සිංහරාජය, ආනවිලුන්දාව, වනාතවිල්ලුව, නකල්ස්, මොරවැව, හෝර්ටන් තැන්න ඇතුළු ප්‍රදේශ ගණනාවක් පිළිබඳව පසුගිය මාස එකහමාරක පමණ කාලයක් තුළ අපට අසන්න ලැබුණා. මේ හැම නමක්ම සම්බන්ධ වුණේ වන විනාශය සමඟයි. රැල්ලක් වගේ රට වටේ යන මේ වන විනාශයට වගකිව යුත්තේ කවුද? අප හමුවේ තිබෙන ප්‍රධාන පැනය එයයි . නමුත් උත්තර නැති පැනයද එයයි . අක්කර දහස් ගණනක් ඩෝසර් කරනතුරු කිසිවෙකු නොදැක සිටීම පුදුම උපදවන කරුණකි. කුඩු ජාවාරමේ පහළ බෙදාහරින්නන් සහ මිලදී ගන්නන් හසුවෙන්න සේම මේ ඉඩම් මංකොල්ලයේ මහ මොළකරුවන් හසුවන්නේ නැහැ. මේ වනවිට චෝදනා ලැබ තිබෙන්නේ අත්අඩංගුවට අරන් තිබෙන්නේ පහළ ක්‍රියාකාරී වූ පුද්ගලයන් පමණි.
මේ වන විනාශය ස්වරූපය දෙස විමසිල්ලෙන් බලන අපට සැකයක් උපදී. එනම් 05/2001 චක්‍රලේඛය අහෝසි කිරීම්ට රජය ගත් උත්සාහය පරිසර හිතකාමී සහ ජනතා විරෝධයෙන් හකුළා ගන්නට සිදු වුණායින් පසුව අනියම් ක්‍රියාමාර්ග හරහා අවශ්‍ය ඉඩම් අත්පත් කරගන්නවා ද යන්න පිළිබඳව.
අප මේ ඔබට කියන්නේ කට කහනවට නොව, ඔබට හුස්ම ගැනීමට ගහකොළ අවශ්‍ය බැවිනි, අත්තනෝමතික ක්‍රියාවන්වලට එරෙහිව ඔබ අවදිව පෙළෙ නොගැසේනම් ඔබට අහිමි වීමට නියමිතව ඇත්තේ හුස්ම ගැනීමේ අයිතියයි .
