අපේ රටේ මානව ජීවිතවල වටිනාකම් නැති වූයේ අද ඊයේ නොවේ. 71, 89, ඉන්පසුව මානුෂික යැයි පාරම් බෑ යුද්ධය යන හැම තැනම මානව ජීවිතවල වටිනාකම විනාශ කර දැම්මේය. මිනිසුන් තිරිසනුන් ගනයෙහි ලා මරා දැමුවේය. ශිෂ්ට සම්පන්න සමාජයක තිරිසනුන්වත් එසේ මරන්නේ නැත. අපට ඇති ලොකුම අභියෝගය නම් ලංකාව ශිෂ්ට සම්පන්න රටක් බවට පත් කිරීමයි.
පසුගිය දා අත්අඩංගුවට පත් වූ තරුණයෙකු මිය ගියේය. එසේ මිය යන්නෙන් කෙසේද?
පොලිසීයේ කෙරුවාව රටම දන්නා කරුණකි. පසුගිය කාලවල ආයුධ පෙන්වන්නට යැයි කියා මිනිසුන් කොපමණ ඝාතනය කළාද? ඒ සියලු දෙනා කුඩු කාරයන් යැයි ඒවා සාධාරණීකරණණය කරන ලදී. කුඩු කාරයන්ට දඬුවම් දෙන නිශ්චිත නීත්‍යානූකූල පදනමක් රටක ඇත. මේ සියල්ල කැලේ නීතියයි. කැලේ පොලිසීයයි. එවැනි දේ ඇස් කන් වසා බලා හිඳීමෙන් වෙන්නේ ඊළඟ ඉලක්කය අපේ දරුවන් වීමය. දැන් සිදු වී ඇත්තේ එයයි.
පොලීසිය හිතාගෙන සිටින්නේ තමන්ට ඕනම අපරාධයක් කිරීමට නීතියෙන් ලයිසන් දී ඇති බවකි. මොකද රණවිරුවන්ට ඒ බලතල පහුගිය රජයන්වලින් දී තිබිණි. යුද්ධය මුවාවෙන් දරුවන් මරා දැමූ ගැහැණුන් දූෂණය කළ නිලධාරීන් රණවිරු ලේබලය යටතේ නිදහස් විය.
මේ අනීතික සාහසික පාලන ක්‍රමයන් ජනතාව විසින් අතුගා දමා අලුත් රජයක් පත් කර ගත්තේ තව දුරටත් කැලේ නීතිය රජ කිරීමට ද?
තවමත් සිදු වන්නේ එය නම් අලුත පත් වූ රජයෙන් ද ජනතා අපේක්ෂාවන් ඉටු නොවේ. පහුගිය කාලයේ මිනිසුන් මහමඟ මරා දමන විට ඒ ප්‍රදේශයේම සීසීටීවී කැමරා අක්‍රීයව ගිය පුවත් පවා මිනිසුන් අසා සිටියේ පාලනයේ තුච්ච බව දන්නා නිසාය. සාමාන්‍ය ජනතාවට ඇත්ත කුමක්දැයි හොඳින්ම දැන ගත්තත් ඔවුනන්ට කරන්නට දෙයක් නැත. බලය ඇත්තේ අපරාධකරුවන් මිනීමරුවන් අතය.
එහෙත් දැනුත් සිදු වන්නේ එයම නම් …
පොලීසියට උසාවි ඉදිරිපත් නොකර එසේ අත්අඩංගුවේ රඳවා තබා ගත නොහැකි බව සාමාන්‍ය ජනයා දැන සිටිය යුතුය. සැකරුවෙකුට පොලීසියේදී පහර දීමට පොලීසියට කිසිම අයිතියක් නැත. මන්ද යත් ඔහු එම වරදට වැරදි කරු ද නිවරදිකරුද යන්න තවම ඔප්පු වී නැති නිසාය. වරදකරු වුවහොත් එහිදී දෙන දඬුවම නීතිය මඟින් පසිඳලනු ඇත. එතනදීත් පොලීසියට කරන්නට කිසි දෙයක් නැත.
