නරියාගේ අවමංගල්‍යය
දිනක් කිකිළියන්, අඩි පාර මැද නරියකු වැටී සිටිනු දුටුවා . උගේ ඇස් පියවී තිබුනා . වලිගය සෙල වුනේ නැහැ .
- මිය ගිහිල්ලා… මිය ගිහිල්ලා … කිකිළියන් කෑ මොර දුන්නා .. අපි මුගේ අවසන් කටයුතු කරමු .
ඔවුන් නරියාගේ අවසන් කටයුතු සඳහා සූදානම් උනා . මරණයේ පණිවිඩය දැනුම් දීමට ඝණ්ඨාරය නාද කළා . කුකුලා මිණි වල හාරන්නට තණ පිට්ටනියට ගියා . ඔවුන් ලස්සනට අවමංගල්‍යය කටයුතු සූදානම් කළා . කුකුල් පැටවුන් මිනිය ළඟ තැබීමට මල් ගෙන ආවා . මියගිය නරියාගේ දේහය මිණිවලේ තැන්පත් කරන්නට සූදානම් වෙත්ම ඌ පෙට්ටියෙන් එලියට පැන කිකිළියන්ව කා දැමුවා.
මේ පුවත සුළඟක් වගේ කුකුළු කොටුවෙන් කුකුළු කොටුවට පැතිර ගියා. කුකුල් රේඩියෝවේ පුවත විකාශය වුණා . නරියා ඒ ගැන ලොකුවට හිතන්න ගියේ නැහැ. ටික කාලයක් ගතවෙන්නට ඉඩ හැරියා. වෙනත් ගමකට ගොස් පෙරසේම අඩි පාරක් හරස් කොට වැතිර මැරුණා සේ ඇස් පියා ගත්තා .
ඒ ගමේ කිකිළියොත් පාරේ වැටී සිටින නරියා දැක කෑ මොර දුන්නා .
- මිය ගිහිල්ලා… මිය ගිහිල්ලා … අපි මුගේ අවමංගල්‍යය කටයුතු කරමු .
කිකිළියන් කළු ඇඳුමෙන් සැරසුනා . මරණයේ ඝණ්ඨාරයද නාද කළා . කුකුලා බඩ ඉරිඟු යායේ කොනක නරියාගේ මිණි වල හෑරුවා .
ඒක හරි ලස්සන අවමංගල්‍යයක් . කුකුල් පැටවුන්ගේ අවමංගල්‍යය ගී ගායනාව ප්‍රංශයට ඇසුනා .
මිනී වල වෙත ළං වෙත්ම නරියා පෙට්ටියෙන් එළියට පැන අවමංගල්‍යයට සහභාගි වූ සියලු දෙනා කා දැමුවා .
මේ පුවත සුළඟක් වගේ කුකුල් කොටුවෙන් කුකුල් කොටුවට පැතිර ගියා. ඒ පුවත රූපවාහිනියේ ප්‍රචාරය වුණා . ඒවා අසා නරියා බියට පත්වුණේ නැහැ . කුකුළන්ට තියෙන්නේ කෙටි මතකයක් බව නරියා දැනගෙන හිටියා . එනිසා නරියා මුළු ජිවිත කාලයම කලේ මැරුණා සේ වැතිර සිටිමයි .
කවුරුන් හෝ කුකුළන් සේ වැඩ කරනවා නම් ඒකෙ තේරුම මේ කතාව නොතේරුණු බවයි.
ජාන්නි රොදාරිගේ “දෝස සහිත පොතේ” කතන්දරයක්.
හිල්මි සුපුන් | තරුෂ පෙරේරා
චිත්‍රය | තරුෂ පෙරේරා
