කාන්තා දිනේ කාන්තාවට වැදගත්ද පුරුසයාට වැදගත්ද මම දන්නේ නෑ.හැබැයි මොන දිනෙත් වැදගත්වෙන බැංකු,රක්ෂණ ,සනීපාරක්ෂක තුවා,රත්තරං විකුණන අය….ආදී එකී මෙකී නොකී අය කාන්තාව මේ ලෝකේ පහළ වූ උත්තම මනුස්ස රතනය බවට කාන්තාව පත්කරනව.ස්ත්‍රීවාදීන් පුරුසයෝ එදාට නොමර මරණව.කවියෝ අක්කල,නංගිල,අම්මල,භාර්‍යාවෝ සිට කුලී,ජුකී,කුකරී,බේකරී,ගණිකා,රූපිකා,නිරූපිකා මේ වගේ නොයෙක් ගණයේ ස්ත්‍රීන් උදෙසා ප්‍රශස්ති හදනව.
ඉතින් මෙව්වට රැවටිලා සමහර අම්මණ්ඩිලා එදාට උයන එක පුරුසයෝ ගත්තා කියලා ඒ සේයා හුවමාරුකරන් සතුටුවෙනව.විවේකයෙන් ඉන්නවා කියලා පෙන්නනව.ඇගයුවා කියලා මැරෙන්න හදනව.
දවස ඉවරවෙලා ඊළඟ දවසේ ඉඳන් මයෙ අම්මලා ඔක්කොම ගෑණු වෙනව.අතවර,දූෂණ,හිංසන,දික්කසාද ,හූරාකෑම්,බියවැද්දීම් මේ ඔක්කොම එක්ක ආයෙත් ජීවිතය ගෙනියනව.
ඔය මතුපිටින් උලලා රඟන කාන්තා දින නෙවි කාන්තාවෝම කාන්තාව ගැන දින වෙන්කරගන්න ඕන.
හැම ගෑනියෙක් ම රැජිණක් කිව්වට මොන ගෑනිගෙත් ඔටුනු ගැළවෙන්න වැඩිවෙලා යන්නේ නෑ.සංසාරගත ප්‍රේමයන් හෝ රෝසමල් කසාද ගැන ඔළුව නරක් කරගන්න හොඳ නැහැ .
පසුගිය සතියේ මට හමුවුණා.විශ්‍රාමික ගුරුවරියක්.ඈ ඇගේ ජීවින පාඨය කරන් තිබුනේ අපි මොහොක හෝ මැරෙන තුරු යෙදෙන්න ඕන කියලා. මනුස්සයත් ඇදන් පොඩි නවාතැනක් හදන් ඒක කුලී කරනව.හොඳට කාල ඇඳල,අනුන්ටත් උදව් කරල ඉන්නවා .
තව ඒ වගේම විශ්‍රාමික කාන්තාවක් හමුවුනේ විසිතුරු පැළ තවානකදි.තොල් චුට්ටක් පාට කරන් ,සාය හැට්ට ලස්සනට ඇඳන් ඈ කැක්ටස් පැළ විසිතුරුව වගා කරනව.විකුණනව .අතිශය නිර්මාණශීලියි. ඇයටත් දැක්මක් තිබුණා.ඉන්න ටිකේ ලස්සනට කාටවත් කරදර නොවී ඉන්න ඕන කියලා.
ඒකට ගොඩක් අම්මණ්ඩිලා .හතළිහ පනහ පනිද්දිම සුදු ඇඳන් පේ වෙනව.අත් හරිනව.ඒ වුනාට ඉතිරි වෙන කෑම විසිකරන්න ලෝබකමට කාල තරවෙනව.අපිට මොන ස්ටයිල්ද කියන් අමු වෙනව.
පස්සේ කාන්තා දින වගේ දවස්වල හොටුපෙරන් අඬනව.
තමන්ට ඕන දේ හොයන් යන්න ගෑනු පිරිමි දින ඕන නැ.අගය කටගන්න,උලුප්පන්න දින දාන් නහින්න ඕන නෑ.ඉන්න බව පෙන්නන්න ඇඟිල්ලෙන් අනින්න ඕන නෑ.
ගෑනියෙක්ට ඕන ලොකුම දේ සමාජීය නිදහස්බව.පරායත්ත නොවීම.
පිරිමියෙක් නැතුව ගෑනියෙක් ට තාමත් පාරේ තොටේ යන්න තරම් තත්වයක් නැතිනම් ඒ වගේ සමාජෙක කාන්තා දින වැඩක් නැහැ .
තමන්ගෙම කියලා අරමුණක් ,දැක්මක්,ඉලක්කයක් නැතුව කාන්තා දිනේටත් පිරිමි දායකත්වය හොයනවනම් එහෙම සමාජකටත් කාන්තා දින වැඩක් නැහැ .
හැමදාම කාන්තා දින කියන් හිතාගෙන කාන්තාවෝ හැසිරුනානම් මේ කිසිම දිනයක් විකාරරූපී සැමරුම් වෙන්නෙත් නැහැ .
