ප්‍රගතිශීලි වාමාංශික පිරිස් ඒකරාශී කර ඉදිරියේ පැවැත්වෙන ඕනෑම මැතිවරණයක් සඳහා මුහුණ දීමට සන්ධානයක් නිර්මාණය කරන බව පෙරටුගාමී සමාජවාදී පක්ෂයේ ප්‍රචාර කලේකම් දුමින්ද නාගමුව ඊයේ ප්‍රකාශ කරනු ලැබුවා. ඔහු මේ බව අනාවරණය කරනු ලැබුවේ සිරස සටන දේශපාලන සංවාදයට එක්වෙමින්.
එහිදී වැඩිදුරටත් අදහස් දැක්වූ දුමින්ද නාගමුව කියා සිටියේ පසුගිය අරගල සමයේ රට වෙනස් කිරීමට සාධනීයව මැදිහත් වුණු කණ්ඩායම් පුද්ගලයන් ඒකරාශී කර මෙම සන්ධානය නිර්මාණය කරන බවයි. ඊට අදාළ කටයුතු සූදානම් වෙමින් පවතින අතර ඉදිරි සති කිහිපය ඇතුළත සන්ධානය ජනගත කරන්නට කටයුතු කරන බවත් ඊට අදාළ ප්‍රතිපත්ති රාමුව ජනගත කරන බවත් ඔහු කියා සිටියා.
පවතින ආර්ථික අර්බුදයට විසඳුමක් ලෙස ආණ්ඩු පක්ෂ විපක්ෂ දේශපාලනය IMF ආධාර ලබා ගැනීම, ඉන්දියානු මැදිහත්වීම ශක්තිමත් කර ගැනීමේ යෝජනාව හැර ආර්ථික අර්බුදයෙන් ගොඩ ඒමට වෙනත් විකල්ප යෝජනා පවතින බවත් ඒවා පිළිබඳව ඉදිරියේදී සමාජ සමඟ සාකච්ඡා කිරීමට පෙරටුගාමී සමාජවාදී පක්ෂය ඇතුළු ගොඩනැගෙන සන්ධානය කටයුතු කරන බව ඔහු එහිදී වැඩිදුරටත් කියා සිටියා . ඉදිරි දේශපාලන ක්‍රියාකාරකම්වලදී මෙන්ම මැතිවරණ වලදී තමන් සමඟ එකතුව පවතින අර්බුදයෙන් ගොඩ යෑමට අවශ්‍ය දේශපාලන වටපිටාව නිර්මාණය කර ගැනීමට අත්වැල් බැඳගන්නට කියා ඔහු ජනතාවගේ ඉල්ලා සිටියා.
