ලංකාවට පැමිණෙන නරේන්ද්‍ර මෝදී සමඟ අත්සන් කිරීමට නියමිත ගිවිසුම් මොනවද යන්න කැබිනට් මණ්ඩලයට හෝ හෙළිකර නැතැයි පෙරටුගාමී සමාජවාදී පක්ෂය පවසයි. එම පක්ෂයේ අධ්‍යාපන ලේකම් පුබුදු ජයගොඩ, අත්සන් කිරීමට නියමිත අතර එම ගිවිසුම් වල පිටපත් තොරතුරු දැන ගැනීමේ පනත යටතේ ඉල්ලීම සඳහා අද (අප්‍රේල් 03) ජනාධිපති ලේකම් කාර්‍යාලයට ගොස් තිබුණි. ඔහු පැවසුවේ රටට බලපාන තීන්දු තීරණ ගැනීමේදී ඒවා ජනතාව වෙත යොමුකිරිම ද යහපත් දේශපාලන සංස්කෘතියේ කොටසක් බවයි.
පුබුදු ජයගොඩ වැඩි දුරටත් පැවසුවේ,
”1971 අප්‍රේල් අරගලයේ 54 වන වසර සමරන 2025 අප්‍රේල් 5 වැනිදා ඉන්දියාවේ අගමැති නරේන්ද්‍ර මෝදි සමග ගිවිසුම් ගණනාවක් අත්සන් කිරීමට නියමිතයි. ඒ ගිවිසුම් මොනවාද කියලා මේ වනතුරු රටට හෙලි කර නෑ. ජනතාව නෙවෙයි, පාර්ලිමේන්තුවටවත් කියලා නෑ. අපි දන්න විදියට කැබිනට් මණ්ඩලයටවත් ගිවිසුම් පිටපත් පෙන්නලා නෑ. එක්කෝ කැබිනට් ඇමතිවරු අපට බොරු කියනවා, නැතිනම් මේ ගිවිසුම් ගැන කවුරුත් දන්නේ නෑ.
ජනතාවගේ ජීවිත වලට බලපාන තීරණ ගන්න කොට, විශේෂයෙන් පරම්පරා ගණනාවකට බලපාන තීරණ ගන්න කොට ජනතාවගෙන් විමසන්න ඕන. මේ වගේ ගිවිසුම් සමාජගත කරලා, සංවාදයක් හදලා, ජනමත විචාරණයකින් සම්මත කිරීමයි කළ යුත්තේ. නැතිනම් අඩුම ගානේ පාර්ලිමේන්තුවේ ගිවිසුම් පිටපත් සභාගත කරලා විවාදයක් කරන්න ඕන. ඒ මොකුත් නෑ. පාර්ලිමේන්තු විපක්ෂය අඩුම ගානේ ගිවිසුම් බලන්නවත් ඉල්ලන්නේ නෑ. පාර්ලිමේන්තුව ඇතුළේ කවුරුත් මීක් නෑ. විපක්ෂයේ සජබ එජාප සහ පොහොට්ටුව ඉන්දියාවට විරුද්ධව කට අරින්නේ නෑ. පාර්ලිමේන්තුව තුළ ආණ්ඩුවයි විපක්ෂයයි එකතු වෙලා ජනතා විරෝධී වැඩ කරන්නේ.
