Breaking News

71 විරුවන් සමරන දිනයේදී JR ව ඉක්මවා ඉන්දියාවට යටත් වීමට අනුර සූදානම්

සමන්සිරි හේරත්

රනිල් වික්‍රමසිංහලාගේ මනුෂ්‍යත්වයට එරෙහි ඝාතන ඉතිහාසය තුළ බටලන්ද වධකාගාරය පුංචිම පුංචි නිදසුනක් පමණයි. මේ වධක ඉතිහාසය ආරම්භ වන්නේ 1987 බලහත්කාරී ඉන්දියානු මැදිහත්වීමට යටත්ව ජේ.ආර් ජයවර්ධන රජීව් ගාන්ධි සමඟ ඉන්දු ලංකා ගිවිසුම අත්සන් කිරීමත් සමඟයි. එදා ඉන්දියාව දේශපාලනික වශයෙන් දුබල වෙමින් සිටි ජේ.ආර් ජයවර්ධනගේ අත මිරිකා යටත් කරගෙන බලහත්කාරයෙන් ඉන්දු ලංකා ගිවිසුම අත්සන් කරන අවස්ථාවේදී ඊට විරෝධය දක්වමින් ප්‍රගතිශීලි බලවේග සමග පාරට බැස්සේ එවක ජනතා විමුක්ති පෙරමුණයි.

ඉන්දියානු බලහත්කාරයට යටත්ව රට පාවාදීමට එරෙහිව අරගල කළ ජනතාවටත්, ජනතා විමුක්ති පෙරමුණටත් එක්සත් ජාතික පක්ෂය පිළිතුරු ලබා දුන්නේ දැවැන්ත මර්දනයක් මුදා හරිමින්. එම මර්ධනයේ හස්තයට යටවී රෝහණ විජේවීර ඇතුළු හැටදහසකට පමණ ජීවිත අහිමි කරගන්නට සිදුවුණා.

එපමණක් ද නොව ජනතා විමුක්ති පෙරමුණ තහනම් සංවිධානයක්ව රෝහණ විජේවීරගේ මරණින් පසුව යටි බිම් ගතව සැඟව යන්නට සිද්ධ වුණා . ඉන්දියානු බලහත්කාරී මැදිහත්වීමටත්, ජේ.ආර් ප්‍රමුඛ එක්සත් ජාතික පක්ෂ මර්ධනකාරී භීෂණ ඉතිහාසයට වසර 38ක් ගත වී තිබේ.


38 වසරකට පසුව දෛවෝපගත සිදුවීමක් අප හමුවට පැමිණ තිබීම අප තේරුම් ගත යුත්තේ කෙසේද ?


අප්‍රියල් හතරවෙනිදා අපේ මෝදි අගමැතිතුමා ලංකාවට එනවා. මෑත ඉතිහාසය තුළ වැදගත් රාජ්‍ය නායකයෙක් ලංකාවට ඇවිත් තියෙනවද? වසර දහයකට පමණ පසුව ඉන්දියාවේ අගමැති ලංකාවට පැමිණීම අපිට වැදගත් වෙන්නේ නැද්ද?

පළාත් පාලන මැතිවරණ ජන හමුවකදී අනුර කුමාර දිසානායක මෝදිගේ පැමිණීම පිළිබඳව ප්‍රකාශ කරන්නේ එහෙමයි.

මෝදි ලංකාවට පැමිණෙන්නේ කාලය කා දැමීමේ සංචාරයක් ලෙස නොව බරපතල දේශපාලන තීන්දු තීරණ කිහිපයක් අර ගැනීමේ අරමුණ ඇතිවයි. ලංකාවේ දේශපාලන වේදිකාව මතත් ඉන්දියානු මාධ්‍ය තුළත් වැඩි අවධානයක් යොමු කර තිබෙන්නේ මෝදි සහ ශ්‍රී ලංකා රජය අතර අත්සන් කිරීමට නියමිත ආරක්ෂක සහයෝගිතා ගිවිසුම ක් පිළිබඳ කාරණාවයි.

සමගි ජන බලවේගය ජනතාවට ලබා දුන් පොරොන්දු වලට පිටින් ආණ්ඩුව ඉන්දියාව සමග ගිවිසුම් වලට අවසන් කරන්න යන බවට චෝදනා නගනවා . රටට, ජනතාවට, පාර්ලිමේන්තුවට, කිසිවක් නොකියා අත්සන් කරන්න සූදානම් වන ගිවිසුම් වලට එරෙහිව සමගි ජන බලවේගය විරෝධය දක්වන බව තිස්ස අත්තනායක ජන හමුවකදී ප්‍රකාශ කළා.

පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩද මේ සම්බන්ධයෙන් අදහස් දක්වමින් කියා සිටියේ මෙවැනි ගිවිසුම් මීට ප්‍රථම ලංකාව අත්සන් කර නැති බවයි. අනුර කුමාර දිසානායක මෝදි සමඟ අත්සන් කිරීමට සූදානම් වන මාදිලියේ යුධ ගිවිසුම් ලංකා ඉතිහාසයේ ප්‍රථම වතාවට සිද්ධ කරන්නට සූදානම් වන්නේ ජාතික ජන බලවේගය බව ඔහු අවධාරණය කරනවා . එපමණක්ද නොව ඉන්දියානු පුවත්පත් උපුටා දක්වමින් ඔහු ප්‍රකාශ කළේ චීනයේ වර්ධනය වෙන යුධ බලයට ප්‍රතිබලයක් ලෙස ලංකාව සහ ඉන්දියාව යුද ගිවිසුමක් අත්සන් කරන බව ඉන්දියානු පුවත්පත් වාර්තා කර තිබෙන බවයි.

මේ තුළින් සිද්ධ වෙන්නේ චීනයට එරෙහිව ලංකාව භාවිතා කිරීමට ඉන්දියාවට බලය ලබාදීමයි. මේ ද්‍රෝහී ගිවිසුම අත්සන් කිරීමට නියමිතව තිබෙන්නේ අප්‍රියල් මාසේ පස්වෙනිදා. 1987 ඉන්දියාව සහ ලංකාව අත්සන් කළ ඉන්දු ලංකා ගිවිසුමට පසුව අත්සන් කරන වැදගත්ම ගිවිසුම මේක.

එදා1987 ජේ.ආර්ව යටත් කරගෙන බලහත්කාරයෙන් මැදිහත්වීම් කළ ඉන්දියාව 1987 ඉන්දියානු බලහත්කාරී මැදිහත්වීමට එරෙහිව අරගල කළ ජනතා විමුක්ති පෙරමුණ අද ආණ්ඩු බලය හොබවන මොහොතේදී ලංකාව ආර්ථිකමය වශයෙන් දුබලව පවතින මොහොත උපයෝගී කරගෙන මෝදි අනුර කුමාරගේ අත මිරිකා යටත් කරගෙන තිබේ.

අප මෙය දකින්නේ දෛවෝපගත සිදුවීමක් ලෙසය. එපමණක් ද නොව මේ ගිවිසුම අත්සන් කරන්නට යොදාගෙන තිබෙන දිනයද අතිශයින් වැදගත් දිනයකි. අප්‍රේල් මාසේ පස්වන දා යනු 71 අරගල සැමරුම් දිනයයි. ජනතා විමුක්ති පෙරමුණ බලය හොබවන ආණ්ඩුව එදිනට ඉන්දියානු මැදිහත්වීමට යටත්ව යුධ ගිවිසුමකට අත්සන් තැබීම මොනතරම් බරපතල දේශපාලන යටත් වීමක්ද?

leave a reply