දිවයින පුරා රෝහල්වල කණිෂ්ඨ කාර්යය මණ්ඩල සේවක සේවිකාවන් මුහුණ දී ඇති ගැටලු සහ ඊට අදාළව ගනුලබන ඉදිරි ක්‍රියාමාර්ග පිළිබඳව දැනුවත් කිරීමේ මාධ්‍ය හමුවක් ඊයේ (26) සමස්ත ලංකා සෞඛ්‍ය සේවක සංගමය විසින් පවත්වා තිබුණි.
එහිදී අදහස් දැක්වූ සංගමයේ ලේකම් ටැම්පිටියේ සුගතානන්ද හිමි පවසා සිටියේ කනිෂ්ඨ කාර්යය මණ්ඩලවලට පැය 8 බැගින් දින හයක කාලයක් වැඩකිරීමට සිදුව ඇති නමුත් ඔවුන්ගේ දීමනා ගෙවීමද නිසි පරිදි සිදු නොවන බවයි. එසේම වසර ගණනාවක් තිස්සේ නිල ඇඳුම් දීමනාව වැඩි නොකිරීම, රාජකාරි කටයුතු කුමක්ද යන්න නිශ්චිතව වෙනකොට නොතිබීම යන ගැටළු පවතින බව ද සුගතානන්ද හිමියන් මෙහිදී පැවසීය.
මෙම ගැටලුවලට විසඳුම් ලබාදෙන ලෙස ඉල්ලමින් පැවැත්වූ උද්ඝෝෂණ, විරෝධතාවලට අමතරව සමස්ත ලංකා සෞඛ්‍ය සේවක සංගමයේ නියෝජිතයන් සහ සෞඛ්‍ය අමාත්‍යංශ අතිරේක ලේකම්වරියක සමඟ ඊයේ (26) සාකච්ඡාවක් ද පවත්වා තිබේ.
සුගතානන්ද හිමි පැවසුවේ ආණ්ඩුව කොරෝනා කාලයේ විවිධ සහන දීම සඳහා බව පවසමින් චක්‍රලේඛ නිකුත් කළත් මේවනතුරු කණිෂ්ඨ කාර්යය මණ්ඩල සේවක සේවිකාවන් කරන ලද සේවයට අදාළව හෝ දීමනා ලබා දී නොමැති බවයි.
මෙම මාධ්‍ය හමුවට සමස්ත ලංකා සෞඛ්‍ය සේවක සංගමයේ සභාපති චමින්ද නිලන්ත , ප්‍රධාන ලේකම් ටැම්පිටියේ සුගතානන්ද හිමි, භාණ්ඩාගාරික රංජිත් සිල්වා සහ උප ලේකම් දුලානි ශාගරිකා යන අය සම්බන්ධ වූහ. සේවක ගැටලු සම්බන්ධයෙන් ඉදිරි දින කීපය පුරා සියලු රෝහල්වල සේවකයින් දැනුවත් කරන බව එම සංගමය පවසා සිටිය.
