රූපවාහිනී සංස්ථාවට අයුතු ලෙස ඇතුළු වී බලහත්කාරයෙන් කටයුතු කලැයි යන චෝදනා එල්ල කරමින් අනීතිකව අත්අඩංගුවට ගෙන අධිකරණයට ඉදිරිපත් කළ සමාජ ක්‍රියාකාරී ධානිශ් අලී ලබන 15 වැනිදා තෙක් රක්ෂිත බන්ධනාගාර ගත ගත කිරීමට කොළඹ ප්‍රධාන මහේස්ත්‍රාත්වරයා අද (01) නියෝග කර තිබේ.
ධානිශ් අලී විදේශගත වීමට සූදානම්ව සිටිමින් ගුවන් යානයක රැඳී සිටියදී පොලිසිය අත්අඩංගුවට ගනු ලැබුවේ ඉකුත් 26 වැනිදාය. වරෙන්තුවක් හෝ විදෙස් ගමන් තහනමක් හෝ නොමැතිව අත්අඩංගුවට ගත් ඔහු නැවත අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගත කිරීමට කොටුව මහේස්ත්‍රාත්වරයා නියෝග කර තිබුණේ ඉකුත් 27 වැනිදාය.
රූපවාහිනී සංස්ථාවට අයුතු ලෙස ඇතුළු වීමේ සිද්ධියට අදාළව මෙම සැකකරු හඳුනා ගැනීමේ හඳුනාගැනීමේ පෙරට්ටුවකට ඉදිරිපත් කරන ලෙසට නියෝග කරන්නැයි පොලීසිය කළ ඉල්ලීමකට අනුව එහිදී මහේස්ත්‍රාත්වරයා අද (01) මෙම සැකකරු හඳුනා ගැනීමේ පෙරට්ටුවකට ඉදිරිපත් කරන ලෙසට බන්ධනාගාරයට නියෝග කර තිබුණි.
ධානිශ් අලී මුළු ලෝකෙම දැනගෙන සිටි අවස්ථාවක හදුනාගැනීමේ පෙරට්ටුවක් අවශ්‍ය නොවන බව සඳහන් කරමින් එය අවලංගු කල මහේස්ත්‍රාත්වරයා සැකකරු ලබන 15 වැනිදා තෙක් රක්ෂිත බන්ධනාගාර ගත කිරීමට නියෝග කර තිබේ.
මෙම සිද්ධිය සම්බන්ධයෙන් අධිකරණයට කරුණු වාර්තා කර තිබුණේ කුරුඳුවත්ත පොලිසිය මගිනි.
