ලංකාවේ පවුලක් මාසිකව රු 4000ක බද්දක් ගෙවීමට සිදුව ඇති බව පෙරටුගාමී සමාජවාදී පක්ෂය පවසයි. එම පක්ෂයේ අද පැවති මාධ්‍ය හමුවකදී අදහස් දක්වමින් පුබුදු ජයගොඩ පැවසුවේ සාමාන්‍ය ජනතාවගෙන් එසේ බදු අයකර ගනිද්දී මහා පරිමාණ ධන කුවේරයන් නොගෙවන ලද බදු සඳහා අයකරගත යුතු පොළිය කපා දැමීමට ආණ්ඩුව උත්සාහ කරන බවයි.

ඔහු වැඩිදුරටත් පැවසුවේ,

” අපි අද මාධ්‍ය හමුව කැඳවන්න හේතු වුනේ මෙවර අයවැයේ බදු ප්‍රතිපත්තිය සකස් කිරීමේදී සිදු වෙච්ච ඉතාම බරපතළ ජනතාද්‍රෝහී ක්‍රියාවක් ගැන සමාජය දැනුවත් කරන්න. අපි දන්නවා ආණ්ඩුව මේ වෙද්දි භාණ්ඩ හා සේවා මත පනවපු අධික බදු නිසා සාමාන්‍ය ජනතාවට විශාල බරක් පැටවිලා තියනවා. ලංකාවේ පවුල් ලක්ෂ 58ක් ඉන්නව ඒ එක පවුලක් මාසිකව රුපියල් 40,000කට ආසන්න බදු ප්‍රමාණයක් රජයට ගෙවන්න ඕන. හැබැයි ලංකාවේ ඉන්න ධනකුවේරයෝ පසුගිය කාලෙම තමන්ගේ ආදායම් බදු ගෙවලා නෑ. විශාල බදු ප්‍රමාණයක් ඔවුන් වංචා කරලා තියනවා. දැන් එහෙම තත්වයක් ඇතුලෙ ආණ්ඩුව සූදානම් වෙනවා ඒ වංචනික ධනකුවේරයන්ට තවත් සහන දෙන්න.

ලංකාවේ නීතියට අනුව රජයට ගෙවිය යුතු බදු නොගෙවා වංචා කළොත් ඒගොල්ලන්ට සිද්ධ වෙනවා එයට අදාළව නිශ්චිත දඩ මුදලක් සහ පොලියක් ගෙවන්න. හැබැයි ආණ්ඩුව මේ වෙද්දි සූදානම් වෙනවා ඒ දඩ මුදල සහ පොලිය කපා හරින්න. ජනාධිපති අනුර දිසානායක ජනාධිපතිවරයාගේ අයවැය ලේඛනයේ තාක්ෂණික කරුණුවලට අදාළ කොටසේ 1.9 වගන්තිය් සඳහන් වෙනවා 2022 – 2023 අතර කාලෙදි නොගෙවපු බදු මාස 6ක් ඇතුළත ගෙවනවනං 2017 අංක 24 දරණ දේශීය ආදායම් පනතේ සහ 2022 අංක 14 දරණ බදු පනතේ සඳහන් වෙන හිඟ බදු මුදල් සඳහා වන ප්‍රතිපාදන අදාල වෙන්නෙ නෑ කියලා.

අපි දන්නවා 2017 අංක 24 දරණ දේශීය ආදායම් බදු පනතේ 157 වගන්තියේ කියන විදිහට බදු ගෙවන පුද්ගලයා නියමිත බදු නොගෙව්වොත් ඒ සඳහා නියමිත පොලියක් ගෙවන්න ඕන. 159 වගන්තියේ නිශ්චිතවම සඳහන් වෙනවා මාසෙකට 1.5%ක පොලියක් අයකරගත යුතුයි කියලා. ඒ කියන්නේ අවුරුද්දකට 18%ක පොලියක් ගෙවන්න ඕන. මීට අමතරව 25%ක දඩ මුදලක් ගෙවන්න ඕන. දැන් අයවැය අනුව කියන්නේ පනත අදාළ නෑ මේ අයකරගත යුතු මුදල ආණ්ඩුව අයකරගන්නෙ නෑ කියල ද ?

අපි උදාහරණයක් ගත්තොත් මෙන්ඩිස් සමාගම සුරාබදු හැරුණාම රුපියල් බිලියන 1.5ක් ආදායම් බදු නොගෙවා වංචා කරලා තියනවා. ඒ කියන්නේ රුපියල් කෝටි 150ක මුදලක්. එතකොට මේකට අවුරුද්ට 18%ක පොලියක් ගණනේ ගණං හදලා බැලුවොත් අවුරුදු පහකදි රජයට ලැබෙන්න ඕන 90%ක විතර විශාල පොලියක්. ඒ කියන්නේ මේ සමාගම නොගෙවපු බදු සඳහා තව කෝටි 100ක විතර පොලියක් ගෙවන්න ඕන හරි නම් රජයට. හැබැයි දැන් ආණ්ඩුව කියන්නේ ඒ කෝටි 100ක පොලිය අපිට එපා නොගෙවපු බදු කෝටි 150 විතරක් ගෙවන්න කියලා. මේ කරන්න හදන ජනතා ද්‍රෝහී ක්‍රියාවෙන් කෝටි ගාණක් රජයට අහිමි වෙන්න නියමිතයි.

අපි දන්නවා 2023 මාර්තු ඉඳලා 2024 දෙසැම්බර් දක්වා විතරක් සමාගම් වංචා කරපු බදු ප්‍රමාණය රුපියල් බිලියන 243ක්. පාර්ලිමේන්තු ක්‍රම සහ විධි කාරක සභාවේ වාර්තාව කියන විදිහට රුපියල් බිලියන 1068ක් තියනවා නොගෙවපු බදු. එතකොට මේවට මේ සමාගම් රුපියල් කෝටි 40,000ක් 50,000ක් අතර පොලියක් රජයට ගෙවන්න ඕන. එතකොට මේ විශාල ආදායමක් තමයි ආණ්ඩුව අහිමි කරගන්න සූදානම් වෙන්නේ. මේ කවුරු සතුටු කරන්න ද ආණ්ඩුව මෙහෙම ප්‍රතිපත්ති ගේන්නෙ. ? සාමාන්‍ය ජනතාව මත ගන්න හාල් පොල් සීනි ටිකේ ඉඳලා අධික බද්දක් ගහලා තියෙන්නේ. ළමයින්ගේ පාසල් උපකරණ වලට විශාල වැට් බද්දක් ගහල තියෙන්නේ. ඒවා එක දශමයක් අඩු කරලා නෑ. හැබැයි කූට ව්‍යාපාරිකයන්ට කෝටි ගාණක සහන දෙන්න ආණ්ඩුව සූදානම් වෙනවා.

දැන් එක්කෝ ආණ්ඩුව නිශ්චිතව රටට කියන්න ඕන අපි යන පාර තමයි මේ. අපි රජයක් විදිහට චෞර ව්‍යාපාරිකයන් ආරක්ෂා කරන්න පෙනී ඉන්නවා කියලා. එහෙම නැත්තං කියන්න ඕන එක්කෝ අනේ ජනාධිපති තුමා දන්නෑ ඔහු නොදැන තමයි අයවැය හදපු අය මෙහෙම වගන්තියක් අයවැය ලේඛනයට දාලා තියෙන්නේ කියලා. එතකොට ජනතාවට තීරණයක් ගන්න පුලුවන් මේ වංචාවට එරෙහිව ජනතාව විදිහට ගන්න ක්‍රියාමාර්ගය මොකක් ද කියලා. “