ශ්රී ලංකාවේ දී සිදුවූ 14වන කොවිඩ් -19 මරණය මීට සුළු මොහොතකට පෙර වාර්තා වී තිබේ.
එසේ මියගොස් ඇත්තේ 50 හැවිරිදි කුලියාපිටිය ප්‍රදේශයේ පදිංචි කාන්තාවකි.
ඇය කොළඹ IDH රෝහලේ ප්‍රතිකාර ලබමින් සිටියදී ඇති වූ නිව්මෝනියා තත්ත්වයක් සහ හදවත් රෝගී තත්ත්වයක් හේතුවෙන් මියගිය බව රෝහල් බලධාරීන් පැවසීය.
ඇය පසුගිය 17 වැනිදා වැඩිදුර ප්‍රතිකාර සඳහා IDH රෝහලට ඇතුළත් කර තිබුණි. එම කාන්තාව දියවැඩියා රෝගියෙක් බව ද සෞඛ්‍ය අංශ පවසති.
මේ වනවිට රටතුළදී සිදුව ඇති රෝගී මරණ 14ක් වාර්තාවන අතර කෝරෝනා රෝගය නිසා මියගිය බවට නිල වශයෙන් සනාථ වූ විදේශගත ලාංකිකයන් සංඛ්‍යාව 65කි.
නව ආසාදිතයින් 50 දෙනෙක් අද (22) සවස් වනවිට හමුවීමත් සමග මෙරට දී හඳුනාගෙන ඇති සමස්ථ කොවිඩ් ආසාදිතයින් ගණන 6000 ඉක්මවා ගොස් තිබේ. පසුගිය දින 9ක් වැනි කෙටි කාලයක් තුළ දී මෙරට අවසන් කොරෝනා ආසාදිතයින් 1000 වාර්තා වීම සුවිශේෂි වේ.
