සෞඛ්‍ය අමාත්‍යවරයා අද සමසෞඛ්‍ය ගැටලුව ගැන කැබිනට් මාධ්‍ය හමුවේදී මාධ්‍යවේදියෙක් අහපු ප්‍රශ්නෙකට උත්තර දුන්නා. එක්කෝ ප්‍රශ්නෙ අහපු මාධ්‍යවේදියා තරමටවත් අමාත්‍යවරයාට සමසෞඛ්‍ය සිසුන් ඉදිරිපත් කරන ගැටලුව ගැන අදහසක් නෑ. එහෙම නැත්තං උඹලා මොක කිව්වත් අපිට ඕනි එක තමයි කරන්නෙ වගේ ප්‍රතිපත්තියක් ආණ්ඩුව අනුගමනය කරනවා. මෙච්චර කතාබහක් ඇති වෙලා තියෙද්දිත් මේ ප්‍රශ්නෙ ගැන සාවධානව අදාළ පාර්ශ්ව සමඟ සාකච්ඡා කරන්නවත් ආණ්ඩුව නම්‍යශීලී නෑ. ඇමති කියන්නෙ රනිල් + රාජපක්ෂ ආණ්ඩු කියපු බංකොලොත් කතාවමයි. මොකක්ද? “පුරප්පාඩු අඩුයි, පිරිස වැඩියි, ඔක්කොම ගන්න බැරි නිසා විභාගයක් තියනවා.”
අපි නලින්ද ජයතිස්සගෙන් අහන්නෙ ඇයි සමසෞඛ්‍ය උපාධිධාරීන් මෙච්චර වැඩි වුණේ? කොතලාවලින් එළියට එන්න පටන්ගන්නකම් මේ ප්‍රශ්නෙ තිබ්බෙ නෑනෙ. මොකෙක්ට මොකෙක්ට හරි සල්ලි ගරාගන්න පෞද්ගලික විශ්වවිද්‍යාල කියලා උපාධි කඩ අටවගන්නවා. බිස්නස් එක වැඩි කරගන්න ඒවගෙ උපාධි ගන්න අයට රජයේ රැකියාවලට ප්‍රවේශයත් හදල තියෙනවා. රජයේ විශ්වවිද්‍යාලවල ප්‍රමාණවත් තරම් සමසෞඛ්‍ය උපාධිධාරීන් බිහිවෙද්දි කොතලාවල, KIU වගේ උපාධි කඩවලත් ඒවා විකුණන්න පටන්ගත්තෙ ඇයි? හරි, ඒක කරේ පරණ ආණ්ඩු කියමුකො. ඉතිං නලින්ද ජයතිස්සලා ඒ ආණ්ඩු කරපුවා ආරක්ෂා කරන්න යන්නෙ ඇයි?
දවස් 28න් බ්‍රොයිලර් කුකුල්ලු හදනවා වගේ මේ උපාධි කඩවලත් කිසිම හෙවිල්ලක් බැලිල්ලක් නැතිව සහතිකයක් අතට දීලා උපාධිධාරීන් එළියට දානවා. ඒ උපාධිවලට මේ රටේ පිළිගැනීමකුත් නෑ. ජාත්‍යන්තර පිළිගැනීමකුත් නෑ. අන්තිමේදි වෙන්නෙ ඒවගෙන් ඉගෙනගන්න ගිය ළමයි අතේ තියෙන තුට්ටු දෙකටත් තට්ටු කරගෙන අසරණ වෙන එක. දැන් ඇවිල්ල තියෙන ප්‍රශ්නෙ මේ උපාධි කඩවලට තව ලාභ ගන්න නම් නැති පිළිගැනීම කෘතිමව හරි හදල දෙන්න වෙනවා. ඒකට තමයි අර ඩිප්ලෝමා දෙන කාලෙ පාවිච්චි කරපු හද්දා පරණ බඳවාගැනීම් පටිපාටියක් අනුගමනය කරන්නෙ. අන්තිමට රජයේ විශ්වවිද්‍යාලවල සමසෞඛ්‍ය පීඨ ටිකත් අර්බුදයට යනවා, සෞඛ්‍ය සේවයත් අර්බුදයට යනවා. ඒ නිසා අපි සෞඛ්‍ය අමාත්‍යවරයට අවධාරණය කරන්නෙ වටවංගු ගහන්නැතිව ඇත්ත ප්‍රශ්නෙ ආමන්ත්‍රණය කරන්න. සමසෞඛ්‍ය උපාධිධාරීන්ගේ ඉල්ලීම් මෙච්චරයි, සරලයි.
1. UGC අනුමත Merit List එකෙන් බඳවගන්න. උපාධි කඩවලට ප්‍රවේශය දෙන බොරු තරඟ විභාග එපා.
2. සමසෞඛ්‍ය උපාධිධාරීන්ට සීමාවාසික පුහුණුවක් ඕනි.
3. බ්‍රොයිලර් ක්‍රමයට උපාධිධාරීන් හදලා සෞඛ්‍ය කේෂ්ත්‍රයත් අනතුරට දාන උපාධි කඩ වහල දාන්න.
4.මේ ප්‍රශ්න කතා කරන්න ගිහින් ඔයාගෙ ආණ්ඩුවෙන් අත්අඩංගුවට ගත්ත කොල්ලො දෙන්න නිදහස් කරන්න.
අතරමැද සමාදාන කතා නෑ. බොරු පම්පෝරි ගහන්නැතිව නලින්ද ජයතිස්ස ඇමතිතුමෝ මේ ප්‍රශ්නවලට උත්තර දෙන්න.
