අල්ලස් කොමිසම විසින් දූෂණ චෝදනා යටතේ ගොනු කර තිබූ චෝදනා වලට වරදකරු කළ උතුරු මැද පළාතේ හිටපු ප්‍රධාන අමාත්‍ය එස්.එම්.රංජිත් සහ ඔහුගේ පුද්ගලික ලේකම්වරිය ලෙස කටයුතු කළ ශාන්ති චන්ද්‍රසේන යන විත්තිකරුවන්ට කොළඹ මහාධිකරණය විසින් බරපතළ වැඩසහිත වසර 16 බැගින් සිරදඬුවම් නියම කර තිබේ.

ඊට අමතරව විත්තිකරුවන්ට රුපියල් ලක්ෂ දෙක බැගින් දඩ ද නියම වුණි.

උතුරු මැද පළාතේ ප්‍රධාන අමාත්‍යවරයා වශයෙන් කටයුතු කළ සමයේ නීතියට පටහැනි ලෙස ඉන්ධන දීමනා ලෙස රුපියල් 2,080,500ක් ලබාගැනීම තුළින් දූෂණය නැමැති වරද සිදුකළේ යැයි චෝදනා කරමින් මෙම විත්තිකරුවන්ට එරෙහිව අල්ලස් කොමිසම විසින් එම නඩුව ගොනුකර තිබුණි.

එසේම ආණ්ඩුවේ ඇතැම් පාර්ශව මෙම අත්අඩංගුවට ගැනීම ආණ්ඩුව ආරම්භ කර ඇති වංචාවට හා දුෂණයට එරෙහි ගමනේ එක් පියවරක් ලෙස පෙන්වීමට උත්සාහ ගත්තද මෙය කාලයකට ඉහත පවරන ලද නඩුවක් බව පැවසේ.

එස්. එම් රංජිත්ට එරෙහිව අල්ලස් කොමිසම නඩු පවරන්නේ 2021 වසරේ බවට දැන ගැනීමට ඇති අතර ඔහුට විරුද්ධව අධිචෝදනා ගොනු කර ඇත්තේ 2023 වසරේදීයි.

ඒ අනුව, දීර්ඝ නඩු විභාගයකින් අනතුරුව විනිසුරුවරයා සිය තීන්දුව ලබා දෙමින් පැවසූවේ, විත්තිකරුවන්ට එරෙහිව පැමිණිල්ල විසින් ගොනු කර ඇති චෝදනා සාධාරණ සැකයෙන් ඔබ්බට ඔප්පු කර ඇති බවයි.

ඒ අනුව අල්ලස් පනත යටතේ ගැනෙන දූෂණය නම් වරද සිදු කිරීමට විත්තිකරුවන් දෙදෙනා වරදකරුවන් කරමින් මහාධිකරණ විනිසුරුවරයා දඩුවම් නියෝග නිකුත් කළා.

එස්.එම්. රංජිත් හිටපු අමාත්‍ය එස්.එම්. චන්ද්‍රසේනගේ සහෝදරයා වන අතර, ශාන්තිනි චන්ද්‍රසේන යනු එස්.එම්. චන්ද්‍රසේනගේ බිරිඳයි.