පොදු ව්‍යාපාර පිළිබඳ පාර්ලිමේන්තු කාරක සභාවේ (කෝප් කමිටුව) සභාපති මහාචාර්ය රංජිත් බණ්ඩාර ශ්‍රී ලංකා ක්‍රිකට් ආයතනයේ දූෂණ වංචා සහ අක්‍රමිකතා පිළිබඳ විමර්ශන කටයුතුවලින් ඉවත් කර තිබෙනවා.
ඊට පාර්ලිමේන්තුවේ සියලුම පක්ෂ නායකයන් එකඟත්වය පළ කර ඇති බවයි වාර්තා වන්නේ.
ශ්‍රී ලංකා ක්‍රිකට් ආයතනය පිළිබඳ විමර්ශන කටයුතු කෝප් කමිටුවේ වෙනත් සාමාජිකයකුගේ මූලිකත්වයෙන් පැවැත්වීමට තීරණය කර ඇති බව සඳහන්.
කෙසේ වෙතත් මෙය රංජිත් බණ්ඩාර ඇතුළු කමිටු සාමාජිකයන් සමග සාකච්ඡා කිරීමෙන් අනතුරුව සිදු කළ යුතු බවයි කතානායකවරයා එහිදී ප්‍රකාශ කර ඇත්තේ.
මේ අතර කෝප් කමිටුවේ සභාපති මහාචාර්ය රංජිත් බණ්ඩාරට එරෙහිව සමගි ජන බලවේගය පක්ෂය විශ්වාසභංග යෝජනාවක් ගෙන ඒමට නියමිතව තිබුණ ද ඒ පිළිබඳ කිසිදු කතා බහක් නොමැති බව දක්නට ලැබේ.
ක්‍රිකට් අර්බුදයෙන් පසු තාවකාලිකව නතර කෙරුණු කෝප් කමිටුවේ විමර්ශන කටයුතු යළි ආරම්භ කිරීමට ද එහිදී එකඟත්වයට පැමිණ තිබෙනවා. කෝප් විපක්ෂයේ මන්ත්‍රීවරු කතානායකවරයාට පෙන්වා දී තිබුනේ කමිටුවේ සභාපතිවරයා සහ ශ්‍රී ලංකා ක්‍රිකට් ආයතනය අතර බැඳියාවන් අතර ගැටුමක් පවතින හෙයින් ඔහු එම ආයතනය සම්බන්ධ විමර්ශන කටයුතුවලින් වහාම ඉවත් කරන ලෙසයි.
2022 ජාත්‍යන්තර ක්‍රිකට් කවුන්සිලයේ T-20 ලෝක කුසලානය(පිරිමි) ක්‍රිකට් තරගාවලිය ආශ්‍රිත විශේෂ විගණන වාර්තාව ඇතුළු කරුණු විමර්ශනය සඳහා ශ්‍රී , ලංකා ක්‍රිකට් බලධාරීන් කැඳවූ අවස්ථාවේ අතින් සංඥා කරමින් සාක්ෂිකරුවන්ට තම ප්‍රකාශ ලබාදීම වළක්වන ආකාරය දැකිය හැකිවිය. මෙම සිදුවීම වන්නේ ක්‍රිකට් ආයතනයට එරෙහිව බරපතල මූල්‍ය වංචා චෝදනා එල්ල වී ඇති පසුබිමකයි.
කෝප් කමිටුවට පැවරී ඇති ප්‍රධාන වගකීම වන්නේ රාජ්‍ය ආයතනවල සහ අර්ධ රාජ්‍ය ආයතනවල මූල්‍ය විනය පවත්වාගෙන යාම සහතික කිරීමයි. එවැනි කමිටුවක මූල්‍ය වංචා හෙළිවීම වැලැක්වීමට යයි සිතිය හැකි පරිදි සදාචාර විරෝධීව කටයුතු කළ පුද්ගලයෙකු තවදුරටත් සභාපති ධූරය දැරීම විහිළුවකි. එවැනි සභාපතිවරයෙකුගෙන් බලාපොරොත්තු විය හැකි මූල්‍ය විනය සහතික කිරීම කුමක්ද යන්න ගැටලුවකි.
