අද පැවති ජාතික ජන බලවේගයේ බදුල්ල දිස්ත්‍රික් කාන්තා සමුළුව අමතමින් ජනාධිපතිවරයා සහ අගමැතිවරයා ගුරු පුරප්පාඩු පිරවීම ගැන කරන ලද සඳහන් කිරීම් ගැන කතා බහක් ඇතිව තිබේ.
ලබන වසරේ මාර්තු මාසය වන විට ගුරු සේවයට ගුරුවරුන් 30,000ක් බඳවා ගැනීමට සැලසුම් කර ඇති බවත්, ඉන් 23,000ක් උපාධිධාරීන් ලෙස මෙම වසර තුළ බඳවා ගැනීමට අපේක්ෂා කරන බවත් අග්‍රාමාත්‍ය හරිනි අමරසූරිය සඳහන් කර තිබේ.
බදුල්ලේ පැවති ජාතික ජන බලවේගයේ (NPP) කාන්තා සමුළුව අමතමින් අග්‍රාමාත්‍යවරිය සඳහන් කළේ, උපාධිධාරී ගුරුවරුන් 23,000ක් බඳවා ගැනීම සඳහා වන සම්මුඛ පරීක්ෂණ මෙම වසරේ නොවැම්බර් 20 වැනිදා ආරම්භ කිරීමට නියමිත බවයි.
එමෙන්ම, ජාතික අධ්‍යාපන විද්‍යාපීඨවලින් (Colleges of Education) අධ්‍යාපන ඩිප්ලෝමා ලබාගත් 6,000ක් දෙනා ලබන වසරේ පෙබරවාරි මාසය වන විට ගුරු සේවයට බඳවා ගන්නා බව ඇය වැඩිදුරටත් පවසා තිබේ.
කෙසේවෙතත් ජනාධිපතිවරයාද පවසන්නේ ගුරුවරු 23000ට ආසන්න ප්‍රමාණයක් බඳවා ගන්නා බවයි.
මේ අතර ගුරු බඳවා ගැනීම් සඳහා නිකුත් කරන ලද ගැසට් නිවේදනයේ පවතින අක්‍රමිකතා සහ අපැහැදිලි කරුණු හේතුවෙන් අධ්‍යාපන පද්ධතිය තුළ අර්බුදයක් නිර්මාණය වී ඇති බවත්, ඒ යටතේ පුරප්පාඩු දහස් ගණනක් තවමත් පුරවා නොමැති බවත් ලංකා ගුරු සංගමය (CTU) අනතුරු අඟවා තිබේ.
මුලින් ගුරු පුරප්පාඩු 46,000ක් පවතින බව රජය පිළිගත් නමුත්, පසුව එම සංඛ්‍යාව 36,000ක් ලෙස සංශෝධනය කළ බව ලංකා ගුරු සංගමයේ ප්‍රධාන ලේකම් ජෝසප් ස්ටාලින් පැවසීය. කෙසේ වෙතත්, රජය තීරණය කර ඇත්තේ ගුරුවරුන් 23,000ක් පමණක් බඳවා ගැනීමට වන අතර, මූලික සම්මුඛ පරීක්ෂණ වටය සඳහා අයදුම්කරුවන් 17,000ක් පමණ කැඳවා ඇති බව ද ඔහු සඳහන් කරයි.
ලබන මස මැද භාගයේදී සම්මුඛ පරීක්ෂණ ක්‍රියාවලිය ආරම්භ කිරීමට නියමිත බැවින්, ජනවාරියට පෙර පත්වීම් ලබා දීම සිදු නොවනු ඇතැයි පෙන්වා දුන් ඔහු, මෙම පුරප්පාඩු පුරවන්නේ කවදාදැයි ප්‍රශ්න කර තිබේ.
මෙම පුරප්පාඩු වසර එකහමාරකට වැඩි කාලයක් පුරවා නොමැති වීම හේතුවෙන්, දැඩි ගුරු හිඟයක් මධ්‍යයේ පාසල් පවත්වාගෙන යාමට සිදුව ඇති බව ස්ටාලින් පැවසීය.
ගුරු හිඟය විසඳීමට පියවර නොගෙන අධ්‍යාපන ප්‍රතිසංස්කරණ ක්‍රියාත්මක කිරීමට යාම සම්බන්ධයෙන් ද ඔහු රජය විවේචනය කළ අතර, ගුරුවරුන් නොමැති වීම සිසුන්ට බරපතල බලපෑමක් එල්ල කරන බවට අනතුරු ඇඟවීය.
මේ අතර, ආදේශක ගුරුවරුන් පත් නොකිරීම හේතුවෙන් ගුරුවරුන් විශාල පිරිසකට ස්ථාන මාරුවීම් ලබා ගැනීමට නොහැකි වී ඇති බව ඔහු පැවසීය. ඇතැම් ගුරුවරුන් වසර 12ත් 13ත් අතර කාලයක් එකම පාසලේ සේවය කරමින් සිටියද, ඔවුන්ට ස්ථාන මාරුවීම් ලබා ගැනීමට නොහැකි වී ඇතැයි ඔහු වැඩිදුරටත් සඳහන් කරයි.
බඳවා ගැනීමේ විභාග සඳහා නිකුත් කරන ලද ගැසට් නිවේදනයේ පවතින අපැහැදිලි කරුණු සහ අඩුපාඩු මෙම අර්බුදයට හේතු වී ඇති බව ස්ටාලින් ප්‍රකාශ කර තිබේ.
බඳවා ගැනීම් සිදු කිරීමේදී පවතින දීර්ඝ ප්‍රමාදය හේතුවෙන් පුරප්පාඩු පුරවා නොතිබීම සහ ගුරුවරුන්ට මෙන්ම සිසුන්ට ද මුහුණ දීමට සිදුව ඇති දුෂ්කරතා සම්බන්ධයෙන් වගකීම භාර ගන්නේ කවුරුන්දැයි ඔහු ප්‍රශ්න කර ඇත.
