මුලතිව් ප්‍රදේශයේ පදිංචි 71 හැවිරිදි අකිලා තිරුනායකී පිලිපීනයේ පැවති මාස්ටර් මලල ක්‍රීඩා තරඟාවලියේදී රන් පදක්කම් දෙකක් සහ ලෝකඩ පදක්කමක් දිනාගෙන තිබෙනවා.
මෙම තරගාවලියට ශ්‍රී ලංකාව නියෝජනය කරමින් සහභාගි වූ අකිලා තිරුනායකී මීටර් 1500 සහ 5000 ඉසව්වලින් රන් පදක්කම් දෙකක් සහ මීටර් 800 ධාවන ඉසව්වෙන් ලෝකඩ පදක්කමක් දිනා ගෙන ඇත.
මීටර 400 ධාවන ඉසව්වේ සිවුවැනි ස්ථානයද ඇයට හිමිව තිබේ. මුලතිව් මුල්ලියාවලෙයි ගම්මානයේ පදිංචි ඇය විශ්‍රාමික බන්ධනාගාර නිලධාරිනියකි.
ඇයට අමතරව නොවැම්බර් 8 සිට 12 දක්වා පිලිපීනයේ පැවති 22 වැනි ආසියානු මාස්ටර්ස් මලල ක්‍රීඩා ශූරතාවලියේදී ශ්‍රී ලංකා ක්‍රීඩක ක්‍රීඩිකාවන් රැසකට ජයග්‍රහණ හිමිව තිබේ.
රන් පදක්කම් 25ක්, රිදී පදක්කම් 34ක් සහ ලෝකඩ පදක්කම් 25ක් සමඟින් ශ්‍රී ලංකා කණ්ඩායම සමස්ත ශ්‍රේණිගත කිරීම්හි 8 වැනි ස්ථානයට පත්ව ඇත.
35-39 වයස් කාණ්ඩයේ කැපී පෙනෙන තරඟකරුවෙකු වන දසුන් සිල්වා නව ආසියානු තරඟ වාර්තාවක් පිහිටුවමින් ශ්‍රී ලංකාවේ ජයග්‍රහණ තවදුරටත් ඉහළට ඔසවා තැබුවා.
