පසුගිය මාර්තු 23 වනදා ජනාධිපති ලේකම් කාර්යාලයේ පැවති සාකච්ඡාවකදී රාජ්‍ය ව්‍යවසායන් හතක රාජ්‍ය සතු කොටස් විකිණීමට අදහස් කරන බව රනිල් වික්‍රමසිංහ පවසා තිබුණි. එහිදී ඔහු වැඩිදුරටත් පවසා සිටියේ “අපේ ණය ගෙවා ගන්න බැරි නම් ගෙදර තියෙන දෙයක් විකුණලා ගෙවන්න වෙනවා” යනුවෙනි.
ඒ අනුව ශ්‍රී ලංකා රක්ෂණ සංස්ථාව සහ ලිට්‍රෝ ගෑස් සමාගම ඇතුළු රාජ්‍ය ව්‍යාපාර 7 ක රජයේ කොටස් විකිණීමට තීරණය කර තිබේ.
මුදල් අමාත්‍යාංශය යටතේ ඇති රාජ්‍ය ව්‍යවසාය ප්‍රතිව්‍යුහකරණ ඒකකය ඊයේ පස්වරුවේ නිවේදනය කළේ, පසුගිය මාර්තු 13 වැනිදා ගත් කැබිනට් තීරණයට අනුව එම පියවර ගෙන ඇති බවයි.
කැබිනට් තීරණයට අනුව රජයේ කොටස් විකිණීමට තීරණය කර ඇති රාජ්‍ය ව්‍යාපාර ලැයිස්තුව වන්නේ,
(1) ශ්‍රීලංකන් ගුවන් සමාගම හා ඇතුළු ශ්‍රී ලංකන් කේටරින් සමාගම
(2) ශ්‍රී ලංකා ටෙලිකොම් පී.එල්.සී
(3) සී/ස ශ්‍රී ලංකා රක්ෂණ සංස්ථාව
(4) කැන්විල් හෝල්ඩින්ග්ස් (පුද්) සමාගම ( කොළඹ – ෆ්‍රැන්ඩ් හයට් )
(5) හොටෙල් සංවර්ධන ලංකා සමාගම (කොළඹ හිල්ටන් හෝටලය)
(6) සී/ස ලිට්‍රෝ ගැස් පර්යන්ත (පුද්) සමාගම ඇතුළු ලිට්‍රෝ ගෑස් ලංකා සමාගම
(7) ලංකා හොස්පිටල් සංස්ථා පී. එල්. සී. යන ආයතනවල කොටස් අයිතිය එලෙස පැවරීමට තීරණය කර ඇති බවයි.
එම සමාගම්වලට ගනුදෙනුකාර උපදේශන සේවා සැපයීම හා කොටස් අයිතිය පැවරීමේ කටයුතු සඳහා සහායවීමට පළපුරුදු උපදේශන හෝ සංවර්ධන මූල්‍ය ආයතන පත්කර ගැනීමට නියමිත බව ආණ්ඩුව පවසයි.
එම උපදේශකවරුන් විසින් විකුණුම් පාර්ශ්වය වෙනුවෙන් නිසි ඇගයීම් හා විමර්ශන කටයුතු තක්සේරු කිරීම හා ඩිජිටල් දත්ත ගබඩාවක් සකස් කිරීම, ගනුදෙනු උපක්‍රම හා අලෙවිකරණ උපක්‍රම සකස් කිරීම මඟින් එම ව්‍යපාර බැහැර කිරීමට අවශ්‍ය සහය ලබාදෙනු ඇතැයි පැවසේ.
ඒ අනුව ඉදිරියේදී මෙම රාජ්‍ය ව්‍යාපාරවල රජයේ කොටස් අලෙවි කිරීමට අදාළව කැමැත්ත පලකිරීමේ නිවේදනය හා යෝජනා කැදවීමේ නිවේදන ක්‍රියාවළිය සඳහා දේශීය හා ජාත්‍යන්තර මාධ්‍යවල දැන්වීම් පළ කිරීමට නියමිතයි.
රනිල් වික්‍රමසිංහ පසුගියදා පාර්ලිමේන්තුව අමතමින් ප්‍රකාශ කරේ ශ්‍රී ලංකාවේ රාජ්‍ය ආදායම මේ වන විට දළ දේශීය නිෂ්පාදිතයෙන් 8.3ක් බවයි.
ලෝකයේ අනෙක් රටවල් සමඟ සැසදීමේ දී ශ්‍රී ලංකාවේ රාජ්‍ය ආදායම පහළ මට්ටමක ඇති බව ඔහු පවසන අතර එය ඉදිරියේදී 15% දක්වා වැඩිකරගැනීමට බලාපොරොත්තු වන බව ඔහු පවසා තිබේ.
එවැනි තත්ත්වයකදී රජයට ආදායම් ලැබිය හැකි මෙවැනි ආයතන විකුණා දමා ජනතාව මත තව තවත් බදු බර පැටවීම ආණ්ඩුවේ ප්‍රතිපත්තිය වී තිබේ. එසේම ප්‍රතිව්‍යුහගතකරණයෙහි අමු අදහස විකිණීම බව රනිල් ඔප්පු කරමින් ඇත.
