තෙහැවිරිදි දියණිය
පසෙකින් වැතිර
සීලිම දෙස බලන්
අනිමිසලෝචනේ නියැළෙමි
ඕඩිකොලෝන් සුවඳක් දැනෙයි,
සුළි කුණාටුවක් සේ
ඒ සුවඳ පපු කුහර දෙදරවයි
මනුතාපයේ ජෝන් වැල්ජෝන්
අකුණක්ව මතකයෙන් අවදිවෙයි
මා මෙන්ම ඔහු මෙන්ම ටූලෝන්
එකම ගැලියේ වැටී වාල්කම්
කරන මහබාගයේ බාග මනුසත්වරුනි
සතුටින්ද, නින්ද යනවාද දැන් …. ?
මිටියක් ගෙන තළා
ලෝකයම ජිල්බෝලයක් කොට
ඕඩිකොලෝන් දියරයෙහි
ගිල්වා දමන්නට අවැසිය මට
ජෝන් වැල්ජෝන්,
එළිවෙන තුරා අප දෙදෙන අද
අයිස් වතුරේ ගිලෙන
මිනිස්කම් ගැන කතා කර කර
කම්පා විය යුතුය …..
( මහබාගේ සුපිරි වෙළඳසලකින් ළමා සුවඳ විලවුන් බෝතලයක් සොරකම් කළ පුද්ගලයෙකුව අල්ලා ගැනීමට පිරිසක් හඹා යද්දී ඔහු අයෙකුට පිහියෙන් ඇන අවසානයේ සියදිවි හානිකරගෙන තිබිණි. )
