පාර්ලිමේන්තුව නියෝජනය කරන දේශපාලනඥයින් අතර ජනතා ප්‍රසාදය අඩුම දේශපාලනඥයින් අතරට රාජපක්ෂ පවුලේ දේශපාලනඥයින් පත්ව තිබෙනවා.
සෞඛ්‍ය ප්‍රතිපත්ති ආයතනය විසින් කළ නවතම සමීක්ෂණයකින් මේ බව අනාවරණය වී ඇති බවයි වාර්තා වන්නේ.
මේ අනුව ජනතා ප්‍රසාදය අඩුම දේශපාලනඥයා ලෙස හිටපු අමාත්‍ය බැසිල් රාජපක්ෂ පත්ව ඇති අතර ඉන් අනතුරුව හිටපු අමාත්‍ය නාමල් රාජපක්ෂ ජනතා ප්‍රසාදය අඩුම දේශපාලකයා ලෙස පත්ව තිබෙනවා.
එහිදී ඔවුන් ලකුණු -73ක් හා -64ක් ලබාගෙන ඇති බවයි වාර්තා වන්නේ.
ගෝඨාභය රාජපක්ෂට ජනතා ප්‍රසාදය -51ක් සහ මහින්ද රාජපක්ෂ මහතාට ජනතා ප්‍රසාදය -52ක් ලෙස සටහන් වනවා.
ජනතාව අතර ප්‍රසාදය හිමි දේශපාලනඥයින් අතර ධන අගයක් ලබා සිටින්නේ හිටපු රාජ්‍ය ඇමතිනී සුදර්ශනී ප්‍රනාන්දු පුල්ලේයි.
එහිදී ඇයට ධන ලකුණු 08ක් හිමිව ඇති අතර හිටපු රාජ්‍ය අමාත්‍ය චන්න ජයසුමනට සෘණ හෝ ධන ලකුණු හිමිව නොමැති අතර ඔහුගේ අගය 0 වනවා.
ජාතික ජන බලවේගයේ නායක අනුර කුමාර දිසානායකට මෙම සමීක්ෂණයේ දී -16ක් හිමිව තිබෙනවා.
ජනාධිපති රනිල් වික්‍රමසිංහ සහ අග්‍රාමාත්‍ය දිනේෂ් ගුණවර්ධනට -39ක් මෙම සමීක්ෂණයෙන් ලැබී ඇති බවයි වාර්තා වන්නේ.
