ලේඛකයෙකු ලෙස වශයෙන් නිදහසේ අදහස් ප්‍රකාශ කිරීමට අහ්නාෆ් ජසීම්ට ඇති අයිතිය වෙනුවෙන් පෙනී සිටින බව බවත් ඔහු වසරක කාලයක් අත්අඩංගුවේ තබා ගැනීම හෙළාදකින බව ශ්‍රී ලංකා ලේඛක සංවිධානය පවසයි.

ශ්‍රී ලාංකිකයකු වශයෙන් අහ්නාෆ් ජසීම්ටද සෙසු පුරවැසියන්ට මෙන්ම භාෂණයේ හා ලේඛනයේ නිරත වීමට අයිතියක් ඇති බවත් එම අයිතිය ආණ්ඩු ක්‍රම ව්‍යවස්ථාවේ 10 හා 14 දරන වගන්තිවලින් තහවුරු කැරෙන මූලික අයිතියක් බවත් පෙන්වා දෙමින් ශ්‍රී ලංකා ලේඛක සංවිධානය විසින් මාධ්‍ය ප්‍රකාශයක් නිකුත් කර තිබේ.

වසරක පමණ කාලයක් පුරා සැකකරුවකු ලෙස ඔහු මෙසේ අත්අඩංගුවේ තබාගැනීම මගින් තරුණ ලේඛකයකු වශයෙන් මෙන්ම පුරවැසියකු වශයෙන්ද ඔහුගේ ජීවිතයට සිදුවන අනර්ථය සුඵපටු නොවන බව තරයේ ප්‍රකාශ කරන බවත් තම නිර්දෝෂීභාවය අධිකරණය ඉදිරියේ ඔප්පු කිරීමට ඔහුට අවස්ථාවක් හිමි විය යුතු අතර එය දිගින් දිගටම කල් යන්නේනම් ඉන් ඔහුට බලවත් අයුක්තියක් සිදු වන බවත් එම සංවිධානය අවධාරණය කර තිබේ.

ශ්‍රී ලංකා ලේඛක සංවිධානයේ මාධ්‍ය ප්‍රකාශය පහත දැක්වේ.

වසරකට වැඩි කාලයක් රඳවා තබාගෙන මේ වන විට රිමාන්ඩ් බන්ධනාගාර ගතකර සිටින අහ්නාෆ් ජසීම් නම් කවියාට නීතිඥවරුන් හමුවීම සහ ඥාතීන් හමුවීම ඇතුළු අනෙකුත් රැඳවියෙකුට ලබාදෙන සියලුම පහසුකම් ලබාදෙන ලෙස පසුගියදා (22) අධිකරණය නියෝග කර තිබුණි.

එසේම මෙම කවිය සම්බන්ධයෙන් ඉදිරිපත් වී ඇති සියලුම සාක්ෂිවල සම්පිණ්ඩනයක් සමඟ ලබන 29 වැනිදා අධිකරණයේ පෙනී සිටින ලෙස කොළඹ අතිරේක මහේස්ත්‍රාත්වරයා මෙහිදී ත්‍රස්ත විමර්ශන කොට්ඨාසයට නියෝග කර ඇත.

ඔහු වෙනුවෙන් පෙනී සිටි නීතිඥයන් ප්‍රකාශ කළේ අහ්නාෆ් ජසීම්ව බන්ධනාගාරගත කිරීමට පෙර අධිකරණයට ඉදිරිපත් කළ අවස්ථාවේදී ඒ සම්බන්ධයෙන් ඔහුගේ පවුලේ ඥාතීන් හෝ නීතිඥයන් දැනුවත් නොකිරීමෙන් බරපතළ අගතියක් සිදුවී ඇති බවයි.

යුරෝපා පාර්ලිමේන්තුව විසින් ශ්‍රී ලංකාවට එරෙහිව යෝජනාවක් සම්මත කර සතියක් ගත වීමටත් මත්තෙන්, ත්‍රස්ත මර්දන හා විමර්ශන කොට්ඨාශය (CTID) මගින් වසරකට වැඩි කාලයක් රඳවාගෙන සිටි අහ්නාෆ් ජසීම් කවියා ඥාතීන්ට හෝ නීතිඥයන්ට නොදන්වාම අධිකරණයට ඉදිරිපත් කර රිමාන්ඩ් කර තිබුනි.

කවියා වෙනුවෙන් පෙනී සිටින නීතිඥයන් පසුගිය අඟහරුවාදා අධිකරණයට දැනුම් දී ඇත්තේ අහ්නාෆ් කවියාට එරෙහිව එල්ල කර ඇති අන්තවාදයට සම්බන්ධ බවට ඇති චෝදනා පිළිගනිමින්, පාපොච්චාරණයක් බලහත්කාරයෙන් ලබා ගැනීමේ අරමුණින්, වසරකට අධික දීර්ඝ කාලයක් ත්‍රස්ත විමර්ශන කොට්ඨාශය භාරයේ රදවා ගනිමින් ඔහු මානසික වධයට ලක් කර ඇති බවයි.

ත්‍රස්තවාදය වැළැක්වීමේ පනතේ 7(1) වගන්තිය යටතේ සැකකාර කවියා අධිකරණයට ඉදිරිපත් කළ යුතු වුවද, ටීඅයිඩිය ඔහු ඉදිරිපත් කර ඇත්තේ එම පනතේ 7(2) වගන්තිය යටතේ බවත්, මුල් වගන්තිය යටතේ සැකකරු ඉදිරිපත් කළේ නම් සාක්ෂි නොමැති වීම නිසා කවියා මුදාහැරීමට නීතිපතිවරයා තීරණය කළහොත් ලැබෙන සහනය වැළැක්වීම සඳහා වෙනත් වගන්තියක් යටතේ සැකකරු ඉදිරිපත් කර ඇති බවත් නීතිඥවරුන් පවසයි.

එයට අමතරව, අහ්නාෆ් නිදහස් වන අවස්ථාවේදී ලබාගත හැකිවන පරිදි, රැඳවුම් භාරයේ සිටියදී කවියා ලියා ඇති කවි සහ ඔහුගේ කුරානය සුරක්ෂිතව තබා ගන්නා ලෙස ත්‍රස්ත විමර්ශන කොට්ඨාශය හෝ බන්ධනාගාර දෙපාර්තමේන්තුවට නියෝග කරන ලෙස ද අහ්නාෆ් වෙනුවෙන් ඔහුගේ නීතිඥයන් අධිකරණයෙන් ඉල්ලා තිබේ.

ත්‍රස්ත විමර්ශන කොට්ඨාශයේ නිලධාරීන් එදින අධිකරණය හමුවේ පෙනී නොසිටි බැවින්, විත්තියේ ඉල්ලීම අනුව ආසන්න දිනයක් ඊලඟ නඩු දිනය ලෙස නියම කරන ලද මහේස්ත්‍රාත්වරයා, ජුනි 29 වන දින අධිකරණය ඉදිරියේ පෙනී සිටීමට ත්‍රස්ත විමර්ශන කොට්ඨාශය වෙත දන්වමින් නොතීසි නිකුත් කර ඇත.