පාස්කු ප්‍රහාරය සම්බන්ධයෙන් ගොනු කර ඇති මූලික අයිතිවාසිකම් පෙත්සම්වලින් රනිල් වික්‍රමසිංහ ඉවත් කරන ලෙස ඉදිරිපත් කළ මූලික විරෝධතා පිළිබඳ කරුණු දක්වන ලෙස ශ්‍රේෂ්ඨාධිකරණය නියෝග කර තිබෙනවා.
පාස්කු ප්‍රහාරය වළක්වා ගැනීමට කටයුතු නොකිරීමෙන් මූලික අයිතිවාසිකම් කඩ වූ බව දක්වමින් ගොනුකර ඇති මූලික අයිතිවාසිකම් පෙත්සම්වල වගඋත්තරකරුවකු ලෙස නම් කර සිටින හිටපු අග්‍රාමාත්‍ය රනිල් වික්‍රමසිංහ ජනාධිපතිවරයා ලෙස පත්ව ඇති බැවින් ඔහුට එරෙහි නඩු කටයුතු පවත්වාගෙන යාමට නොහැකි බව දක්වමින් ඔහුගේ නීතිඥවරු මූලික විරෝධතාවක් ඉදිරිපත් කර තිබෙනවා.
ඒ අනුව මේ සම්බන්ධයෙන් හෙට (27) දිනයේ කරුණු දක්වන ලෙස අදාළ පෙත්සම්වල වගඋත්තරකරුවකු වශයෙන් නම් කර සිටින හිටපු ජනාධිපති මෛත්‍රීපාල සිරිසේනගේ නීතීඥවරුන්ට ශ්‍රේෂ්ඨාධිකරණය නියම කර තිබෙනවා.
අදාළ නඩුව පසුගියදා කැඳවූ අවස්ථාවේ රනිල් වික්‍රමසිංහ වෙනුවෙන් පෙනී සිටි නීතිඥ සුරේන් ප්‍රනාන්දු කියා සිටියේ, තම සේවාදායකයා ජනාධිපතිවරයා ලෙස පත්ව ඇති බැවින් ආණ්ඩුක්‍රම ව්‍යවස්ථාවේ 35 වන වගන්තිය යටතේ ඔහුට එරෙහිව නඩු කටයුත්තක් පවත්වාගෙන යාමට නොහැකි බවයි.
කෙසේවෙතත් අදාළ පෙත්සම අද කැඳවූ අවස්ථාවේ එම විරෝධතාව සම්බන්ධයෙන් පාර්ශව කිහිපයක් සිය විරෝධය පළ කිරීම හේතුවෙන් ඊට අදාළව හෙට දිනයේ කරුණු දක්වන ලෙස වගඋත්තරකරුවකු වන හිටපු ජනාධිපති මෛත්‍රිපාල සිරිසේන වෙනුවෙන් පෙනී සිටි ජනාධිපති නීතිඥ ෆයිසර් මුස්තාෆාට ශ්‍රේෂ්ඨාධිකරණය නියම කර තිබෙනවා.
ගෝඨාභය රාජපක්ෂ ජනාධිපති ධූරය දමා පැනගිය පසු අලුත් ජනාධිපතිවරයෙකු පත්කරගන්නා බව නිවේදනය කළ අවස්ථාවේ රනිල් වික්‍රමසිංහ ප්‍රසිද්ධියේ ජනතාවට පොරොන්දු වූවේ පාස්කු ප්‍රහාරය සම්බන්ධ විමර්ශන අවසන් කරන බවයි. අවසානයේ ඔහු සිද්ධ කරන්නට යන්නේ විමර්ශන අවසන් කිරීම කෙසේවෙතත් තමන් එයින් ගැලවීමට බව පෙනේ.
