වත්මන් මහජන නැගීටීම අවසන් විය යුත්තේ කෙසේ දැයි යෝජනා කරන ‘සටන් පුවරුවකට’ අදාලව (මෙහි වන) ට්වීට්ටුව්ස්කට, අද උදේ මම ප්‍රතිචාර දැක්වීමි. මා කීවේ, මේකී විගණනයට’ රාජ්‍ය අපරාධකාරීත්වය ඇතුළත් ද යන්න යි.
‘ගෝල් ෆේස් ග්‍රීන්’ ෆුල් ෆේස් සටනෙහි සටන්කාමී ‘සතුට’ හා ‘ප්‍රමෝදය’ රැක ගන්නට ‘හොරා හොරා ගෝඨා හොරා’ වැනි හෝ මවිසින්ම ලියැවුණු ‘පල්හොරුනි, පල්හොරුනි’ වැනි රාජ්‍ය මංකොල්ලකාරීත්වයට අදාල සටන් පාඨ ඉවහල් විය හැකි වුවත් සටනෙහි ‘අනුරාගය’ පිණිස නම් රාජ්‍ය අපරාධකාරීත්වය පිළිබඳ සටන් පාඨ අතට ගත යුතු ය.
මීනි මෝරු – ඇති කෙරුවා
උන්ට කන්න – මිනි මැරුවා
ඇමෙරිකානු – රණවිරුවා
ඉන්දු සයුරු – රතු කෙරුවා
නමුත් මෙවන් සටන් පාඨ ‘ගෝල් ෆේස් ග්‍රීන්’ සටන් බිමේ ඇසෙන්නේ නැත. ඒ වෙනුවට රණවිරුවන්ට මල් පුදයි. පොලීසියට තේ බෙදයි.
ඉතිහාසය පුරා රාජ්‍යය මර්දනයේ ‘උපරකරණය’ ලෙස සිටි ත්‍රිවිධ හමුදාව සහ පොලීසිය ගෝඨභයගෙන් පසුව නිශ්චිතවම රාජ්‍ය පාලනයේ පංගුකාරයන් කර ගැනුණි.
මංකොල්ලකාරීත්වය සේම දීර්ඝ අපරාධ ලැයිස්තුවක් ‘ගෝල් ෆෙස්’ සටන් බිමෙහි දක්නට නො ලැබිම අතිශය දේශපාලනික ප්‍රවේශයක් බව පෙනේ. එහි ලීවරය සොයා පහදා ගැනීම මෙම මහජන සටනට අදාල වැදගත් සහ තීරණාත්මක කාරණාවන් බව අවධාරණය කළ යුතු ය.
පක්ෂ දේශපාලනය ගෝල්ෆේස් සටන් බිමට වැද්ද නොගත යුතුයි යැයි කියන ‘සටන් තාරුණ්‍යයේ’ සටන් පාඨය නිර්මාණය වීම ස්වයං සිද්ධ නැත. එහි පසුබිමෙහි අතිශය බරපතල ‘සිංහල ජාතිකවාදී’ දේශපාලනයක් තිබේ. දින කිහිපයක් එය මතුපිටට ඒම අල්ලාගෙන ඉන්නට ගෝල්ෆේස් සටන් බිමට හැකි වුවද ඉන් ඉක්බිති ක්‍රමයෙන් එය නිරාවරණය වන්නට විය.
‘’පව් සමාකරගැනීමේ කලාකාර පෝලිම්’ ඇති විය.
ජාතික කොඩියේ සිංහයා අධිනිෂ්චය විය.
සටන් ගී වෙනුවට ‘සිංහල’ ජාතික ගීය අධිනිෂ්චය විය.
සිංහල දේශානුරාගී හා ජාත්‍යානුරාගී ගී ළෙලදෙන්නට විය. මෙවන් ගී ගයනා අතරතුර ප්‍රිතියන් නටන පිරිස් මතුවිය.
නන්දාගේ ‘තුන්හෙලේ කැලෑතුළ සිංහ පැටව්’ සාමුහිකව ගැයුණි.
