පසුගිය වසරේදී රටින් පිටවී විදේශගතවී ඇති සංඛ්‍යාව 14,37,607ක් බව මහබැංකු වාර්තා හෙළිකර ඇති බව පේරාදෙණිය විශ්විද්‍යාලයේ ආර්ථික විද්‍යා සහ සංඛ්‍යාන අධ්‍යයන අංශයේ ජ්‍යෙෂ්ඨ මහාචාර්ය වසන්ත අතුකෝරල මහතා ‘මව්රට’ට පැවැසීය. (Sri Lanka Latest News)

එය පෙර වසරට සාපේක්ෂව බලන විට 3,09,849ක වැඩිවීමක් බවත්, එය 27%ක ප්‍රතිශතයක් බවත් ඔහු පෙන්වා දුන්නේය.

ඒ අනුව මාසයකදී සාමාන්‍යයෙන් පුද්ගලයන් 1,18,900ක් පමණ රටින් පිටවී ගොස් ඇති බවයි සඳහන් වන්නේ.

මේ අයගෙන් 2,97,656ක් පමණ රටින් පිටව ගොස් ඇත්තේ විදේශ රැකියා සඳහා බවද සඳහන්ය.

2023 වසරේ විදේශ රැකියා සඳහා ගිය අයගෙන් 70%ක් පමණ විවිධ ආකාරයේ වෘත්තීය දක්ෂතා සහිත අය බවත්, අඩු දක්ෂතා සහිත අය 30%ක් පමණ වන බවත් අදාළ සංඛ්‍යාලේඛන හෙළිදරව් කොට ඇත. රටින් පිටව ගොස් ඇති අයගෙන් 55%ක් පිරිමින් වන අතර 45%ක් කාන්තාවන් බවද සඳහන්ය.

එමෙන්ම 34%ක් පමණ වයස අවුරුදු 25-34 අතර කාණ්ඩයේ අය බවයි දැක්වෙන්නේ.

එලෙසම මේ ආකාරයෙන් සිදුවන ශ්‍රම සංක්‍රමණයෙන් 78%ක් පමණ ගොස් ඇත්තේ මැදපෙරදිග රටවලටය. යුරෝපයට 7%ක්ද, ආසියාතික රටවලට 12%ක්ද, ඔස්ටේ්‍රලියාව සහ නවසීලන්තය යන රටවලට 0.08%ක්ද පිටව ගොස් ඇති බව සඳහන්ය.