කොතලාවල පනතට විරෝධය දැක්වීම නිසා අත්අඩංගුවට ගත් අ.වි.ශි.බ.ම කැඳවුම්කරු ඇතුළු සිසු – කම්කරු ක්‍රියාකාරීන් පස් දෙනා අගෝස්තු 31 දක්වා තවදුරටත් රක්ෂිත බන්ධනාගාරගත කර තිබේ.
අගෝස්තු 03 කොතලාවල පනතට එරෙහිව පාර්ලිමේන්තු වටරවුමේදී පැවැත්වූ උද්ඝෝෂණයට සහභාගී වීම හේතුවෙන් අ.වි.ශි.බ.ම කැඳවුම්කරු වසන්ත මුදලිගේ, ජ’පුර ම.ශි.ස සභාපති අමිල සන්දීප, රජරට සරසවියේ හේෂාන් හර්ෂණ, කම්කරු අරගල මධ්‍යස්ථානයේ චමීර කොස්වත්ත හා කෝෂිලා හංසමාලි යන ශිෂ්‍ය සහ කම්කරු ක්‍රියාකාරීන් අවස්ථා කිහිපයකදී අත්අඩංගුවට ගෙන රක්ෂිත බන්ධනාගාර ගතකර තිබුණි.
අද කඩුවෙල මහේස්ත්‍රාත් අධිකරණයේදී එම නඩුව කැඳවූ අවස්ථාවේ ඔවුන් පස්දෙනා අගෝස්තු 31 දක්වා නැවතත් රක්ෂිත බන්ධනාගාරගත කරන ලදී.
කාඩ්බෝඩ්වලින් සැකසූ මිනී පෙට්ටියක් පිළිස්සීම නිසා පොදු දේපල (පාර) හානි වූ බවත්, හදිසි අනතුරකට භාජනය වී පොලිස් නිලධාරියෙකු තුවාල වීමත්, නිරෝධායන නීති උල්ලංඝනය කිරීමත් ඔවුන්ට එරෙහිව ගොනුකර ඇති චෝදනාවන් වේ.
කොතලාවල පනතට එරෙහි ශිෂ්‍ය සංවිධාන සහ විවිධ බහුජන සංවිධාන චෝදනා කරන්නේ ඔවුන් අත්තඩංගුවට පත්වන සැබෑ හේතුව කොතලාවල පනතට විරුද්ධ වීම විනා අන් යමක් නොවන බවයි.