ආණ්ඩුව දේශපාලන සංස්කෘතිය යහපත් කරනවා කියලා ඒක සම්පූර්ණයෙන්ම මන්ත්‍රීවරුන්ගේ ජීවන රටාවට ලඝු කළා. දේශපාලන සංස්කෘතිය කියන්නේ වේල් දෙකක් බඩගින්නේ ඉන්න එකයි බස් එකෙයි කෝච්චියෙයි යන එක විතරක් නෙවෙයි. බැරෑරුම් දේශපාලන තීරණ ජනතාවගෙන් අහලා ගන්න එකත් යහපත් දේශපාලන සංස්කෘතියට අයත්. අද වනවිට ජනතා විමුක්ති පෙරමුණ දේශපාලන සංස්කෘතිය විතරක් නෙවෙයි දේශපාලනයත් අවුල් කරගෙන. 1971 අරගලයේදී ජනතා විමුක්ති පෙරමුණ තාප්ප වල ලිව්වේ “අධිරාජ්‍යවාදයට විනාශය – සමාජවාදයට විජයග්‍රහණය” කියලා. ඒ ජනතා විමුක්ති පෙරමුණම ආණ්ඩුවට ඇවිත් අද අධිරාජ්‍යවාදී උපායමාර්ගයට ලංකාව සම්බන්ධ කරන්න හදනවා. ඉන්දියාව සමග අත්සන් කරන්න යන ආරක්ෂක ගිවිසුම සෙල්ලමක් නෙවෙයි. ඉන්දියාව ක්වඩ් නම් යුද සහයෝගිතා සංවිධානයේ සාමාජිකයෙක්. ආසියාවේ නේටෝව ලෙස හඳුන්වන ක්වඩ් සංවිධානය හැදී තිබෙන්නේ ඇමරිකා එක්සත් ජනපදය, ඔස්ට්‍රේලියාව, ජපානය සහ ඉන්දියාව එක්වෙලා.
ඊට අමතරව ඉන්දියාව ඇමරිකා එක්සත් ජනපදය සමග ආරක්ෂක ගිවිසුම් ගණනාවකින් බැඳී ඉන්නවා. ඉන්දියාව සමග ලංකාව ආරක්ෂක ගිවිසුමක් අත්සන් කරන්න තීරණය කරන්නේ මේ සන්දර්භ ඇතුළේ. පසුගිය සිකුරාදා Economic Times කියන ඉන්දියානු මාධ්‍යය වාර්තා කර තිබුණා මේ ඉන්දු – ලංකා ආරක්ෂක ගිවිසුමේ අරමුණ චීනයේ නැගී එන යුද බලයට ප්‍රති බලයක් ගොඩ නැගීම කියලා. එහෙම වුණොත් අපි ඉන්දියානු සාගර කලාපය තුළ බල පොරයක ගොදුරක් වෙනවා.
1971 අප්‍රේල් මාසයේදී ජවිපෙ කිව්ව, ලිව්ව සටන්පාඨය “දණින් වැටී ජීවත් වීමට වඩා දෙපයින් සිට මිය යාම උතුම්” කියන එක. අද වසර 54කට පසු 2025 අප්‍රේල් මාසයේ ඒ ජවිපෙම ලංකාවේ ජනතාවට දණින් වැටී ජීවත් වීමත් නෙවෙයි, දණින් වැටී මියයාමේ ඉරනමක් උරුම කර දෙන්න යනවා. අධිරාජ්‍යවාදීන්, ලෝක බලවතුන්, කලාපීය බලවතුන් ඉදිරියේ දණින් වැටිලා, විනාශකාරී අධිරාජ්‍යවාදී යුද්ධයකින් මියයාමේ ඉරණම ලාංකිකයන්ගේ නළලේ කොටන්න යන්නේ. මේක තිරශ්චීන පාවාදීමක්. මේ පාවාදීමට එරෙහිව ජන බලයක් ගොඩනගමු.
පාර්ලිමේන්තුව තුළ ආණ්ඩුව සහ විපක්ෂය එකට එකතුවී ජනතාවට එල්ල කරන ප්‍රහාරයට මුහුණ දෙන්න පාර්ලිමේන්තුවෙන් පිටත ජනතා විපක්ෂය ගොඩනගමු. අපි අද ගිවිසුම් වල පිටපත් ඉල්ලුවා. ඒවා ජනතාවට නොපෙන්වා, හොර ගිවිසුම් අත්සන් කළත් ඒවායේ එක වචනයක්වත් ක්‍රියාත්මක කරන්න බැරි වෙන බලයක් ගොඩනගමු.”
