිටියි. මැතිවරණය ද වැඩකරන ජනතාවගේ අයිතියකි. නමුත් ඉදිරියේදී පැමිණීමට නියමිත මැතිවරණය ගැන පමණක් හිතමින් දේශපාලන පොරොන්දු පමණක් ලබා දෙන්නන් බලය ලබාගත් පසු ඒවා ඉටු කරයිද යන සැකය ජනතාව තුළ මතුවීම වැළක්විය නොහැක. මන්ද ඔවුන්ට අවශ්‍ය බව පෙනෙන්නේ තමන්ට බලය ලබාගැනීම පමණක් වන හෙයිනි.
