බාල වයස්කාර දරුවන් රාශියක් ලිංගිකව අපයෝජනය කරමින් එම ලිංගික අපයෝජන වීඩියෝ ගත කර සීඩී තැටි වලට නඟා යුරෝපයේ, ඇමරිකාවේ සහ ඕස්ට්‍රේලියාවේ විකෘති කාමාතුරයන්ට අලෙවි කළා යැයි චෝදනා ලත් රූපවාහිනී රියැලිටි ගුරුවරයෙකු වූ නිරන්ත එදිරිසිංහ සහ ඔහුගේ සහායකයා ලෙස ක්‍රියා කල ඕස්ට්‍රේලියාවේ ජීවත් වන හේවා ජයසිංහලාගේ උපුල් කුමාර හෙවත් උපුල් හේවා නම් ශ්‍රී ලාංකික වෛද්‍යවරයා බේරා ගැනීම සඳහා අමාත්‍ය උදය ගම්මන්පිල කටයුතු කොට ඇති බවට වාර්තා වෙයි.
ජයසිංහලාගේ උපුල් හේවා සහ නිරන්ත එදිරිසිංහ දීර්ඝ කාලීන මිතුරන් වන අතර මොවුන් දෙදෙනා විසින් එක්වී ළමා කාම වීඩියෝ නිශ්පාදනය කොට ඕස්ට්‍රේලියාවේ, ඇමරිකාවේ සහ යුරෝපයේ සිටින කුඩා දරුවන් කෙරෙහි විකෘති කාමාශාවෙන් පෙළෙන පුද්ගලයන්ට අලෙවි කොට ඇත. මෙම කාම ජාවාරම මගින් මොවුන් දෙදෙනා විශාල මුදලක් උපයා ගන්නට ඇති බව පොලිසිය විශ්වාස කරයි. බස්නාහිර පළාත භාර ජේ‍යෂ්ඨ නියෝජ්‍ය පොලිස්පති දේශබන්ධු තෙන්නකෝන් මහතාට ලද තොරතුරකට අනුව කොල්ලුපිටිය පොලිස් ස්ථානාධිපති ප්‍රධාන පොලිස් පරීක්‍ෂක සුමිත් ගුණරත්න මහතා ඇතුළු නිලධාරීන් පිරිසක් නිරන්ත එදිරිසිංහව අත්ඩංගුවට ගෙන ඇති අතර ඔහු රක්‍ෂිත බන්ධනාගාර ගත කොට ඇත.
ඕස්ට්‍රේලියාවේ වෙසෙන ජයසිංහලාගේ උපුල් හේවා නම් පුද්ගලයා ලංකාවේ ප්‍රදේශ කිහිපයක රෝහල් වල සේවය කොට තිබේ. ඔහු මහනුවර ශික්‍ෂණ රෝහලේ සේවය කල සමයේදී නව හැවිරිදි පිරිමි ළමයෙකු ලිංගික අපයෝජනයට ලක් කොට ඇති අතර ඔහුට එරෙහිව නීතිය ක්‍රියාත්මක වී නොමැත. කෙසේ නමුත් අදාල සිදුවීමෙන් පසු ඔහු කිසිම දැණුම් දීමකින් තොරව මහනුවර ශික්‍ෂණ රෝහලෙන් සේවය අතහැර ගොස් තිබේ. පසුව ඔහු ඕස්ට්‍රේලියාවට ගොස් රෝහලක රැකියාවක් ලබාගෙන තිබේ.
නිරන්ත එදිරිසිංහ අත් අඩංගුවට පත් වීමෙන් පසුව අමාත්‍ය ගම්මන්පිල ගේ මැදිහත්වීම නිසා ජයසිංහලාගේ උපුල් හේවා නම් ශ්‍රී ලාංකික වෛද්‍යවරයා කිසිදු චෝදනාවක් ලබා නිදහස් වී ඇත. තවද මෙම ළමා අපයෝජන පිලිබඳව මූලික විමර්ශන සිදු කල කොල්ලුපිටිය පොලිසියේ ළමා හා කාන්තා අංශ ස්ථානාධිපති ප්‍රධාන පොලිස් පරීක්‍ෂක වරුණි බෝගහවත්ත ඇතුළු නිලධාරීන් කිහිප දෙනෙකු මාරු කිරීම නිසාද මූලික සාක්‍ෂි වෙනස් කිරීම නිසාද වෛද්‍ය උපුල් හේවාට ගැලවී යාමට හැකිවී තිබේ.
ඇමැති උදය ගම්මන්පිල ද කලක් ඕස්ට්‍රේලියාවේ විසූ අතර ඔහුගේ පවුල තවමත් ඕස්ට්‍රේලියාවේ ය. උපුල් හේවා සහ ගම්මන්පිල ද ලඟ මිතුරන් වන අතර මීට ඉහතදී ව්‍යාජ ඇටර්නි බලපත්‍රයක් යොදාගනිමින් බ්‍රයන් ජෝන් සැඩික් නම් ඕස්ට්‍රේලියානු ජාතිකයකුට අයිති සමාගමක කොටස් රුපියල් මිලියන ගණනක වංචාවක් කිරීම සම්බන්ධයෙන් උදය ගම්මන්පිල අත් අඩංගුවට පත් වූ විටදී ද වෛද්‍ය උපුල් හේවා, ගම්මන්පිලට ආධාර උපකාර කර ඇතැයි පැවසේ. වෛද්‍ය උපුල් හේවා චෝදනා විරහිතව ගැලවී යාමෙන් පසු ඉදිරි කාලයේ නිරන්ත එදිරිසිංහටද ළමා අපයෝජන චෝදනා වලින් නිදහස් වී යාමේ අවකාශය බොහෝ විට ලැබෙනු ඇත.
