බ්‍රිතාන්‍යයෙන් හඳුනා ගත් කොවිඩ් වෛරස ප්‍රභේදය මෙරට ස්ථාන කිහිපයකින් වාර්තා වී ඇති තත්වයක් තුළ ආණ්ඩුව එන්නත කෝකටත් තෛලය කරගෙන ඇති බවත් ඉන්දියානු රජයේ ප්‍රදානයක් ලෙස ලැබුණු කොවිඩ් එන්නත් ලක්ෂ 05 න් මේ වනවිට ඉතිරිව ඇති 60,000 ක මාත්‍රා ප්‍රමාණයෙන් රටම ගලවා ගත නොහැකි බවත් වෛද්‍ය රසායනාගාර වෘත්තීයවේදී සංගමයේ සභාපති රවී කුමුදේශ් පවසා තිබේ.
නව ප්‍රභේද ව්‍යාප්ත වීම හේතුවෙන් රටම ලොක්ඩවුන් කළයුතු බවට ඉල්ලීම් ඉදිරිපත් වී තිබියදී එවැනි අවශ්‍යතාවයක් නොමැති බවට බළධාරීන් පවසා තිබීමෙන් ඔවුන් නව ප්‍රභේදය කෙතරම් සරල ආකාරයෙන් සළකන්නේද යන්න පෙනී යන බවද ඔහු පවසයි.
මේ වනවිට නව ප්‍රභේදය ආසාදනය වූ පුද්ගලයන් දිස්ත්‍රික් 05 කින් හමු වී ඇති නමුත් අවදානම තිබෙන්නේ එම දිස්ත්‍රික්ක 05 තුළ පමණක්ය යන්න සෞඛ්‍ය බළධාරීන්ගේ තක්සේරුව බවත් කෙසේ නමුත් සෙසු දිස්ත්‍රික්කවල වෛරසය පැතිරී තිබේද යන්න පිළිබඳව මෙතෙක් කිසිදු පරීක්ෂණයක් සිදුකර නොමැති බවත් රවී කුමුදේශ් පවසා ඇත. එවැනි පරීක්ෂණයක් මගින් සෙසු දිස්ත්‍රික්කවලට නව ප්‍රභේදය ව්‍යාප්ත වී නොමැති බව තහවුරු කරගන්නා තෙක් විශාල අවදානමක් තිබෙන බවත්, මෙම ප්‍රභේදය ඉතා ඉක්මනින් පැතිර යන බැවින් එකවර විශාල ආසාදිතයන් ප්‍රමාණයක් වාර්තා වියහැකි බවත් කුමුදේශ් පෙන්වා දෙයි.