පොලීසිය සිටින්නේ නීතිය හා සාමය රැකීමටය. මිනිසුන් මරා දැමීමට නොවේ.
ඔහු සොරෙක් යැයි උපකල්පනනය කරමු. එය පසිඳලිය යුත්තේ උසාවියයි.
මේ ප්‍රවෘත්තියෙනන් ඔහු සොරෙක් බව හැඟවෙනන කිසිවක් මතු වන්නේ නැත.
එසේ නම් මෙම තරුණය කළ වරද කුමක්ද?
එතැන ප්‍රශ්න කිහිපයක් මතු වේ. සිද්ධිය වාර්තාවන ආකාරයට ත්‍රීවීලර් එකක් ඔහු පිටුපස පන්නා එද්දී බයට පෞද්ගලික ඉඩමකට ඇතුළු වූ බව කියවේ.
එසේ ත්‍රීවිලරයක් පන්නා එන්නේ ඇයි? එසේ තවත් මිනිසෙකුට හිංසා කිරීමට අනෙක් මිනිසුන් පෙළඹෙන්නේ ඇයි? සැක කරන හේතුව නම් ඔහු හොරෙක් බවයි. ඔහු පසුපස ත්‍රීවිලරය පන්නා ආවේ ඇයි? ඔහු වෙනත් තැනකින් කළ සොරකමක් නිසාද? එහෙත් ඔහු ගොඩ වූ ඉඩම හෝ නිවසින් ඔහු කිසිවක් සොරකම් කර නැත. එසේ නම් ඔවුන් ගස් බැඳ ගැසුවේ ඇයි?
ඉන්පසු පොලීසියට බාර දුන් පසු පොලීසිය කියන්නේ මානසික ආබාධ සහිත ආකාරයෙන් බිත්තිවල ඇඟ හප්පා ගනිමින් ක්‍රියා කළ බවයි. ඇතැම් මානසික ආබාධ වලදී විවිධ භ්‍රාන්තීන් තිබේ. එවිට කවරෙකු හෝ පසුපස පන්නා ගෙන එන්නා සේ ඔවුනට දැනේ. එසේ මානසික ආබාධයක් සහිත නම් ඔහුගේ ආරක්ෂාව පොලීසිය තහවුරු කළ යුතුය. ඔහුගේ ජීවිතයට හානියක් නොවන පරිදි බැඳ දමා තබා රෝහල් ගත කළ යුතුය.
මිනිසෙකු මිය යන තුරු ඔහුව පාලනය කර ගැනීමට පොලීසියක් අසමත් ද?
මානසික රෝගියෙක් නම් පොලීසිය මානසික රෝගීන්ට සලකන්නේ මෙසේද? එවැනි සුවිශේෂ අවශ්‍යතා ඇති අය ගැන ක්‍රියාකිරීමට පොලිසීය දැනුවත් කර නැද්ද? සිර මැදිරියක සිටි තනි පුද්ගලයෙක් පාලනය කර ගැනීමට සමස්ත පොලීසියක් අසමත් ද?
පොලීසියේ පිටපත ඉතා දුර්වලය.
ඔහු ඇඳ සිටි ඇඳුම් කෝ? ඔහුගේ දුරකථනනය කොහිද? ඔහු සතුව තිබූ පර්ස් එක මුදල් අනෙකුත් දේවල් කොහෙද?
මගේ තුන්වන උපකල්පනය නම් මොහු එල්ජීබීටීකිව් ප්‍රජාවට අයත් කෙනෙකු බවයි.
තවමත් සමාජය සිතන්නේ පුද්ගල ලිංගිකත්වය සිදු විය යුත්තේ සමාජයට උවමනා ආකාරයට බවයි. සංක්‍රාන්ති ලිංගිකයිනන්ට උසුලු විසුළු කිරීම හිංසා කිරීම තවමත් සමාජයේ පවතින්නේ ලිංගිකත්ව බල ධූරාවලිය නිසාය. ඒකාකෘතික චින්තනය නිසා මිනිසුන් හිතන්නේ සිටිය යුත්තේ ගැහැණු පිරිමි පමණි. ගැහැණු සමාජය ආසා විදිහට සිටිය යුතුය. පාලකයා පිරිමිය. ගැහැණන්ගේ ලිංගික අයිතිය ඇත්තේ පිරිමියාටය. අතරමැදි ලිංගික දිශානති තිබිය නොහැක. මේවා සියල්ල ලිංගික දේශපාලනයේ අංගයන්ය.
