පාර්වති කහට බොනව.තේ පඳුරක් යට වාඩිවෙලා හුළං විස්කෝත්තක් පොඟවගෙන කහට බොනව.පෙඟිච්ච හුළං විස්කෝත්තෙන් තේ කඳුළක් පාර්වතීගේ චීත්තෙට වැටෙනව.චීත්තෙ පාට කහට පාට වෙන්කරන්න බෑ.ඒ හින්දා කහට පැල්ලම ගැන වගේ වගක් පාර්වතීට නෑ.කොහොම වුනත් පාර්වතී බොන්නේ තමන් දළු කඩන වත්තෙන් ඉපදෙන තේකුඩු තේ නෙවි. රස ගැන ඒකිට වගක් නෑ.
වත්සලා කහට බොනව.තොල්වල ගාපු පාට දියවෙයි කියල බයට කහට බොනව නෙවි උරනව.උරද්දී තොලෙන් පැනපු කහට බිංදුවක් වත්සලාගේ පපුව මැද නිම්නයෙන් පහළට රූටනව.ගංචුව ගලවලම ගෙවුණු බුරුල් බ්‍රා එක අග්ගිස්සේ කහට බිංදුව තැන්පත් වෙනව.දාඩියයි කහටයි වෙන්කරන්න බැරිනිසා වත්සලා කහට පැල්ලමට දිනුම දෙනව.
සරලා කහට බොනව. කැන්ටිමේ පුටුවට බරදීලා පොල් කේක් කෑල්ලක් එක්ක කහට බොනව.එන යන ලිපිගොණු අස්සෙන් එබෙන බොස්ගේ මූණ මතක්වෙලා ගැස්සුණු වේගෙට කහට බිංදුවක් සාරි හැට්ටේ උඩට වැටෙනව.පොලියෙස්ටර් සාරි රෙද්දට උරා ගන්න බැරිව කහට ටිකක් ඇඟට පත්තියම් වෙනව. සරලා ඉවසනවා.
අරුන්දතී කහට බොනව.කෑලි ගාණ මැනල මහපු අත්වලට වාරු නැතුව කහට බිංදුවක් ඔඩොක්කුවට හැළෙනව.බඳින වයසත් පහුවෙච්ච පටු උකුලේ රස්නෙට කහට බිංදුව පැල්ලමක් වෙලා ගල්වෙනව.පැල්ලම් ගොඩට ආපු අලුත් පැල්ලම ගැන අරුන්දතී වැඩිය තැවෙන්නේ නෑ.
ජුලී කහට බොනව.බොන ගමන් වෑංජනේ ලුණු බලනව. ලුණුයි කහටයි හොඳට ගැළපෙනව.ගිනිකූරක් ඉල්ලගෙන ආපු ලොකූ මහත්‍තයට ගින්දර නොදී ඉන්න බැරිකමට කහට කෝප්පේ පැත්තක තියනව.තියද්දී වීසිවෙන කහට බිංදුවක් බුබුලාකාර හැඩයෙන් වම් පපුවේ මැද රැදෙනව.ගෙදර ඉන්න අතදරුව මතක්වෙලා කහට පැල්ලම ජුලී නොසලකා හරිනවා.
වයල කහට බොනව.කුණු ට්‍රැක්ටරේට කුණු දාපු අත්දෙකෙන්ම කහට කෝප්පේ අල්ලන් බොනව.කුයිලෙට කෝප්පේ ගැස්සිලා කහට බිංදුවක් වයලගේ කකුල් පාමුලට වැටෙනව.කහට බිංදු හැර වෙන දෙයක් කකුල් පාමුල තියේවිද?වයල කහට බිංදුව එක්ක හිනාවෙනව.
පාර්වතී ,සරලා,වත්සලා ,අරුන්දතී ,ජුලී,වයලා විතරක් නෙවි හේමමාලලා,ච්ත්‍රලා,සුගලලා,ගජමන් නෝනලා වගේම දම්මිල,බතීල,දේදුනුල විතරක් නෙවි රසිකල,වජිරලා ත් කහට බොනව.
පඳුරු යට,ගස්ගල් යට,බංකුවල,පුටුමේසවල,සැටිවල,සෝපාවල වාඩිවෙලා කහට බොනව.
වීසිවෙන කහට බිංදුවක් පැල්ලමක් හැදුවත් මේ කිසිම ගෑනියෙක් පැල්ලම් ගැන වදවෙන්නේ නැහැ .
පැල්ලම් නෝමල්.ඒ තමයි ජීවිතය !!
