ඉදිරි ජනාධිපතිවරණ අපේක්ෂකයෙකු ලෙස ඉදිරිපත් වන්න කියා ශ්‍රී ලංකා නිදහස් පක්ෂයේ මධ්‍යම කාරක සභාවේ බහුතරයක් තමන්ගෙන් ඉල්ලීම් කර ඇති බව විජයදාස රාජපක්ෂ පවසනවා.අධිකරණ ඇමැති විජයදාස මේ බව ප්‍රකාශ කළේ අප්‍රේල් 15 වනදා රාත්‍රියේ අටමස්ථානාධිපති බැහැ දැකීමෙන් අනතුරුව මාධ්‍ය වෙත අදහස් දක්වමිනි. මහා සංඝරත්නය ද ඔහුට ජනාධිපතිවරණ සටනට පිවිසෙන්නට කියා ආරාධනා කළ බවද ඔහු එහිදී ප්‍රකාශ කළා.
මාධ්‍යවේදීන් නැගූ පැනයකට පිළිතුරු දෙමින් විජයදාස රාජපක්ෂ කියා සිටියේ අද රටේ කිසිදු දේශපාලන පක්ෂයක් පිළිබඳව ජනතාවගේ විශ්වාසයක් නැති බවයි. පක්ෂයකට ජන්දය දෙනවා වෙනුවට පුද්ගලයා දෙස බලා ජනතාව ඡන්ද ප්‍රකාශ කිරීමට පෙලඹෙන බව ඔහු කියා සිටියා.
අද ( අප්‍රේයල් 16) මාධ්‍ය හමුවේදී ශ්‍රී ලංකා නිදහස් පක්ෂය විජයදාස රාජපක්ෂට පිළිතුරු ලබා දී තිබුණා. එක්සත් ජනතා නිදහස් සන්ධානයේ මහ ලේකම් තිලංග සුමතිපාල කියා සිටියේ එවන් ආරාධනයක් තම පාර්ශවයෙන් කර නැති බවයි. ඉදිරි ජනාධිපතිවරණ ක්‍රියාමාර්ග පිළිබඳව තමන් තවමත් තීරණයකට පැමිණ නැති බව ඔහු ප්‍රකාශ කළා.