මෙම තරුණය මදක් මෘදු මොලොක් පෙනුම සහිතය. ඔහු නගරයේ වෙනන් දූෂකයන්ගේ ගොදුරක් බවට පත්වන්නට යද්දී ඔහු වත්තකට පැන සරණක් සෙව්වා වන්නට පුලුවන. එසේනම් එය කෙතරම් ඛේදනීය තත්ත්වයක් ද? තරුණයෙකුට තමන්ට කැමති ආකාරයෙන් පාරක ගමන් කිරීමට ලංකාව තුළ ඉඩක් නැති වීම පිළිබඳ ඛේදවාචකයකි. පාරක බැස යාමට ඔහු ගැැහණණියෙක් ද පිරිමියෙක් ද සංක්‍රාන්ති ලිංගිකයෙක්ද යන කිසිවක් අදාල නැත. එය මූලික මානව අයිතියකි.
ඉන්පසු නැවතත් ඔහුට ගස් බැඳ පහර දීම තවදුරටත් හිංසාවේ ඔහු ගොදුරක් බවට පත් වීමකි. එසේ පහර දීමකදී ඔහුට නරක ආකාරයකට පහර වැදී තිබුණා වුවද විය හැකිය. (මේ කියනන්නේ කාලකන්නි පොලිසි සුද්ද කිරීමට නොවේ)
සමරිසි ප්‍රජාවේ කෙනෙකු යැයි හැඟී ගියේ නම් පොලීසිය තවදුරටත් ඔහු පෙළන්නට පෙළඹෙන්නට ඇත. ඒ තවමත් ඔවුන්ගේ අයිතීන් ලංකාව පිළිගනන්නා මට්ටමක නැති වීමයි. එහෙත් එවැන්නක් හේතු කරගෙන මිනිසෙකු මිය යන තුරු පහර දිය හැකිය.
පොලීසියකට කිසිම ආකාරයෙන් රැඳවියකුට පහර දිය නොහැක.
දැන් මේ වන විට එම අදාල පොලීසියේ ස්ථානනාධිපති වරයාගේ වැඩ තහනම් කර ඇද්ද? තවම එවැන්නක් දැන ගන්නට නැත. පොලිස් ඇමතිවරයා ඒ ගැන ප්‍රකාශයක් කර ඇද්ද? තවම නැත. හරි නම් මේ වන විට පොලිස් ස්ථානාධිපතිවරයාගේ වැඩ තහනම් කර තිබිය යුතුය.
පොලිස් ඇමති ඉල්ලා අස්විය යුතුය.
සාධාරණ සමාජයක් සෑදීම පරණ පාරේ යමින් කැලේ නීතිය රජ කර ගෙන කළ නොහැක්කකි.
අලුත් පාරට හැරෙන්නට නම් පොලීසි පිරිසිදු කළ යුතු අතර වල්වැදී ඇති නීතිය හරි මඟට ගත යුතුය.
නැතහොත් ඉදිරියටත් සීසීටීවී කැමරා ක්‍රියාවිරහිතව මිනිසුන් මහමඟ මිය යනු ඇත. නොදන්නා හේතුවකින් වාහන හැප්පී ගිනි ගෙන මිනිසුන් මිය යනු ඇත.
ඒ යුගය නැවතත් අපිට ඕනෑ නැත. නුඹලා ආවේ ඒ යුගය නිමා කරනවා යැයි පොරොන්දු දීගෙනය. එසේ නම් මානව ජීවිතවලට වටිනාකමක් දෙන්න. ගැහැණුන්ට පිරිමින්ට කරුණයන්ට නිදහසේ පාරක ඇවිද යා හැකි රටක් හදන්න.
