ශ්‍රී ලංකාවේ අධ්‍යාපන ප්‍රතිසංස්කරණයක් හරහා නව විෂය මාලාවේ වෙනසක් සිදු කිරීමට නියමිතව තිබුණේ 2023 වසරේදී බව ලංකා ගුරු සංගමයේ ප්‍රධාන ලේකම් ජෝසෆ් ස්ටාලින් පවසයි. ඒ 2023 වසරේදීයි. එනම් රනිල් – රාජපක්ෂ පාලන සමයේදීයි.
ඊට වසර දෙකකට පසු මේ වන විට නව අධ්‍යාපන ප්‍රතිසංස්කරණයක් හඳුන්වා දීමට වත්මන් රජය සැලසුම් කරයි.
පසුගිය දා (ජූනි 12) අනුරාධපුරයේදී පැවති සාකච්ඡාවකදී නව අධ්‍යාපන ප්‍රතිසංස්කරණ පිළිබඳව අග්‍රාමාත්‍ය හරිනි අමරසූරිය, අධ්‍යාපන අමාත්‍යංශයේ ලේකම් නාලක කළුවැව සහ විභාග කොමසාරිස් ජනරාල් ඉන්දිකා ලියනගේ මේ සම්බන්ධයෙන් අදහස් දැක්වීය.
“2026 ජනවාරි 01 වෙනි දා අධ්‍යාපන ප්‍රතිසංස්කරණ ක්‍රියාවලිය ආරම්භ කිරීමට අපි සැලසුම් කරල තියෙනවා. ඒක ආරම්භ කරන්නේ 1 සහ 6 ශ්‍රේණිවලින්. සම්පූර්ණයෙන් ම ලංකාවෙ සියලු පාසල්වල මේ ක්‍රියාවලිය ආරම්භ කරනවා,” අධ්‍යාපන අමාත්‍යංශයේ ලේකම්වරයා පැවසීය.
මෙම නව ප්‍රතිසංස්කරණ යටතේ දිනයක පාසලක උගන්වනු ලබන කාලපරිච්ඡේද සංඛ්‍යාව 7කට අඩු කෙරෙන අතර, එක් කාලපරිච්ඡේදයක් ලෙස මිනිත්තු 50ක් ඉගැන්වීමේ කටයුතු සිදු කෙරේ.
නව අධ්‍යාපන ප්‍රතිසංස්කරණ යටතේ අපොස සාමාන්‍ය පෙළ විභාගය සඳහා අගැයීම් කෙරෙන විෂයයන් ගණන 7ක් වනු ඇත.
ඉන් ප්‍රධාන විෂයයන් 5ක් අනිවාර්යයෙන් අධ්‍යයනය කළ යුතු වේ. එම විෂයයන් වන්නේ, ගණිතය, ඉංග්‍රීසි, මව්බස, ආගම සහ විද්‍යාව යි.
ඊට අමතරව, තවත් විෂයයන් දෙකක් තෝරා ගැනීමට අවස්ථාව හිමි වෙයි.
එම විෂයයන් කාණ්ඩ කිහිපයකට බෙදා තිබේ.
ඒ අනුව, තාක්ෂණය, සෞන්දර්යය, කළමනාකරණය හා ව්‍යවසායකත්වය, මානව ශාස්ත්‍ර හා සමාජ විද්‍යා, සෞඛ්‍යය හා ශාරීරික අධ්‍යයනය යන විෂය කාණ්ඩ යටතේ විෂයයන් රැසක් අතරින් දෙකක් තෝරාගත හැකි බව අධ්‍යාපන නියෝජ්‍ය අමාත්‍ය මධුර සෙනෙවිරත්න පවසා තිබේ.
