වැලිකඩ පොලිස් අත්අඩංගුවේ සිටි තරුණයෙකු මිය යාම සම්බන්ධයෙන් සමාජ මාධ්‍ය හරහා විශාල විරෝධයක් මතුව තිබේ. සමාජ මාධ්‍ය ජාල හරහා අදහස් දක්වන පිරිස් පවසන්නේ මෙම පොලිස් ඝාතනවලට තිත තැබිය යුතු බවයි.

එසේම වැලිකඩ පොලිසිය තුළ මීට පෙරද රාජකුමාරි නම් කාන්තාවක් මියයාම ගැන සඳහන් කරමින් ඇතැම් පිරිස් පවසන්නේ මෙම පොලිස් ස්ථානයේ ස්ථානාධිපතිවරයාට එරෙහිව වහා පියවර ගත යුතු බවයි.

මේ අතර වැලිකඩ පොලිසිය විසින් සැකපිට අත්අඩංගුව ගෙන සිටි තරුණයෙකු පොලිස් භාරයේ සිටියදී මිය යෑම සම්බන්ධයෙන් නුගේගොඩ කොට්ඨාස භාර ජ්‍යෙෂ්ඨ පොලිස් අධිකාරිවරයාගේ උපදෙස් මත නුගේගොඩ කොට්ඨාස අපරාධ විමර්ශන කාර්යංශය මගින් විමර්ශනයක් ආරම්භ කර ඇති බව පැවසේ.

පොලිස් භාරයේ සිටි මෙම තරුණයා රෝහලේ ප්‍රතිකාර ලබමින් සිටියදී අප්‍රේල් 02 දින අළුයම් කාලයේදී මිය ගොස් තිබුණි.

මෙසේ මිය ගොස් තිබුණේ වැලිකඩ පොලිසිය විසින් අප්‍රේල් මස පළමුවැනිදා සැකපිට අත්අඩංගුවට ගත් 26 හැවිදිරි සත්සර නිමේෂ් නමැති තරුණයෙකි.

සිදුවීම සම්බන්ධයෙන් නිවේදනයක් නිකුත් කරමින් පොලීසිය සඳහන් කළේ, අප්‍රේල් 01 දින රාත්‍රී කාලයේ වැලිකඩ පොලිස් වසමේ නාවල ප්‍රදේශයේ නිවසකට පුද්ගලයෙකු ඇතුළු වී සිටින බවට වැලිකඩ පොලිසියට ලද තොරතුරක් අනුව වැලිකඩ පොලිස් ස්ථානයේ නිලධාරින් කණ්ඩායමක් විසින් එම ස්ථානයට ගොස් විමර්ශන ආරම්භ කර තිබූ බවයි.

පොලිස් නිලධාරින් එම නිවසට ඇතුල් වූ පුද්ගලයාගෙන් ප්‍රශ්න කිරීමේදී ඔහු යම් මානසික ආබාධයකින් පෙළෙන පුද්ගලයෙකු බවට නිරීක්ෂණය වන ආකාරයෙන් හැසිරීම හේතුවෙන් මෙම අයගේ ආරක්ෂාව සඳහා වහාම පොලිස් ස්ථානය වෙත ඉදිරිපත් කර ඇති බවද පොලීසිය පවසා තිබේ.

එමෙන්ම, පොලිස් ස්ථානයේදී මෙම පුද්ගලයා කලහකාරී ලෙස හැසිරෙමින් සිර මැදිරිය ආශ්‍රිතව බිත්තියේ ඔහුගේ ශරීරයේ කොටස් වද්දා ගනිමින් නිලධාරීන්ට පාලනය කර ගැනීමට නොහැකි වන ආකාරයට හැසිරී ඇති බවත් ඒ අනුව නිලධාරීන් විසින් මහත් පරිශ්‍රමයක් දරා මෙම සැකකරු මුල්ලේරියාව මානසික රෝහල වෙත ඇතුළත් කළ බවත් පොලීසිය නිකුත් කළ නිවේදනයේ සඳහන් වේ.

මෙවැනි අස්වාභාවික ආකාරයේ නිවේදන පොලීසිය මෙම ඝාතන සම්බන්ධයෙන් නිකුත් කිරීම සාමාන්‍ය සම්ප්‍රදායක් වී තිබේ.

වැලිකඩ පොලිසියේ අත්අඩංගුවට පත් වූ ඔහු එදින එනම් පසුගිය (01)වනදා සිය මවට ඇමතුමක් ගෙන පොලිස් නිලධාරින් විසින් තමන්ට හිරිහැර කරන බවට දැනුම්දී ඇති බවටද තොරතුරු වාර්තා වේ.

ඊයේ (03) පැවති මරණ පරීක්ෂණයේදී හෙළි වී ඇත්තේ මියගිය තරුණයාගේ හිසේ සහ ශරීරයේ ස්ථාන රැසක තැලීම් තුවාල තිබෙන බවයි. එහෙත් ඒවා මරණයට හේතු වූයේද යන්න පිළිබඳව අධිකරණ වෛද්‍ය නිලධාරියා සඳහන් කර නැත. ඒ සඳහා මියගිය පුද්ගලයාගේ ශරීර කොටස් රස පරීක්ෂක දෙපාර්තමේන්තුවට යවා තිබේ.

සමාජ මාධ්‍ය හරහා අදහස් දක්වන පිරිස් පවසන්නේ මෙවැනි ආකාරයේ පොලිස් ඝාතන නැවත නැවතත් සිදුවීමට හේතුවී ඇත්තේ මෙම සිදුවීම් සම්බන්ධයෙන් නීතිය හරියාකාරව ක්‍රියාත්මක නොවීම බවයි. මෙම වගකිවයුතු පොලිස් නිලධාරීන් තාවකාලිකව වැඩ තහනමට ලක්වුවද ඔවුන් නැවත සේවයේ පිහිටවනු ලැබේ.

මෙම පොලිස් ඝාතනවලට තිත තැබීමට නම් ගතයුතු පළමු පියවර නම් මෙම නිලධාරීන්ට විරුද්ධව නීතිය ක්‍රියාත්මක කිරීමයි. එය වැලිකඩට පමණක් නොව අතීතයේ සිදුවූ ඒවාටද අදාළ විය යුතුය.