ඖෂධ කල් ඉකුත්වීම සහ හානිවීම හේතුවෙන් රාජ්‍ය ඖෂධ නීතිගත සංස්ථාවට පසුගිය 2022 වර්ෂයේදී සහ ඊට කලින් වර්ෂයේදී රුපියල් කෝටි 15කට වැඩි පාඩුවක් සිදු වී ඇතැයි ජාතික විගණන කාර්යාලය නිකුත් කළ අලුත්ම වාර්තාවක සඳහන්වේ.

ඉකුත් 2022 වර්ෂයේ දෙසැම්බර් මස31 වැනිදා වනවිට තත්වයෙන් අසමත්, කල් ඉකුත් වූ සහ හානි වූ ඖෂධවල මුළු පිරිවැය කෝටි 34කට වැඩි බවත් සමාලෝචිත වර්ෂයේදී තත්වයෙන් අසමත් කල් ඉකුත්වූ සහ හානි වූ ඖෂධ වල මුළු පිරිවැය කෝටි හයක් බවත් වාර්තාවේ දැක්වේ.

ඉකුත් වර්ෂයේදී හා සමාලෝචිත වර්ෂයේදී තත්වයෙන් අසමත් ඖෂධ වල මුළු පිරිවැය කෝටි තුනකට වැඩි මුදලකින් දෙකෝටි තිස් හය ලක්ෂයක මුදලක් පසුගිය වසරේ මාර්තු 31 වන විටත් අයකරගෙන නොතිබූ බව එම වාර්තාව සඳහන් කරයි.

මේ අතර අසාධු ලේඛනගත සැපයුම්කරුවන්ගෙන් අය කර ගත යුතුව තිබූ කෝටි තිහකට වැඩි මුදලක් අය කර ගැනීමද අවිනිශ්චිත තත්ත්වයක පැවතුණු බව විගණන නිලධාරීහු පවසති.

මේ තොරතුරු සඳහන් වන්නේ රාජ්‍ය ඖෂධ නීතිගත සංස්ථාවේ 2022 වර්ෂික වාර්තාවට ඇතුළත් කරනු ලැබ ඇති විගණන වාර්තාවේය.