රට සතුව පවතින සීමිත ඩොලර් ප්‍රමාණයෙන් රටට අවශ්‍ය ඉන්ධන, බෙහෙත් ඇතුළු අත්‍යවශ්‍ය ද්‍රව්‍ය ගෙන්වා, ගෙවීමට තිබෙන ණය ප්‍රතිව්‍යුහගත කරගන්නැයි විපක්ෂය දිගින් දිගටම ඉල්ලා සිටිද්දීත් වත්මන් ආණ්ඩුව මුළු රටම මහ පාරට ඇද දමා ඩොලර් මිලියන 500 ක බැඳුම්කර ණය පසුගියදා ගෙවා දැමුවේ කිනම් කණ්ඩායමක් සතුටු කරන්නටදැයි සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා ප්‍රශ්න කරයි.
අද කොළඹදී පැවති මාධ්‍ය හමුවකදී අදහස් දක්වමින් ආචාර්ය හර්ෂ ද සිල්වා මහතා පැවසුවේ වත්මන් ආර්ථික අර්බුදයෙන් සමස්ත මහජනතාවම බැට කද්දී එය එක්තරා කණ්ඩායමකට ඩොලර් උල්පතක් වී තිබෙන බවයි.
“මේ ව්‍යසනය අස්සේ මහා හොරකමක් වෙනද කියල අපිට සැකයි. අපි කිව්වා, ජනවාරි 18 වෙනිදා සෛවරීත්ව බැඳුම්කරය ගෙවපු කට්ටියගේ නම් ලයිස්තුව දෙන්න කියලා. ඒක තාම දුන්නෙ නෑ. මේ සෛවරීත්ව බැඳුම්කරයෙන් සමහරු සියයට සියයක ප්‍රතිලාභයක් ගත්තා. කවුද ඒ ප්‍රතිලාභ ගත්ත අය? මේ නිසා, මේ ආණ්ඩුව හැම ව්‍යසනයෙන්ම හොරකම් කරල තියනවද කියන ප්‍රශ්නෙ දැන් එළියට එනවා. එදා අපි කිව්වේ, ණය ගෙවීම පැහැර හරින්න කියල නෙවෙයි. ණය ප්‍රතිව්‍යුහගත කරගෙන තියන ඩොලර් ටික රටේ අවශ්‍යතාවය වෙනුවෙන් යොදවන්න කියල. නමුත්, ආණ්ඩුව එහෙම කළේ නෑ. කුඩා කණ්ඩායමකට ඩොලර් ටික ගෙවලා, අද මුළු රටම මහ පාරට ඇද දමා තිබෙනවා. මේ ව්‍යසනය අස්සේ දැවැන්ත ප්‍රතිලාභයක් ලබාගත් මේ කණ්ඩායම කවුද?“
“අද ඩීසල් නෑ. පෙට්රල් නෑ. විදුලිය නෑ. බෙහෙත් නෑ. දැන් රට බංකොලොත් වෙලා ඉවරයි. දෙයියන්ගේ නාමයෙන් ඉතුරු ටිකත් කාබාසිනියා කරල දාන්න එපා කියල මම ආණ්ඩුවෙන් වැඳල ඉල්ලනවා.“
මෙවැනි ආර්ථික අර්බුදයක් එනු ඇතැයි සමගි ජන බලවේගය 2020 නොවැම්බර් මාසයේ සිටම පෙන්වා දුන් බවත් ඒ අවස්ථාවේදී මහ බැංකු අධිපති අජිත් නිවාඩ් කබ්රාල් මහතා ඒවා උපහාසයෙන් බැහැර කළ බවත් ආචාර්ය හර්ෂ ද සිල්වා මහතා මෙහිදී සිහිපත් කළේය.
මේ නිසා, එදා උපහාසයෙන් ඒවා බැහැර කළ නිවාඩ් කබ්රාල් ඇතුළු පිරිස මුළු රටම මහ පාරට ඇද දැමීමේ වගකීම භාරගත යුතුබව හෙතෙම අවධාරණය කළේය.
