මීතොටමුල්ල කසළ කන්දෙන් නිසි ප්‍රයෝජනයක් නොගැනීම නිසා නැවත කඩාවැටීමේ අවදානමක් ඇතිවිය හැකි බවට කොළඹ දිස්ත්‍රික් සම්බන්ධීකරණ කමිටුවේදී සාකච්ඡාවට ලක්ව තිබෙනවා.
එම කසළ කන්ද ආශ්‍රිතව ‘‘වලාකුළු උද්‍යානයක්’’ ඇතුළුව රුපියල් මිලියන 3400ක සංවර්ධන ව්‍යාපෘති ක්‍රියාත්මක කිරීමට නාගරික සංවර්ධන අධිකාරිය සැලසුම් කර තිබුනද එම කටයුතු බාර ගැනීමට මෙතෙක් කිසිදු ආයෝජකයකු ඉදිරිපත් වී නොමැති බවයි සඳහන් වන්නේ.
අවිධිමත් ලෙස කසළ බැහැර කිරීම හේතුවෙන් මීතොටමුල්ල කසළ කන්ද 2017 වසරේදී කඩා වැටුණා.
ඒ හේතුවෙන් පුද්ගලයන් එකොළොස් දෙනකු අතුරුදන් වී තවත් පුද්ගලයන් තිස් දෙදෙනකුට ජීවිත අහිමි වුණා.
හෙක්ටයාර් අටක භූමි ප්‍රදේශයක් පුරා විහිදී තිබෙන මෙම කුණු කන්දේ උස මීටර් 48ක්.
කුණු කන්ද තට්ටු පහක් ලෙස සකස් කර එහි උස මීටර් තිස් තුනක් දක්වා අඩු කර තිබෙන බවත් කුණු කන්ද සංවර්ධනය කර කෞතුකාගාරයක් නිවාස සංකීර්ණයක් ඇතුළුව සංවර්ධන ව්‍යාපෘති කීපයක් සිදු කිරීමට නිවාස සංවර්ධන අධිකාරිය සැලසුම් කර ඇති බවත් කොළඹ දිස්ත්‍රික් සම්බන්ධීකරණ කමිටු සාකච්ඡාවට එක් වූ නිලධාරීන් පවසා තිබෙනවා.
කසළ කන්ද ආශ්‍රිතව මෙතෙක් කිසිදු සංවර්ධන ව්‍යාපෘතියක් නිරීක්ෂණය නොවන බැවින් එහි සූර්ය බල ව්‍යාපෘතියක් ක්‍රියාත්මක කිරීමට කටයුතු කළහොත් විදෙස් ආයෝජකයන් ගෙන්වා ගැනීමට හැකි වන බවට ද එහිදී යෝජනාවක් ඉදිරිපත්වු බවයි වාර්තා වන්නේ.
මෙම ස්ථානයේ උද්‍යාන විදුලි බලාගාර ඉදිකරන බවට බලයට පත්වූ ආණ්ඩු කිහිපයක්ම පොරොන්දු ලබාදී තිබුණා.නමුත් මෙතෙක් කිසිම ආණ්ඩුවක් එය ඉටුකර නැහැ. මිතොමුල්ල නාය යන අවස්ථාවේත් අගමැතිවරයා ලෙස සිටියේ රනිල් වික්‍රමසිංහයි. ඒ අවස්ථාවේ පොරොන්දු කන්දක් දුන්නද ඒවා කිසිවක් ඉටුවී නොමැති බව පෙනෙන්නට තිබේ.
එසේම නැවතත් ගෝඨාභය පාලන සමයේ උද්‍යානයක් ඉදිකිරීමට අදාළව වෙන් කළ මුදල් ආගිය අතක් නොමැති බව පවසමින් මහින්ද රාජපක්ෂ විසින්ද කුණු කන්ද ආශ්‍රිත ප්‍රදේශය සංවර්ධනය කරන බවට පොරොන්දු විය.
