විදෙස් ආයෝජන ගෙන්වා ගැනීම සඳහා ඉඩම් රජයේ පාලනයෙන් නිදහස් කිරීම හා කම්කරු නීති සංශෝධනය කළ යුතු බව ලෝක බැංකුව අවධාරණය කර තිබේ.
මෙරට ඍජු විදෙස් ආයෝජන 1.5%ක මට්ටමේ පැවතිය යුතු නමුත් ළඟාකරගෙන ඇත්තේ 0.5%ක් තරම් ඉතා අඩු අගයක් බව ලෝක බැංකුව පවසයි.
එහි නියෝජිතයින් අවධාරණය කරන්නේ මෙරට ආර්ථික ඉලක්ක සපුරා ගැනීම සඳහා විදේශීය සෘජු ආයෝජන (FDI) ඉහළ මට්ටමකට ගෙනඒමට කඩිනම් ව්‍යුහාත්මක ප්‍රතිසංස්කරණ ක්‍රියාත්මක කරන ලෙසයි.
රටේ වත්මන් FDI ගලා ඒම දළ දේශීය නිෂ්පාදිතයෙන් (GDP) සියයට 0.5 ක් තරම් ඉතා අඩුඅගයක් ගැනීම සංවර්ධන ඉලක්ක සඳහා ප්‍රමාණවත් නොවන බවත් ලෝක බැංකුව අවධාරණය කර සිටියි.
ලෝක බැංකුවේ නියෝජිතයන් විසින් අද පැවති, මෙරට තත්ත්වය යාවත්කාලීන කිරීමේ අවස්ථාවේදී මේ බව පැවසිය.
එහිදී අදහස් දැක්වූ මාලදිවයින සහ ශ්‍රී ලංකාව සඳහා වන ජ්‍යෙෂ්ඨ ආර්ථික විද්‍යාඥරිචඩ් වෝකර් කියා සිටියේ, 2030 වසර වන විට ඇමරිකානු ඩොලර් බිලියන 36 ක FDI ප්‍රමාණයක් ආකර්ෂණය කර ගැනීමේ රජයේ ඉලක්කය කරා ළඟා වීමට ශ්‍රී ලංකාවට ‘වෙනස්කම් මාලාවක් සිදු කිරීමට සිදුවන බවයි.
මෙම FDI අගය පෙරදී 1%ක් පමණ වූ අතර එය තවදුරටත් පිරිහී ඇති බව වෝකර් පෙන්වා දෙයි.
නමුත් එය 1.5%ක් පමණ විය යුතු බවත්, මැලේසියාව සහ වියට්නාමය වැනි රටවල එය 3%ක් පමණ වන බවත් ඔහු සඳහන් කළේය.
FDI ආකර්ෂණය කර ගැනීමේ ප්‍රධාන බාධාවක් ලෙස වෝකර් ඉස්මතු කළේ, ඉඩම් සඳහා ප්‍රවේශවීමේ හැකියාවයි. රජයට අයත් ඉඩම් ප්‍රමාණය 80% ක්. එහෙත් නිලධාරිවාදය සහ බහු අමාත්‍යාංශ මගින් පාලනය වීම නිසා පැමිණිය හැකි ආයෝජකයින් අධෛර්යමත් වන බව ඔහු පෙන්වා දෙයි.
මෙම තත්ත්වය විශේෂයෙන්ම කෘෂිකාර්මික අංශයේ ආයෝජකයින්ට බාධා ඇති කරන්නක් බව හෙතෙම පවසයි.
මීට අමතරව, ශ්‍රී ලංකාවේ බොහෝමයක් දශක හයකට වඩා පැරණියල් පැනගිය කම්කරු නීති හේතුවෙන් ව්‍යාපාරික නම්‍යශීලීභාවය සීමාවන බවත් මෙහිදී අවධාරණය කෙරින.
එමෙන්ම, මෙම නීති මගින් අංශ කිහිපයක කාන්තාවන් සඳහා වන රැකියා අවස්ථා සීමා කිරීම තවදුරටත් ආර්ථික වර්ධනයට බාධාවක් බව ඔහු පවසයි.
“මෙම ව්‍යුහාත්මක ගැටළු විසඳා නොගතහොත්, විදේශ ආයෝජන සඳහා තරඟ කිරීමට ශ්‍රී ලංකාවට අපහසු වනු ඇතැයි” වෝකර් අනතුරු ඇඟවයි.
ඉඩම් පාලනය වැඩිදියුණු කිරීම, කම්කරු රෙගුලාසි නවීකරණය කිරීම සහ වඩාත් ආයෝජක හිතකාමී පරිසරයක් නිර්මාණය කිරීම ශ්‍රී ලංකාව සිය ආර්ථික ඉලක්ක සපුරා ගැනීම සඳහා අතිශය තීරණාත්මක පියවරබව ලෝක බැංකුව වැඩිදුරටත් අවධාරණය කර සිටියි.
