මැයි දින සැමරුම තහනම් කිරීමට ආණ්ඩුව ගෙන ඇති තීරණයට වාමාංශික දේශපාලන පක්ෂ සහ වෘත්තීය සමිති තම විරෝධය පළ කර තිබෙනවා.පැතිර යන කොරෝනා වසංගත තත්ත්වය පාලනය කිරීම සඳහා මැයි දින ක්‍රියාමාර්ග නවතා දැමීමට ආණ්ඩුව කටයුතු කරන බව පැවසුවත් මෙම වෘත්තීය සමිති සහ දේශපාලන පක්ෂ පවසන්නේ මෙය ආණ්ඩුවේ දේශපාලන බංකොලොත්භාවය වසා ගැනීම සඳහා වසංගතයට මුවාවී ගනු ලැබූ දේශපාලන තීන්දුවක් බවයි.
මේ පිළිබඳව ජනතා විමුක්ති පෙරමුණේ හිටපු පාර්ලිමේන්තු මන්ත්‍රී සුනිල් හඳුන්නෙත්ති, එක්සත් සමාජවාදී පක්ෂයේ සිරිතුංග ජයසූරිය, ලංකා කම්කරු පොදු සේවක සමිතියෙ සභාපති සිල්වෙස්ටර් ජයකොඩි යන අයගෙන් අපි මේ පිළිබඳව විමසා සිටියා. ඔවුන් සියලු දෙනා පවසන්නේ ආණ්ඩුවේ මෙම ක්‍රියාමාර්ගය අනුමත නොකරන බවත් මැයි පළමුවෙනිදා කිසිදු පැකිලීමකින් තොරව මැයි දින සැමරුම් පවත්වන බවයි.