වික්ටර් භෞතිකවම ගෝල් ෆේස්’ සටන් බිමට පැමිණ ‘අපි ඔක්කොම රජවරු ඔක්කොම වැසියෝ තුන් සිංහලටම නෑදෑයෝ’ කියන විට ඊට අත්වැල් අල්ලන්නේ ‘ශ්‍රී ලංකික ජාතියක්’ වෙනුවෙන් පෙනී සිටිමින් ගෝඨා ඇතුළු රාජපක්ෂ පරපුර පරසක්වල ගසන සටන් කාමීන් සහ සටන් කාමිනියන්ම වීම තුළ ඇති විසංවාදය සටන් බිම තේරුම් ගත යුතු ය. හිතවත් ‘දෙමළ’ කිහිපදෙනෙකු හැර පොදුවේ දෙමළ ජන නියෝජනයක් ‘’ගෝල් ෆේස්’ සටනේ පෙනෙන්නට නැත. දෙමළ ජනතාවට ගෝඨාභය ඇතුළු රාජ්‍යට අදාල සටන් පාඨ ‘මංකොල්ලකාරීත්වය’ට පමණක් ඌණනක කරන්නට බැරි ය. මුස්ලිම් ප්‍රජාව කොහොමත්, සිංහ කොඩිය වන්නට කී විට එය කරන, කැවුම් කොකිස් බෙදන්ට කී විට ඒවා බෙදන අවනතකාමී ප්‍රජාවකි. නමුත් ඔවුන් සටන තුළ රඳවා ගැනීම ඔවුන් කෙරෙම් ම මතු විය හැකි සටන් පාඨ වලට ගෝල් ෆේස් සටන් බිමේ ඉඩක් තිබේ ද?
ගෝල් ෆේස් පිට්ටනිය කිරිඋතුරවා, කිරිබත් කා, රබන් ගසා අවුරුදු සැමරූ, එමෙන්ම සටනේ සිටින අප මිත්‍රවරු මිත්‍රවරියන් පැවසූ ලෙස ‘යාපනයෙන් ගෝල්ෆේස් නෑ ගම් ආ’ සිංහල – හින්දු අලුත් අවුරුද්ද දවසට, උතුරේ දෙමළ මාතාවන් තමන්ගේ දරුවන්ට යුක්තිය ඉල්ලා කරන අඛන්ඩ අරගලයට දින 1881කි. සතියක් ඉක්මවීමෙන් උත්කර්ෂයට පත්වී සිටින ‘සටන්කාමි’ ‘නිදහස්කාමී’ තරුණ තරුණියනි, මේ රටේම අධිෂ්ඨනශීලි ධෛර්ය සම්පන්න නිර්භීත දෙමළ මාතාවන්ගෙන් ඉගෙන ගත යුතු පාඩම් බොහෝ ය. මෙකී ‘මාතා සටන’ අත්හැර ඔබ පතන උස් නිදහස ‘සිංහල’ සටන් පාඨයක් පමණක් බව අතිශය සහෝදරත්වයෙන් අවධාරණය කරමි.
රාජ්‍ය අපරාධකාරීතවයේ මැත කාලීන ප්‍රකට උදාහරණ කිහිපයක් පහතින් දක්වමි. මට මඟ හැරුණු සහ අප්‍රකට සිදුවීම් තිබේ නම් පහතින් කොමෙන්ට් කිරීමට ඔබට හැකි ය.
සිවරාම්
රොෂෙන් චානක
ලසන්ත
නඩේසන්
එක්නැලිගොඩ
කීත් නොයාර් – පෝද්දල
ත්‍රීමලේ ශිෂ්‍යයින් සහ සුගීර්තරාජන්
සිරස-උදයන්-සියත- ජාතික රූපවාහිනිය
ශ්‍රී පති
යුද අපරාධ
ඉසෙප්‍රියා
බාලචන්ච්‍රන්
සුදු කොඩි ඝාතන
2009 බාර වූ සටන්කාමීන් අතුරුදහන් කිරීම
තිසෛනායගම්, ජසීහරන් හා වලර්මදී
ලලිත් හා කූගන්
මාතලං හා ටොක්කා
කොළඹ සුදුවෑන්
තාජුඩීන්
මහර – වැලිකඩ
හලාවත ඇන්තනි – ජේසුමරියා
රතුපස්වල
විද්‍යාදරන්
කුගනාදන්
යාපනය සරසවියේ නඩරා ගජන් හා විජයකුමාර්
පාස්කු දින ප්‍රහාරය
අඟලානෙ අමිත්
ආයුද පෙන්නන්නට ගිය පාතල චණ්ඩි
ශක්තික
වෛද්‍ය සාෆි
කෝගුලදාසන්
අහ්නාෆ් ජසීම්
හිජාස් හිස්බුල්ලා
