රනිල් වික්‍රමසිංහ ආර්ථිකය ගොඩනැංවීමට යෝජනා තිබෙනවාද අසන බවත් ඊට අවශ්‍ය යෝජනා අරගලය විසින් ඉදිරිපත් කර ඇති බවත් පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව පවසයි.
පසුගිය 05වනදා කොළඹදී පැවති ආර්ථික ප්‍රතිසංස්කරණ පිළිබඳ පර්යේෂණ වාර්තාවක් එළිදැක්වීමේ අවස්ථාවට එක්වෙමින් රනිල් වික්‍රමසිංහ පැවසුවේ IMF සහාය ලබා ගැනීමට විරුද්ධ වෙන උදවිය ආර්ථිකය අර්බුදය විසඳීමට අවශ්‍ය කිසිදු යෝජනාවක් ඉදිරිපත් නොකරන බවයි.
ඊයේ නුගේගොඩදී පැවති ගෝල්ෆේස් අරගලකරුවන්ගේ මර්දනයට එරෙහි ජන පෙළගැස්ම රැළිය අමතමින් දුමින්ද නාගමුව පැවසුවේ රාජපක්ෂලා ඇතුළු හැත්ත බුරුත්ත හොරා කාපු සල්ලි නැවත ලබාදෙන ලෙස අරගලකරුවන් පැවසුවේ ආර්ථිකය ගොඩනැංවීමට යෝජනාවක් ලෙස බවයි. නමුත් රනිල් වික්‍රමසිංහ පැමිණියේ එම හොරකම් වසන් කර රටේ ජනතාව තවදුරටත් ණයකරුවන් කිරීමට බවත් දුමින්ද නාගමුව පවසයි.
එසේම ලංකාවේ මසකට අපනයන ආදායම ඩොලර් බිලියනයක් වුවත් රට තුළට පැමිණෙන්නේ ඩොලර් මිලියන 200ක් පමණක් බව දුමින්ද නාගමුව පවසයි. එයට හේතුව අපනයන සමාගම් රටෙන් එළියේ ඩොලර් තැන්පත් කර ඇති බවද ඔහු මෙහදී පැවසීය.
දුමින්ද නාගමුව පැවසුවේ මේ අර්බුදයට උත්තර ඇති බවත් නමුත් පාලකයන් උත්තර හොයන්න සැරසෙන්නේ ජනතාව බිමට සමතලා කර බවයි. ප්‍රශ්නය ඇත්තේ එතන බවද ඔහු පැවසීය.
