දිවයිනේ විවිධ ප්‍රදේශවල රෝහල්වලින් ඖෂධ හිඟයක් ගැන තොරතුරු වාර්තා වෙමින් පවතියි. ගාල්ල ජාතික රෝහලේ වකුගඩු ඒකකයේ වකුගඩු රෝගීන් සඳහා ලබා දෙන අත්‍යාවශ්‍ය ඖෂධ හිඟ වීමෙන් රෝගීන් දැඩි පීඩාවට පත් වී ඇති බව මාධ්‍ය වාර්තා කර තිබේ.
මව්බිම ගාල්ල වාර්තාකරු ෆර්හාන් නිසාම්දීන් මෙම පුවත වාර්තා කරමින් සඳහන් කරනුයේ, වකුගඩු රෝගීන්ට රුධිර වර්ධනය සඳහා ලබා දෙන Erythropoietin 4000 iu එන්නත මේ වන විට රෝහලේ නොමැති බවටත් ඒවා ලැබෙන දිනයක් පිළිබඳව රෝගීන්ට කිසිඳු තොරතුරක් ලබා දී නොමැති බවටත් රෝගීන් චෝදනා කරන බවයි.
මේ අතර GMOA මාධ්‍ය ප්‍රකාශක වෛද්‍ය චමිල් විජේසිංහ මාධ්‍ය හමුවක් පවත්වමින් පැවසුවේ රට තුළ පවතින රෝහල් පද්ධතිය තුළ ඖෂධ පමණක් නොව ශල්‍ය සහ වෛද්‍ය උපකරණවල හිඟයක් පවතින බවත්, එමෙන් ම රසායනාගාර උපකරණ සහ ඒක්ස්රේ පරීක්ෂණ සඳහා භාවිත කරන උපකරණවල ද යම් හිඟයක් පවතින බවයි.
මෙම ගැටලුව සමස්ත රෝහල් පද්ධතිය තුළම උඩු දිවූ කරුණක් බව සෞඛ්‍ය අමාත්‍යවරයා පවා පිළිගෙන ඇති බවත් පවසන වෛද්‍ය චමිල් විජේසිංහ අවධාරණය කරන්නේ මේ කරුණු පාදක කරගනිමින් රොගීන් කිසියම් අපහසුතාවකට පත්වන්නේ නම් ඒ සියල්ලෙහි වගකීම සෞඛ්‍ය අමාත්‍යංශය භාරගත යුතු බවයි.
