අපි බොහෝවිට කරන්නේ, වසරකට එක දවසක් අපි ගැන බොහෝම උද්‍යෝගයෙන් කතා කරලා, කවි ලියලා, පීත්ත පටි කපලා, අත්පුඩි ගහලා, ලොකූ හා හෝවක් කරලා, ඊට පහුවෙනිදා ඉඳන් අපිවම අත් ඇරලා දාන එක. ඉතිරි දින 364ම අපිට අපි අමතක වෙන එක.

එතකොට,
මොකක්ද මේ මුලින් කීව වෙනස් පැකේජ් එක?
360° පැකේජ් එකත් එක්ක කාන්තාවකගෙ තියන සම්බන්ධය මොකක්ද?

කාන්තාවක් කියන්නේම, භූමිකා රාශියක සංකලනයක්. යම් කාන්තාවකට තමන්ට හිමි විවිධාකාර භූමිකා අතර, නොගැටී සාර්ථකව ගලා යන්න හැකි නම් සහ ප්‍රශස්ථව ඒ භූමිකා අතර ව්‍යාප්ත වෙන්න හැකි නම්, ඇය 360° PACKAGE එකක්. ඒ කියන්නේ, ALL ROUNDER කෙනෙක්. ඒක සැබැවින්ම අද්විතීය කුසලතාවයක්.

අසම්පූර්ණ මනුෂ්‍යත්වයේ පරිපූර්ණ පැතිකඩක් වෙන්න හැමෝටම බැහැ. එහෙම වෙන්න ඕනිත් නෑ. හැමෝම ඇල්ෆා ගැහැණු වෙන්න ඕනිය කියලා නියමයක් නැහැනේ.

නමුත්, අපි හැමෝටම උත්සාහ කරන්න පුළුවන් වඩා සාර්ථක ගැහැණියක් වෙන්න. දැන් ඉන්න මට්ටමින් මිලිමීටරයක හෝ ප්‍රගතියක් ලබන්න අපිට සැබෑ උවමනාවක් තිබීම වැදගත්. ඒක ඔබේ අභිමතය. ලෞකික, භෞතික, ආධ්‍යාත්මික ඕනිම අංශයකින් ඉදිරියට යන්න ඔබ ගන්න ඕනෑම කුඩා උත්සාහයක් පවා, කවදාවත් අපතේ යන් නැහැ. ඒ උත්සාහයම අත්දැකීමක්. ජීවිතේට පන්නරයක්!

ජීවත් වෙද්දී, තනි තනි ඒකකයක් වශයෙන්, ගැහැණියක් භූමිකා රැසක් තුළ විහිදෙන්න ඕනි… ඇත්තෙන්ම, ඇයට රබර් කාදුවක් වගේ නම්‍යශීලීව සියල්ල ආවරණය කරන්න වෙනවා.

දියණියක්, ශිෂ්‍යාවක්, පෙම්වතියක්, බිරිඳක්, මවක්, ගෘහණියක්, වෘත්තිකාවක්, සොයුරියක්, මිතුරියක්, රැක බලා ගන්නියක්, දයාව බෙදන්නියක්, සොයා බලන්නියක්, සමාජ සේවිකාවක්, නියමුවරියක්… ආදී, මෙකී නොකී භූමිකා රැසක ඇය ව්‍යාප්ත විය යුතුයි.

අන්න ඒ භූමිකා තුළ සාර්ථකව රැඳෙන්න නම්, එකිනෙක භූමිකා පටලවා නොගන්න නම්, ඇය ඈ තුළ “මිශ්‍ර නොවී, මිශ්‍ර වීමේ කුසලතාවය” වර්ධනය කර ගත යුතුයි.(MIXED WITHOUT BEING MIXED UP) එවිට, තමන්ට හිමි එක් එක් කාර්‍ය භාරයන් අතර හට ගන්නා ස්වභාවික ඝට්ටනයන් අවම කර ගන්න ඇයට පිළිවන් වෙනවා.

ඒ වගේමයි, ගැහැණියක් වචනයේ පරිසමාප්ත අර්ථයෙන්ම, “වචනයේ” ගැහැණියක් වීමත් ඉතාම වැදගත්.

ඒ මොකක්ද?

“LADY OF WORDS”

වචනයක් දුන්නා නම්, ඒ වචනය රකින්නියක් වෙනවා කියන එකයි මෙහි අදහස. මේ ප්‍රතිපත්තියට අනුගතව ක්‍රියා කිරීම බොහෝවිට කෙනෙක්ට කරන්න සෑහෙන්න අමාරුයි. ඒත්, තම වදන් තුළම පිහිටා කටයුතු කිරීමට උගෙනීම කියන්නේ කෙනෙක් පුහුණු විය යුතු කුසලතාවයක්. මුලින් මුලින් ඔබ අසාර්ථක විය හැකියි. ඔබේ සිත ශක්තිමත් වනතාක්, ඔබ වැටේවි. අසාර්ථක වේවි. ඒකට කමක් නැහැ. මිනිස්සු කොහොමත් ඔබට කතන්දර කියනවා. ඔබව හෙළා දකිනවා. ඔබේ නැති වැරදි පවා ගොතනවා.

නමුත්, ජීවිතය කියන්නේ “තැත් වරද ක්‍රමයෙන්” නැවත, නැවත උගත යුතු පාඩමක්. කිසිවෙක් පරිපූර්ණව මේ ලෝකයට ආවේ නැහැ. ඉතිං, ක්‍රමානුකූලව, සිහියෙන් “වචනයේ පිහිටීම” කියන හොඳ පුරුද්ද දිගින් දිගටම රැගෙන යන්න කාන්තා ඔබ උත්සාහ කළොත්, ඔබ ඊට හැඩ ගැසේවි. දවසක ඒ හොඳ පුරුද්ද ඔබේ නිසඟ අංගයක් බවට පත් වේවි. එයම ඔබට ආභරණයක් වේවි. ඔබේ ආත්ම තෘප්තියට හේතුවක් වේවි.

ගැහැණියක් ජීවත් විය යුත්තේ, ලෝකයක් ප්‍රීතිමත් කර, ඔබ දුක් විඳීමට නම් නොවේ. ඔබ ඔබවම අමතක කර දැමීමට නම් නොවේ. ඔබේ ආත්ම තෘප්තියේ නියමුවරිය ඔබමයි. ඔබේ ප්‍රීතියේ “මැජික් පහන” ඇත්තේ ඔබ අතේමයි.

එහෙනම්,
සුභ කාන්තා දිනයක්!